1 ‑Wuwle‑nyrɔwɔ ‑ye 'mʋ, ‑Yusu 'ɔ mu 'le lele Nyɩsʋa a kayu gbo. 'Ke ɔ yɛ 'le nyɩbɛyu ꞊de gbo. Nyɩbɛyu a ‑gbɛ, 'a dabʋ 'kʋ la nɩ. 2 Bʋ nɩ 'klɛɛ 'o, ‑ye Falisi꞊tumu a nahuin, ‑ʋ nɩ 'o, ʋʋ ke gbaa 'yie, 'ʋʋ ‑Yusu 'ye, 'bɩa 'bɔ kɔ bɔ ‑wɔ nyɩbɛyu a ‑gbɛ a 'kʋɛ ‑wuwle‑nyrɔwɔ 'mʋ, ‑ɛ die nu, 'bɔ nue, ʋ 'muo ‑tɩ yɛɛ. (Falisi꞊tumu a nahuin nɔ 'nɩ, nahuon a 'kʋɛ a ‑wʋwɔ, ɛ mɔ ‑kʋaan nɩ. 'Plɩɩ Nyɩsʋa a tete nɔ 'nɩ, nahuon nɩ nu 'le ‑kʋan ‑wuwle‑nyrɔwɔ 'mʋ.) 3 ‑Ye ‑Yusu le nyɩbɛyu a ‑gbɛ nɩ, ɔ nɔ: «'Ba ye 'mʋ, ‑bo nyra 'o nahuin ‑hɛyri 'mʋ gbo!» 4 ‑Ye ‑Yusu, ɔɔ Falisi꞊tumu a nahuin wlɔn 'nɩ ꞊gba: «‑Be' Nyɩsʋa a tetee po 'le? Nahuon bɔ nu ꞊hapʋdɛ ‑wuwle‑nyrɔwɔ 'mʋ, kɔ, bɔ nu dɛ 'klan, dɛ tio‑ nu ‑tɛɛ 'le? Nahuon bɔ waa 'a 'be ‑wuwle‑nyrɔwɔ 'mʋ, ɔ 'nɩ ꞊han 'kʋ a ‑tɩ, kɔ, bɔ ‑ha 'a 'be a ‑hʋnhlʋn mɛ lɛ bʋ 'wan, dɛ tio‑ nu ‑tɛɛ 'le?» ‑Ye ʋ 'bii, ʋ nu ‑miaa. Ʋ 'die ‑hʋa, 'ke bʋ ꞊tuo ‑wɔn. 5 ‑Yusu 'ye nɩ, ‑ɛ mɔ, nahuin ꞊nʋ, 'waa 'lu a lɛ‑hielɛ nyre lɛ 'yi, kɔ, ʋ 'de nahuon ꞊de a wɔlɩ kɔ. Nɛ‑ nue, ‑Yusu 'ɔ ‑ha 'le yrʋ yigbakla, 'ɔ nyu 'ye, kɔ, 'kla 'ɔ nyo ‑wɛ ‑wliye 'yaa. ‑Ye kɛ ɔ po nyɩbɛyu a ‑gbɛ ye: «Srʋʋ ‑na dabʋ ꞊nʋ, ‑ʋ 'kʋ!» ‑Ye ɔ srʋʋ nɩ. Bɔ srʋʋ 'klɛɛ 'a dabʋ a ‑gbɛ, ‑ye ʋ 'hrɩ 'klɔ, 'ʋ bi 'o 'a dɩɔnʋ ꞊pɩ 'mʋ. 6 ‑Tɛ ‑Yusu ‑wɔ 'klɛɛ nahuon a ‑gbɛ a 'kʋɛ, ‑ye Falisi꞊tumu a nahuin a ‑gbɛ, ʋ ‑hɔn 'o 'mʋ nɩ, 'ʋ mu ‑gboligbo 'mʋ, ʋ kɔ 'kɩɩn Helɔdɩ a ꞊tumu a nahuin 'hɛɛn, 'ʋ mu ꞊tɔ lɛ ꞊mɔ wɔn, ‑tɛ bʋ di nu, ʋ 'mʋ ‑Yusu 'la.

7 ‑Tɛ dɛ a ‑gbɛ, ɛ ‑hi, ‑ye 'ke ‑Yusu mu 'le Galileblʋgba a 'yru nʋa 'mʋ, ɔ kɔ 'a ‑naagbopʋ 'hɛɛn, nahuin 'plɔplɔ 'ʋ nyo ‑wɔn kʋɛ. Nahuin a ‑gbɛ, ꞊ʋ ‑ye ‑hɔn 'le Galileblʋgba 'mʋ, kɔ ꞊ʋ ‑ye 'ʋ ‑hɔn 'le Sudeblʋgba 'mʋ, 8 kɔ Jrusrɛ 'mʋ, kɔ Yidumeblʋgba 'mʋ, kɔ 'blʋgba ꞊nʋ, ‑ɔ nɩ 'le Sudɛn a 'nike, kɔ 'blʋgbɩ ꞊nʋ, ‑ɩ ꞊glaa 'le 'dɩɛ ꞊nʋ, ‑ɛ mɔ Tilɩ kɔ Sidɔ 'hɛɛn. Nahuin 'bii ꞊nʋ, ‑ʋʋ 'le 'waa 'dɩɛ klɛ 'mʋ lɛ ‑hɔn, ‑tɔplɩ 'bii ꞊nʋ, ‑Yusu nu, nɩ‑ kɔ ‑tɩ ʋ 'wɔn. Nɛ‑ nue, 'ʋ nyo ye di. 9 ‑Ye ɔ le 'a ‑naagbopʋ nɩ, 'ke bʋ ꞊mɔɔ ꞊nɔ 'blagbe lɛ, ‑ɛ die nu, dakʋ 'bʋʋ ꞊nɔ ‑hʋnhlʋn 'mʋ lɛ kɩka, ɔ 'mue 'le wlɔn 'ya. 10 'Plɩɩ ɔ 'mʋ 'le 'yru nʋa 'mʋ mu, ɔ ‑wɔ nahuin 'plɔplɔ a 'kʋɛi. Nɛ‑ nue, nahuin 'bii, ‑ʋ kɔ 'hʋɩn a hinhren, 'ʋʋ 'kɩka, 'ʋ nyo 'o 'hʋɩn 'mʋ ꞊gbee, 'ɛ nɩ nahuon, ɔ 'mʋ ‑Yusu lɛ 'tʋ, 'a 'kʋɛ 'mʋ ‑wɛ. 11 'Waa 'bie ꞊nʋ, ‑ʋ kɔ ke 'mʋ 'kuo ‑hʋɩn nɩ 'o, 'bʋ 'yo, ‑ye ʋ bla gbo kwlɩ, 'ke 'o ꞊nɔ ye, kɔ, 'ʋʋ 'le win 'le 'yaa 'dɔ, ʋ nɔ: «‑Mɔ mɔ Nyɩsʋa a 'Yuu nɩ.» 12 Kɛɛ ‑ye ‑Yusu nyu 'le ‑wɔn 'nɩ 'prɛɛ, 'ke 'le win 'yaklɩ 'kwli 'mʋ, 'ke ʋ nɩ ꞊tui 'le nahuon ꞊de ye, nahuon a gblo tio‑ bɔ 'ya 'mʋ.

13 Dɛ a ‑gbɛ, ‑tɛ ɛ ‑hi, ‑ye 'ke ‑Yusu 'ya 'le dʋgba ꞊de 'lu. ‑Ye nahuin ꞊nʋ, ɔɔ ‑hʋa ‑bʋ 'ya 'a ‑wɔnnaanyʋ 'mʋ, nʋ‑ ɔ da, 'ʋ mu 'o ꞊nɔ 'hʋɩn 'mʋ. 14 Ʋ mɔ nahuiin ‑pu ꞊tu 'o 'hɔɔn nɩ. Nʋ‑ ɔ ‑ha 'le du 'mʋ, 'ɔ nuu ꞊nʋ 'a ‑wɔnnaanyʋ 'mʋ, ‑ɛ die nu, ʋ 'muo 'o 'hʋɩn 'mʋ nɩ ti a pɛpɛ, kɔ, ɔ 'mu le, 'ke bʋ pue nahuin 'a ꞊hapʋtitie, 15 kɔ, ɔ 'mʋ ꞊nʋ 'klɩ ‑nyi, 'ke bʋ bla 'kuo ‑hʋɩn lɛ, ‑ɔ nɩ 'o nahuin ke 'mʋ. 16 'A ‑wɔnnaanyʋʋ ‑pu ꞊tu 'o 'hɔn a ‑gbɛ, 'waa 'dʋɩ, ɩ nɩ‑ ‑gbo: Simɔ, ɔ ꞊tue Piɛlɩdʋ, 17 kɔ Sebede a 'yuo꞊pli, ‑ʋ mɔ Sakɩ, ɔ kɔ 'a 'dɩayu Saan 'hɛɛn. ‑Yusu ꞊tue ꞊nʋ Bʋanɩsɛsɩdʋ, ‑ɛ ꞊hɛn 'nyrɛ 'yuo꞊pli, ‑ʋ 'we ꞊nɔ ‑tɛ ye; 18 kɔ Adre, kɔ Filipʋ, kɔ Batelemi, kɔ Matie, kɔ Toma, kɔ Sakɩ, ‑ɔ mɔ Alʋfe a 'yu, kɔ Tade, kɔ Simɔ. Simɔ a ‑gbɛ, 'ke ɔ nɩ 'le nahuin ꞊nʋ ‑hɛyri, ‑ʋ 'nɩnɩ ‑hʋa Romakʋɛ; 19 kɔ Judɩa Yisikalio. Nɔ‑ mɔ nahuon ꞊nʋ, ‑ɔ di ‑Yusu 'a yraanyʋ kwa po.

20 ‑Tɛ dɛ a ‑gbɛ, ɛ ‑hi, ‑ye 'ke ‑Yusu mu 'le kayu gbo, ɔ kɔ 'a ‑naagbopʋ 'hɛɛn, kɛɛ, nahuin 'plɔplɔ 'ʋ ꞊glaa 'le lele ꞊nɔ. Ɛ nue, ʋ 'nɩ kɔ ꞊le 'hru, 'ke bʋ di dɛ. 21 ‑Tɛ 'a 'dʋkʋɛ 'wɔn dɛ ꞊nʋ, ‑ɛɛ 'lu ‑wɔn mue, ‑ye ʋ ‑mɛ ‑ye, ʋ da, 'a 'lu ‑hɔn 'o wlɔn 'mʋ 'hru. Ɛ nɛ‑ nue, 'ʋ bi 'hru wlɔn, 'ke 'o 'a gbʋgba a ‑ta 'mʋ.

22 Nyɩsʋa a teteitɔɔnyʋ ꞊de, nʋ‑ ‑hɔn la 'le Jrusrɛ 'mʋ, ʋ nɔ: «‑Yusu ‑gbo, Bɛsebulɩ, ‑ɔ mɔ 'kuo ‑hʋɩn a nyɩgblaka Satan, nɔ‑ nɩ 'o ꞊nɔ ke 'mʋ, nɔ‑ɔ ꞊nɔ 'klɩ ‑nyi, 'ke bɔ bla 'kuo ‑hʋɩn lɛ, ‑ɔ nɩ 'o nahuin ke 'mʋ.» 23 Bʋ po 'klɛɛ lɛ, ‑ye ‑Yusu dʋ nɩ, 'ɔɔ ‑talʋdʋɩ nu, 'ɔ nyu klɛ ‑hɩhɩa, ɔ nɔ: «꞊Be Satan, ɔ ‑wɛ 'le bɔ bla 'a dɩɔnʋ lɛ nɩ? 24 ꞊Bo pue dɛ ye: 'Ke 'le 'blʋgba 'kwli 'mʋ, nahuin 'bʋ 'bɛ ꞊tɩɔ lɛ, ‑ye 'blʋgba a ‑gbɛ, ɔ bi ꞊hlɔn. 25 'Ya 'o lele 'lu, kayugbokʋɛ 'bʋ 'bɛ ꞊tɩɔ lɛ, ‑ye kayu a ‑gbɛ, ʋ ‑gbɛ lɛ. 26 ‑Ye 'klɛɛ, Satan 'bɔɔ 'a dɩɔnʋ ye ‑wɔn, ‑ye ɔ 'die 'le ‑wɛ bɔ nu dɛ ꞊de, 'a 'klɩ di gbo 'nɩ ‑wɛ. 27 Ɛ 'we ꞊nɔ ye, nahuon ꞊de 'die 'le ‑wɛ bɔ pa 'le 'klɩnyɔ a kayu gbo, ɔ 'mʋ 'a ‑tɔplɩ 'yri, 'bɩa 'bɔ 'de 'klɩnyɔ a ‑gbɛ mʋa ‑tɩtɛ. 'Bɔ mʋɔ 'klɛɛ, ‑ye ɔ ‑wɛ 'le bɔ 'yri 'a kayu a ‑tɔplɩ 'bii nɩ.

28 'Nɩɩ 'a mʋ 'nɩ le ‑tɛɛ, Nyɩsʋa ‑wɛ 'le bɔ 'wʋwla nahuin a dɛ 'kuku 'bii nɩ, ꞊betɩ bʋ poo Nyɩsʋa tanɩ lɛ. 29 Kɛɛ, nahuon ꞊nʋ, ‑ɔ di Nyɩsʋa a ‑Hihiu tanɩ lɛ poo, Nyɩsʋa 'die 'le ‑wɛ bɔ 'wʋwla 'a dɛ 'kuku a ‑gbɛ gbe, ‑ɛ nue, ɔ nu dɛ 'kuku, ‑ɛ hie 'klɔ.»

30 Kɛ ‑Yusu nu la 'waa klɛ‑hɩhɩalɛ, ‑ɛ nue, ʋ nɔ 'nɩ, 'ku ‑hʋan nɩ 'o ꞊nɔ ke 'mʋ.

31 'Ke ʋ nɩ 'le kayuu ‑do a ‑gbɛ gbo, 'a 'dii kɔ 'a 'dɩayuo nyɩbɛpʋ 'hɛɛn 'ʋ nyre 'o. 'Ke ʋ hree 'o ‑patʋ 'mʋ, 'ʋ le nahuon, 'ɔ mu ‑Yusu da wɔn. 32 'Dai nahuin nɩ gbo, 'ʋ ꞊glaa 'le ꞊nɔ. ‑Ye kɛ ʋ nyo ye po: «'Ye kɛ, ‑na 'dii kɔ ‑na 'dɩayuo, 'ke ʋ nɩ 'le ‑patʋ 'mʋ, ‑mɔ ʋʋ da.» 33 ‑Ye ɔ nɔ: «꞊Ʋ ‑ye mɔ ‑wɛ 'na 'dii kɔ 'na 'dɩayuo,» 34 'ɔ 'ba 'yii ye 'mʋ, 'ɔ 'ye nahuin ꞊nʋ, ‑ʋ nɩ gblɛ, ‑ʋ ꞊glaa 'le ꞊nɔ, ‑ye ɔ nɔ: «Ba 'ye kɛ, nahuin ‑gbo, nʋ‑ mɔ ‑wɛ 'na 'dii kɔ 'na 'dɩayuo. 35 Nahuin ꞊nʋ, ‑ʋʋ Nyɩsʋa a kewɛɛnlɛ nu, nʋ‑ mɔ ‑wɛ 'na 'dɩayuo kɔ 'na 'dii.»