Hechos de los Apóstoles
L̇l̇ëbo shäryara Sbö tjl̈õkwo roy l̈agaga Jesús ãskarë
Kjibokwo ëre sorë
Domer shäng kjl̈ara ko Lucas. E no dwl̈omnega. Woyotjl̈ĩkoba ga e judío l̇l̇ëm wl̈eniyo. Domer shäng kjl̈ara obi ko Teófilo. Woyotjl̈ĩkoba ga e Roma so, domer tjwl̈õ ara wl̈eniyo bakoe.
Bäm go ga kjibokwo ko Evangelio según Lucas l̈i tara Lucasdë Teófilo kong, Jesús roy l̈i miyde pjl̈ú wl̈o. Kjibokwo ërera jyã tara ba kong, l̇l̇ëbo weno e irgo l̈i miyde pjl̈ú bako wl̈o. Jesús to jem kjok dogo irgo ga Sbö Sëya ichara ba nopga kong, ga l̇l̇ëbo shäryara ara epga tjok sorë l̈i tara ba kong. Tjl̈ẽno eni Hechos 1.8 go. Tjl̈ẽ ga «Gueniyo ga Sbö Sëya tjwe bomi go kjl̈arashko kjl̈arashko, ga pjãy kong dbo twe kësbange. Kjroromi ga pjãy opshik tja ĩnomi, kuromi l̈i sorë roy l̈ë Jerusalén kjokyo, Judea kjokyo, Samaria kjokyo, äär jong kjok kjwang jĩkong bakoe.»
E irgo ga Pablo öötong beno shäng Jesús tjl̈õkwo kjraga, ga Jesús roy pjl̈ú l̈ara kjok shto obl̈ë obl̈ë sorë l̈i tara ba kong bakoe. Eshkoshko ga Lucas jëktong shäng parkë ba tjok, tak pjang Colosenses 4.14 go, Filemón 24 go, 2 Timoteo 4.11 go sorë l̈i eni. Eni ga l̇l̇ëbo shäryara Sbörë Pablo tjok l̈i ĩna om go, ga jyã tara kjibokwo ëre go.
1
1-2 Teófilo, kjibokwo toror bäm go l̈i, e Jesús roy l̈okl̈o. Shäng kjok ëre kjing go obishko ga l̇l̇ëbo shäryara, pina kës l̈i toror beno pjang eshko. Jemdë kjok dogo l̇l̇ëm obishko ga jëk shäng Sbö tjl̈õkwo roy l̈agaga kjrara beno tjeng ba ãska l̈i tjok. Ga kong l̇l̇ëbo shärye wl̈o l̈i l̈ara beno ba kong. L̈eshko ga kjimtara Sbö Sëyarë.
3 Zröraba irgo ga weno shäng Sbö tjl̈õkwo roy l̈agaga l̈i tjrëko obi, ga l̇l̇ëbo shäryara obl̈ë obl̈ë, miyde l̈ok e go wl̈o ga shäng së obi. Dbar kop sak pkëng (40) tjrëko ga ol̈ö ga wen shäng ba tjrëko, ga ĩna l̈ok. Eshko ga Sbö ber no pjl̈uyo sorë l̈i roy l̈ara beno ba kong. 4-5 Pjl̈ara ga sök ië ba tjokshko ga tjl̈ẽ ba kong ga «Pjãy go Sbö Sëya iche bor Datarë tjwe, l̈ara jl̈õkoyo sorë l̈i eni. E l̈anyotkoror bomi kong tjän. Juan, e no wono di goshko. Gueniyo ga dbar kjwöbö obi ga pjãy go Sbö Sëya iche Sbörë tjwe ber kësbang bomi tjok. Pjãy opshik Jerusalén kjokyo dwayo l̇l̇ëm, e shäryono eni pjir guing» l̈e.
Jesús to jem kjok dogo
6 Pjl̈ara ga töno l̈öng Jesús tjokshko ga tjl̈ẽ ba kong ga «Tjl̈apga, ¿eni tjok ga Israel tjëyoga döp ber ichaga tjëyoga obl̈ërë ame dbaryo l̈i öötongde?»
7 «E miydaga pjãydë l̇l̇ëme. Dbar l̈ëmi l̈öng l̈i, e miydaga Data Sbörë. L̇l̇ono l̈e ga eshko jã. 8 Gueniyo ga Sbö Sëya tjwe bomi go kjl̈arashko kjl̈arashko, ga pjãy kong dbo twe kësbange. Kjroromi ga pjãy opshik tja ĩnomi, kuromi l̈i sorë roy l̈ë Jerusalén kjokyo, Judea kjokyo, Samaria kjokyo, äär jong kjok kjwang jĩkong bakoe» l̈e ba kong.
9 Tjl̈ẽno eni pjir ga ĩya l̈ok ga Jesús söra Sbörë to jem kjok dogo, ga pjäng shrono kjrina eshko, jek yõw e roshko jëktëng erä, ga ĩna l̈ok ame. 10 Kjok dogo ĩya beno l̈öng wopro ga domerga wen l̈öng do pjök ba soshko, shwong ko pjl̈ubl̈úne. 11 Ga tjl̈ẽ l̈ok ba kong ga «Galilea sopga, ¿kjok dogo ĩmi l̈öng kjër l̇l̇ënoro? Jesús ĩnomi söraba to jem kjok dogo bomi tjrëko dwayo sorë ga l̇l̇ono ga ter tjwe iröng eni bakoe» l̈e.
Matías kjrara l̈ok beno shäng Judas shtoshko
12 Kjok eshko l̈i ko Olivos dl̈upyo. E irgo ga Sbö tjl̈õkwo roy l̈agaga Jesús ãska to ter l̈ok iröng Jerusalén kjokyo. Olivos dl̈upyo l̈i ber äär Jerusalén kjokyo wl̈o ga wop tjok eröe. Woshtozl̈ong dbaryo ga judíoga jëk l̈ok wop eni eröe. 13 E irgo ga ter shrono l̈öng Jerusalén kjokyo l̈ishko ga opzrëno jek u jong kjwara eshko l̈i roshko, ga tjyono jem kjomo, ga beno l̈öng eshko. Nopga l̈öng eshko l̈i ko eni:
Pedro;
Santiago;
Juan;
Andrés;
Felipe;
Tomás;
Bartolomé;
Mateo;
Santiago, e Alfeo wa;
Simón, e zelote;
Judas, e Santiago wa.
14 Dbar kjwobi go ga epga tön l̈ok tjë jĩkong eshko syõshtë Sbö kong Jesús l̈ëmga tjok, ba mekë María tjok, wal̈ëga obl̈ë tjok bakoe.
15 Eni ga dbar kjwara ga epga töno l̈öng kop sak dbäw kjingsho sak pjök (120). Eshko ga Pedro kojono shäng ba pjeyoga l̇l̇amo l̈öng l̈i tjrëko, ga tjl̈ẽ ba kong ga 16-17 «Pjeyoga, Judas, e kjrara Jesúsdë jëk shäng borwa tjok wl̈o, ga parkono borwa tjok bakoe. Gueniyo ga Jesús shakoba wl̈o ga pingga erë, ga beno Jesús roy l̈aga ame. Dënashko ga tjl̈õkwo l̈ara Sbö Sëyarë Judas kjĩshko, tjl̈õkwo l̈i tara Pjl̈u Daviddë. E kjĩshko ga tjl̈õkwo l̈ara l̈i shäryono eni tjän.
18 »(L̇l̇ëbo owa shäryara Judasdë l̈i potjwl̈ẽkkl̈o dburyo l̈i go ga kjok tjwl̈ẽna kjrina. Eshko ga l̈ono jer jong kä l̈ëkong, bögwo dl̈oktong, l̇l̇angkogro tuktong drete. 19 Nopga l̈öng Jerusalén kjokyo l̈i, e miydara l̈ok pjir, ga kjok eshko kowara l̈ok Acéldama, l̈ëy bi tjl̈õkwo go ga “Srëng kjokyo.”)
20 »Dënashko ga kjibokwo ko Salmos l̈i tak beno pjang eni:
»“Ba u jong l̈ishko, e kworkwë ber buk
kjok ëye l̇l̇ëmshko.
Ëye ber sök eshko ame.”*Salmo 69.25.
»Eshko ga tak pjang eni bakoe:
»“Ba pak, e ber sogo obl̈ë.”†Salmo 109.8.
21 »Eni kuzong ga domer kjrërwa kjl̈ara parkë ber shäng Judas ãska. Jũshko ga domerga l̈öng, jëktong l̈öng bi tjok bebi, Tjl̈apga Jesús shäng bi tjok l̈ishko. 22 Jesús wara Juandë l̈i ĩna l̈ok. E irgo ga jëktong l̈öng ba tjok, ga dbaryo öötong söra to jem kjok dogo ga ĩna l̈öng obie. Woyde ga kjwepga kjwe kjl̈ara tek ber borwa tjok. Eni ga l̇l̇ëbo ĩna, kura l̈i roy l̈e borwa tjok wl̈o» l̈e.
23 Eni ga kjrara l̈ok do pjök. Kjl̈ara ko José, kowëba Barsabás, kowëba Justo bakoe. Kjl̈ara obi ko Matías. 24 Eshko ga syõshtono l̈ok Sbö kong, tjl̈ẽ ga «Tjl̈apga, tjawa uunkong wotjl̈ĩk l̈öng borwa pjl̈úshko sorë l̈i, e miydëp pjire. Nopga do pjök ëre kjrorop kjone dey ga pĩs borwa kong. 25 E ber bop tjl̈õkwo roy l̈aga Jesús ãska. Pak l̈i, e Judas ĩ, gueniyo rayara to ba shdũzl̈ong kjokyo l̈ishko» l̈e.
26 Eni ga l̇l̇ëbo jyãgl̈o shira l̈ok, ga jyã l̈ono beno Matías kong. Eshko ga Matías beno shäng Sbö tjl̈õkwo roy l̈agaga Jesús ãska dogl̈o sak kjwara kjingsho kjl̈ara (11) l̈i kjl̈arayo.