15
Ty Fidadañe ao
1 Aa le mivave o kombimbao tika maozatseo, fe tsy t’ie hampiehake vatañe; 2 songa hampifale ondaty ami’ty hasoa tika, hampiraorao aze. 3 Tsy nanao ty hampinembanembam-bata’e i Norizañey; fa hoe ty pinatetse:
Nidoñ’amako ty ìnje’ o nañinje azoo.*Sab 69:9
4 Hene nisokireñe hañòhañe antikañe ze pinatetse haehae†Ko I 10:11, Ti II 3:16-17, soa te hanan-ko tamaeñe amy fahaliñisañey naho amy fañosiha’ i Sokitse Masiñeiy.
5 I Andrianañaharem-pahaliñisañe naho fañohòañey abey ro hifampipiteha’ areo troke no’ Iesoà Norizañey, 6 soa t’ie hirai-troke naho songa hirihoñe am-piarañanañañe raike handrenge an’Andrianañahare Rae’ i Talèntika Iesoà Norizañey.
7 Aa le mifampihovà, hambañe ami’ty nampiziliha’ i Norizañey antika, ho ami’ty engen’ Añahare. 8 Le itaroñako te mpitoroñe i fisavarañey i Norizañey, ho ami’ty hatòn’ Añahare, hamenteañe o nampitamà’e aman-droaeo, 9 naho fiferenaiñañe ty handrengea’ o kilakila’ ndatio an’ Andrianañahare, fa hoe ty pinatetse:
Ie rengèko amo kilakila’ndatio, vaho ho saboeko ty tahina’o; ‡Sa II 22:50; Sab 18:49
10 le tinovo’e ty hoe:
Mitroafa rebeke am’ ondati’eo ry kilakila’ ondatio.§Its 32:43
11 ty tovo’e ka:
Mandrengea i Talè ry kilakila ondatio, misaboa aze ry hene ondatio.*Sab 117:1
12 le tinovo’ Isaia ty hoe:
Hitotsake ty vaha’ i Jese le hitroatse re hifehe o fifeheañeo,
ie ty fitamà’ o kilakila’ndatio. †Ies 11:10
13 I Andrianañaharem-pitamàñey abey ro handifotse anahareo an-drebeke naho an-kanintsiñe am-patokisañe, hampipea’e fitamàñe añamy haozara’ i Arofo Masiñey.
Mpitoro’ o kilakila’ndatio
14 O ry longo, iantofako ty ama’ areo, te pèa hasoa naho lifo-kilala, hifanoroa’ areo. 15 Teo ty nahasibehako an-tsokitse, haniahiako anahareo indraike, i falalàñe natolon’ Añahare ahikoy, 16 ho mpitoro’ Iesoà Norizañey amo kilakila’ ndatio; mitoloñe ho mpisoro’ i talily soan’ Añaharey, soa te ho no’e ty añengaeko o kilakila’ ndaty navahe’ i Arofo Masiñeio. 17 Toe nanjo ty hirengeako am’ Iesoà Norizañey amo raha mioza aman’ Añahareo, 18 fe tsy vaniko volañeñe ndra inoñ’ inoñe tsy nanoe’ i Norizañey añamakoo, le ty hampivohotse o kilakila ‘ndatio an-tsaontsy naho am-pitoloñañe, 19 ami’ty haozara’ o viloñe naho raha tsitantaneo, ami’ty hafatrara’ i Arofo Masiñey. Aa le boak’ Ierosaleme pak’ amparipari’ Ilirikiona añe ty nitaroñeko ami’ty hafonira’e ty talili-soa’ i Norizañey. 20 Izay ty nimaneako fitaroñe i talili-soay an-tane mboe tsy nahajanjiñe ty tahina’ i Norizañey, tsy handranjiako ami’ty mananta’ ondaty. 21 Fa hoe ty pinatetse:
O tsy nitaliliañeo
ro hahaoniñe;
vaho o tsy nahajanjiñeo,
ro haharendreke. ‡Ies 52:15
22 Beteke izay ty nanebañe ahy tsy hombàko mb’ama’ areo mb’eo.
Fisafiri’ i Paoly ty Hitilike e Roma
23 Aa ie henane zao, amy te tsy aman-toetse hitoroñako an-tane atoa ka, le ami’ty nisalalaeko taoñe maro ty hitilike anahareo, 24 le amy liako mb’e Spania añe, ty itamako hahaisake anahareo t’ie miary mb’eo, hampionjona’ areo, itika fa nifañòhahoha heike.
25 F’ie homb’e Ierosaleme añe hey hitoroñe o noro’eo. 26 Amy te nahaehake o nte Makedoniao naho o nte Akaiao ty hanolotse amo noro’e misotry e Ierosalemeo. 27 Eka, toe nampinembanembañe iareo, fa mpisongo ama’e. Aa ie nandrambe raha añ’arofo am’iareo o kilakila’ ndatio, le avaha’ iareo amo raha’ ty tane’ toio ka; 28 ie nañeneke izay naho fa vinoli-tomboko ho am’ iareo i mahakamay, le hiary mb’ama’ areo naho mb’e Spaina añe. 29 Fantako t’ie pok’ ama’ areo ao, le hitotsake eo ami’ty hapeam-pitahia’ i Norizañey.
30 Aa le mihalaly ama’ areo iraho ry longo, ty amy Talèntika Iesoà Norizañey naho ami’ty fikokoa’ i Arofoy, ty hifanehafantika halaly aman’ Añahare ho ahy, 31 t’ie ho rombaheñe amo manjehatse e Iehodào, naho ho no’ o noro’e e Ierosalemeo ty fitoroñako ho a iareo, 32 hahafionjonako mb’ama’ areo mb’eo an-kaehake ami’ty satrin’ arofon’ Añahare, vaho hanjò hanintsin-troke ama’ areo. 33 I Andrianañaharem-pierañerañañey abey ho ama’ areo iaby. Amena.
DRAFT VERSION