2
Maria nahoris Yesus
(Mateus 1:18-25)
1-2 Baa oras Kireneus dadi gubernur iha Siria, Liurai Agustus nasai ukun naꞌak, “Ema hotu-hotu mak iha ukunrai Roma liman laran, ida-idak musti fila baa natama naran iha leo huun!” Oras nia, oras dala uluk bodik ukunrai Roma sura hutun-renu nunia. 3 Tan nia, ema hotu-hotu fila baa leo huun atu natama naran.
4-5 Baa oras nia, noo mane ida naran Yusuf. Nia nein iha leo Nasaret iha rai Galilea. Nia sasudin tiꞌan no feto nurak ida, naran Maria. Maria nia noꞌi koꞌus. Tan Yusuf nia, Naꞌi Daud husar-binan, nia musti fila baa natama naran iha Naꞌi Daud niakaan kota Betlehem iha rai Yudea.
Tan lia nia, sia rua baa kota Betlehem. 6 Toꞌo nebaa, Maria loron nahoris moos toꞌo mai. 7 Iha Betlehem nia, noo uma bodik ema hein heik, mais sia la netan fatik iha nia. Tan baa nia, sia tama baa natar ida laran. Iha nia Maria nahoris oa ulun, oa mane ida. Maria nafuꞌut Nia nodi tais, hotu natoba baa bibi no karau haan fatik.
Naꞌi Maromak natoꞌo lia diꞌak baa makbalin sia
8 Baa kalan nia, makbalin naꞌin hira daka bibi malae iha kota luan.
9 Teki-tekis, sia naree Maromak Niakaan makbukar laleꞌan ida. Hotu, Naꞌi Maromak kroman naksinak baa sia, toꞌo sia nataꞌuk liu. 10 Mais makbukar nia katak naꞌak:
“Keta hataꞌuk! Rona mai! Haꞌu kmai katak lia diꞌak baa emi. Ema hotu-hotu mak rona lia neꞌe, nanis neon diꞌak.
11 Lia diꞌak nia nuneꞌe:
Baa loron neꞌe, feto ida nahoris Kristus iha Betlehem, Naꞌi Daud niakaan kota!
Kristus nia, mak Naꞌi Maromak nameno tiꞌan hori uluk.
Naꞌi Maromak solok Nia mai atu sori ema nosi sala!
Nia neꞌe, mak ema atu temi naꞌak ‘Ulun’!
12 Emi bele hatene Nia nuneꞌe: Emi atu hasoru kau mea oan ida mak inan nafuꞌut nodi tais. Nia toba iha bibi no karau haan fatik laran.”
13 Teki-tekis, Maromak Niakaan makbukar laleꞌan lear mai namutuk no makbukar uluk nia. Sia tonu-naboot Naꞌi Maromak nodi nananu naꞌak,
14 “Ita foti-hahaas Naꞌi Maromak naran!
Nia mak nabesi aan kaer ukun iha laleꞌan mak aas kaliuk.
Nia atu foo dame baa ema raiklaran
mak kona baa Niakaan neon!”
15 Hotu makbukar sia fila baa laleꞌan. Makbalin nia sia dale baa malu naꞌak, “Hei! Mai ita baa Betlehem atu haree oa nia lai! Tan Naꞌi Maromak solok lia nia baa ita tiꞌan.”
16 Hotu, sia lai-lais baa Betlehem. Toꞌo nebaa, sia netan Maria no Yusuf no kau mea oan mak noꞌi toba iha bibi no karau haan fatik laran.
17 Naree oa nia, sia moos katak baa ema naꞌak, “Ohin nia, Maromak Niakaan makbukar laleꞌan sia katak lia oa neꞌe baa ami!” Hotu sia katak lia nia toꞌo mohu.
18 Ema hotu-hotu mak rona, blaar karin. 19 Mais Maria rai lia nia sia baa neon laran, nodi naneo atu buka lia nia sia isin. 20 Makbalin sia naree notu oa nia, sia moos fila nikar baa siakaan bibi malae. Sia tonu-naboot Naꞌi Maromak naran nodi sera dodan baa Nia, tan saa mak sia rona no sia naree, manesak no saa mak Maromak Niakaan makbukar dale tiꞌan baa sia.
Sia nanaran kau mea oan nia, Yesus
21 Kau mea oa nia, otas loron walu tiꞌan, sia nalo lahan hamane aan baa Nia, tuir ema Yahudi siakaan ukun-badu. Niakaan inan no aman nanaran Nia, ‘Yesus’. Naran nia mak uluk makbukar laleꞌan katak kedan baa oras Yesus inan sei la koꞌus Nia dauk.✡Lukas 1:31; Ukun-badu Naꞌilulik 12:3
Yusuf no Maria nodi oan Yesus baa Uma Hamulak Huun
22 Ukun-badu ida nosi Bei Musa naꞌak, feto mak nahoris loron haat nulu tiꞌan, musti nalaꞌok adat hamoos aan iha Uma Hamulak Huun. Hodi nunia, nia bele tama nikar baa ema Yahudi siakaan uma hamulak. Tan nunia, Yusuf no Maria baa nalaꞌok adat nia iha kota Yerusalem. Sia moos nodi siakaan oan Yesus baa Uma Hamulak Huun, atu latan baa Naꞌi Maromak.✡Ukun-badu Naꞌilulik 12:1-8 23 Hodi nunia, sia tuir Naꞌi Maromak ukun-badu mak naꞌak, “Feto mak nahoris oa ulun mak mane, musti latan oan nia baa Naꞌi Maromak.”✡Ema Israꞌel Sai Nosi Mesir 13:2,12 24 Tuir Naꞌi Maromak ukun-badu, kalo inan no aman latan oan baa Naꞌi Maromak, sia musti sera lakateu inan ida no aman ida, lale, lakateu sina tulan matan rua. Yusuf no Maria moos nalaꞌok ukun-badu nia.✡Ukun-badu Naꞌilulik 12:6-8
Katuas Simeon nasee kedan naꞌak, kau mea oan Yesus nia, Kristus mak Naꞌi Maromak nameno tiꞌan
25-26 Natoon baa nia, noo katuas ida naran Simeon. Nia nein iha kota Yerusalem. Nia ema moon mak beer Naꞌi Maromak. Kmalar Lulik katak kedan baa nia tiꞌan naꞌak, nia atu naree uluk Kristus lai, foin nia bele mate.
27 Baa oras Yesus inan no aman nodi Nia baa Uma Hamulak Huun atu latan baa Naꞌi Maromak, Kmalar Lulik moos nalaꞌo nodi Simeon baa. 28 Oras naree oan nia, katuas Simeon nakaꞌu nola, nodi tonu-naboot Naꞌi Maromak naꞌak:
29 “Haꞌu ktonu Naꞌi Maromak!
Tan Nia nalaꞌok mamenon baa haꞌu tiꞌan.
Oras neꞌe, Naꞌi Maromak bele nabusik haꞌu,
nebee haꞌu kmate no-nook ona.
30 Haꞌu karee tiꞌan Ema mak Naꞌi Maromak solok mai
atu sori ita nosi itakaan salan!
31 Naꞌi Maromak nakara nodi oan neꞌe
atu sori ema klubun hotu-hotu.
32 Nia atu dadi hanesan kroman.
Nia atu nodi kneter bodik Naꞌi Maromak eman Israꞌel sia.
Nia moos atu natudu Naꞌi Maromak dalan loos
baa ema seluk sia.”✡Yesaya 42:6, 49:6, 52:10
33 Rona nola nunia, Yusuf no Maria blaar karin tan katuas Simeon nasee nunia. 34 Hotu, Simeon nusu matak-malirin bodik sia. Nia moos katak kedan baa Maria naꞌak, “Yesus inan! Ema waꞌin iha Israꞌel neꞌe atu dudu sees oan neꞌe. Mais nosi ikus, siakaan hahalok nia atu nahonu fila sia. Oan neꞌe moos atu nalo ema waꞌin neon boot. 35 Hodi nunia, Naꞌi Maromak loke hotu ema neon. Mais rona! Ina atu hetan susar todan, hanesan surik naruk sona borut okaan hirus.”
Ferik Hana sera dodan baa Naꞌi Maromak, tan Yesus
36-37 Iha Uma Hamulak Huun nia moos, noo ferik ida naran Hana. Niakaan otas tinan walu nulu resin haat tiꞌan. Aman, naran Fanuel, nosi ema hunun Aser. Ferik nia foin noo laꞌen tinan hitu, laꞌen mate nela tiꞌan. Ferik nia moos Maromak makoꞌan ida mak namulak no nalirin aan loron-kalan iha Uma Hamulak Huun.
38 Baa oras Simeon dale baa Yusuf no Maria, ferik nia mai kre-reꞌis nanono sia. Nia rona Simeon dale nunia, nia tonu-naboot Naꞌi Maromak. Nia moos dale kedan lia Yesus bodik ema hotu-hotu mak sei noꞌi nei-nein siakaan Naꞌin mak Naꞌi Maromak nameno atu solok mai sori ema Israꞌel.
Yusuf no Maria nodi oan fila baa leo Nasaret
39 Yusuf no Maria nalaꞌok mohu Bei Musa Ukun-badu sia iha kota Yerusalem tiꞌan, sia moos fila baa siakaan leo Nasaret iha rai Galilea.✡Mateus 2:23 40 Hotu Yesus hetak boot, hetak biit, hetak matenek toꞌo natene lia waꞌin. Naꞌi Maromak moos natudu laran diꞌak baa Nia.
Yesus iha Naꞌi Maromak Niakaan Uma Hamulak Huun
41 Sura tinan, Yusuf no Maria baa kota Yerusalem atu tuir nadahur Paska.✡Ema Israꞌel Sai Nosi Mesir 12:1-27; Hanoin Hikar Dalan Moris 16:1-8 42 Dala ida, baa oras Yesus otas tinan sanulu resin rua, sia baa kota Yerusalem bele-bele atu tuir dahur nia. 43-44 Dahur Paska nia hotu tiꞌan, Yusuf no Maria fila baa Nasaret no ema lear mak fila bele-bele baa rai Galilea. Sia la natene naꞌak, Yesus sei nein iha Yerusalem. Sia naneo naꞌak, Nia laꞌo namutuk no Niakaan mamaluk sia. Mais toꞌo loro malirin, sia sei la naree Nia dauk. Hotu sia buka baa-mai iha siakaan familin no mamaluk sia. 45 Mais sia la netan, sia fila nikar baa buka Nia iha Yerusalem.
46 Toꞌo nebaa, sia buka Nia loron tolu laran, foin netan iha Uma Hamulak Huun. Nia noꞌi taruka lia fuan no ema manorik ukun Yahudi sia. 47 Ema hotu-hotu mak tuur nanono, blaar karin, tan Nia natene tebe-tebes Hakerek Moon isin. Nia moos nataa sia diꞌa-diꞌak. 48 Naree nola nunia, Yesus inan no aman moos blaar. Hotu inan katak naꞌak, “Yesus! Tan saa O masusar ami nuneꞌe? Ami rua O aman benar karin tiꞌan buka O!”
49 Mais Yesus nataa naꞌak, “Tan saa ina no ama hasusar aan buka Haꞌu? Musti hatene! Haꞌu koo serwisu iha Haꞌukaan Ama Uman.” 50 Mais sia la natene Niakaan hakara nia.
51 Nunia hotu, sia fila nikar bele-bele baa Nasaret. Yesus moris tuir inan no aman harukan. Niakaan ina rai lia nia sia hotu-hotu baa neon laran. 52 Nunia ona, Yesus hetak boot, hetak matenek. Nia moos hetak kona baa Naꞌi Maromak neon no ema raiklaran neon.✡1 Samuel 2:26; Lia Fuan Tateꞌan 3:4