32
1 Uwe mwanya, otegheeleli̱ye na kutui kwawe ebi nku̱bu̱gha,
uwe nsi, ooghu̱we bighambo bya kanu̱wa kanje.
2 Oleke ebi nkwegheesi̱ya bibe nga mbu̱la ekutoona,
ebi nku̱bu̱gha bibe nga ki̱me,
nga mbu̱la nkee ekutoona haa bu̱si̱ngo buunabwana
kandi nga bitonda-tondi̱ bikutoona haa bi̱si̱ngo.
3 Nkulangilila li̱i̱na lya Mukama.
Musinde bukulu bwa Luhanga waatu!
4 Niiye Kikuka kyamaani̱ kandi akukolagha ebi̱hi̱ki̱ye,
bikoluwa biye byona bilimu bwengani̱ja.
Ni Luhanga mwesighibuwa kandi wamajima,
ali na bwengani̱ja kandi ahi̱ki̱li̱i̱ye.
5 Bhaatu bantu baa I̱saaleeli̱ bakeebhi̱i̱ya ewaa Mukama
kandi haabwa nsobi̱ syabo tabakyali baana be,
ni mujo ghwa bantu babhi kandi batali beesighibuwa.
6 Enu̱we bantu badhoma kandi abateetegheleei̱ye,
niikuwo mukutwalikani̱yagha mutiyo Mukama?
Taniiye so waawe oghu akakuhanga?
Taniiye muhangi̱ waawe oghu akaku̱gu̱mi̱ya kandi akufoola ehanga?
7 Muusuke ebyabaayʼo hambele
kandi mweli̱li̱kanʼo mijo ya bwile obwasaaye.
Mu̱bu̱u̱li̱ye babyaye baanu na bantu banji bakulu,
bakubaghambila ebyabaayʼo.
8 Obu wa Eghulu Munu aatambulani̱i̱ye nsi bantu bʼomu mahanga
nga bugwetuwa bwabo,
bantu aba aabateelʼo mitaano hambali bakuukala.
Aakola eki kusighikila haa muhendo ghwa bantu baa I̱saaleeli̱.
9 Bhaatu Mukama aakomamu bantu be baa mbaghani̱ja,
aafoola Yakobbo kuba bugwetuwa buwe.
10 Aamusanga mu elungu lyomi̱ye
kandi elilimu mwegha ghwamaani̱.
Aamulinda kandi aamuloleelela,
nga mboni̱ ya li̱i̱so liye.
11 Aaba ngoku kibebe kikubungilagha eegu̱u̱li̱ ya kisui kyakiyo,
bwana bwakiyo mbwahalala
kibubhakila na mapapa ghaakiyo,
niikuwo aabali̱ndi̱ye atiyo kutaghuwa.
12 Mukama enkaha niiye akabahikila,
taaliyo luhanga onji oghu akamukoonela.
13 Aaleka baatwala bi̱i̱kalo bya haagu̱u̱li̱ ya bwena mu nsi eghi
kandi baaliya byokuliya ebyeli̱ye mu misili.
Baaliya bwoki obwalu̱ghagha mu bikuka
kandi baatunga magita ku̱lu̱gha mu bikuka byomiiye kwonini.
14 Baanuwa mati̱i̱ti̱ ghaa mbu̱li̱ kandi mata ghaa nte.
Baaliya nyama sya bisabu bya ntu̱u̱li̱ sya ntaama, nte na mbu̱li̱ sya Bbasaani.
Baaliya ngano esemeeye kwonini
kandi baanuwa vi̱i̱ni̱ ya mi̱jaabbi̱i̱bbu̱.
15 Bantu baa I̱saaleeli̱ aba baafooka baguudha kandi baaba bajeemi̱.
Baaliya byokuliya bisemeeye kandi baaneeta,
du̱mbi̱ baalu̱ghʼo Luhanga oghu akabahanga.
Baabhenga oghu ali Kikuka kya kujunuwa kwabo.
16 Kulami̱ya baaluhanga banji kwaleka aabaghilila etima
kandi bintu bi̱bhi̱i̱hi̱ye baakolagha byaleka aasaaliluwa.
17 Baahongela bi̱li̱mu̱ ebitali baaluhanga,
na baaluhanga bahyaka aba batamani̱ye,
baaluhanga aba baataata baanu bataalami̱i̱ye.
18 Otaafuwʼo Kikuka oghu akakuhanga.
Waabululuwa Luhanga oghu ali ntandiko ya bwomi̱i̱li̱ bwawe.
19 Obu Mukama aaboone eki aababhenga,
nanga batabani̱ be na bahala be aba bakaleka aasaaliluwa.
20 Aaghila ati, “Tankutodha kukoonela bantu aba,
niikuwo ndole ngoku bakuba,
nanga ni mujo ghwa bantu babhi
kandi tabali na bwesighibuwa.
21 Baaleki̱ye naaba nʼetima nanga ebo kulami̱ya ekitali Luhanga.
Naasaaluuwe nanga ebo ku̱heeleli̱ya bisasani̱.
Nkuleka babe nʼetima haabwa bantu abatali na mughaso.
Nkuleka basaaliluwe haabwa ehanga lya bantu badhoma.
22 Kusaaliluwa kwanje kukuba nga mulilo
oghu̱kwoki̱yagha ku̱hi̱ka eku̱li̱mu̱,
ghwoki̱ya bu̱li̱ kintu ekili mu nsi
kandi ghwoki̱ya na misingi ya myena.
23 Nkubaleetʼo kabhi kaa bu̱li̱ mulingo
kandi mbabhasuulile bimala byanje.
24 Nkuleka njala, mu̱swi̱ja kandi ndwala syamaani̱ sibaate.
Nkubatumila binyama byʼomu kisaka kubalu̱mba
kandi njoka sya buseguwe kubakonda.
25 Balabaatilagha haa bulemo mu nguudhe syʼomu tau̱ni̱
kandi kabhi kalababaaghʼo mu maka ghaabo.
Batabhana baabo na baana baabukali̱,
baana bato na bantu bakulu balabaatagha boona.
26 Nangubaaye mbu̱ghi̱ye ngoku nku̱hwelekeeleli̱ya bantu aba boona
kandi babaabululuwe.
27 Bhaatu tambali̱ye ngi̱ghu̱ syabo kwempanka,
mbabu̱gha ngoku baasi̱ngu̱u̱ye bantu banje
kandi baghile bati, ‘Mukama taaniiye aakoli̱ye ebi byona.’ ”
28 I̱saaleeli̱ ni ehanga elitali na kwetegheeleli̱ya
kandi tabali na magheji.
29 Nguli baabaagha bagheji, eki bangu̱ki̱kengi̱ye
kandi bamanya ekikughenda kubabʼo.
30 Muusilikale omui wa ngi̱ghu̱ sya I̱saaleeli̱,
akubhinga baasilikale baa I̱saaleeli̱ lu̱ku̱mi̱
kandi babili bahume baasilikale mutwalo ghumui,
nanga Luhanga, Kikuka kyabo akuba naababhi̱ngi̱ye
kandi Mukama naabaleki̱ye.
31 Nanga kikuka kya ngi̱ghu̱ syatu takili nga Kikuka kyatu,
eki bakimani̱ye.
32 Ngi̱ghu̱ sya I̱saaleeli̱ si̱bhi̱i̱hi̱ye nga bantu baa Sodomu na Gomola.*32:32 Bantu baa Sodomu na Gomola bakaba babamani̱ye haabwa bu̱syani̱ bwabo.
Bali nga mi̱jaabbi̱i̱bbu̱ eghi ekwanaghamu bi̱ghu̱ma bisaaliiye kandi ebili na buseguwe.
33 Vi̱i̱ni̱ yabo eli nga butuwa,
eli nga buseguwe bwa teekpe.
34 Mukama aaghila ati,
“Nimani̱ye ebi ngi̱ghu̱ esi sikubakolʼo.
Si̱ye neenini nkulinda bwile bu̱hi̱ki̱ye bwonini kufubila ngi̱ghu̱ esi.
35 Ni̱i̱si̱ye nkuhoolagha ngi̱ghu̱ kandi nsasula,
bwile bwabo bwa kughuwa buli haai ku̱hi̱ka.
Kilo kyabo kya kubona-bona kili haai
kandi kuhwelekeelela kukubahikʼo bwangu.”
36 Mukama aku̱twi̱la bantu be musango
kandi aghilile kisa baheeleli̱ya be,
akaakubona bahooye maani̱
kandi ataliyo nʼomui oghu ati̱ghaayʼo nga mu̱syana kedha wa bughabe.
37 Niibuwo aku̱bu̱u̱li̱ya ati, “Baaluhanga aba mwesighagha
kandi mufoola kikuka kya buulukilo bwanu
38 abaaliyagha bisabu bya bihonguwa byanu
kandi banuwa vi̱i̱ni̱ mubahongeeye, bali haa?
Oleke baase babakoonele
kandi babalinde!”
39 “Mumanye ngu si̱ye nenkaha ni̱i̱si̱ye Luhanga!
Taaliyo luhanga onji kuuyʼo si̱ye.
Ni̱i̱si̱ye nkwitagha kandi ni̱i̱si̱ye nkuhaagha bwomi̱i̱li̱.
Ni̱i̱si̱ye nku̱hu̱taali̱yagha kandi ni̱i̱si̱ye nkutambilagha.
Taaliyo ekikugubha kuntanga eki nkubbala kukola.
40 Nku̱u̱mu̱ki̱ya mukono ghwanje ningila nti,
‘Ngoku majima ndi mwomi̱i̱li̱ bilo byona,
41 nkutyali̱ya kihiyo kyanje kyoghiile
kandi nkolele mu bwengani̱ja.
Nkufubila ngi̱ghu̱ syanje
kandi nsasule abanjohi̱ye.
42 Bimala byanje bikutukula saghama yabo
kandi kihiyo kyanje kikwita boona abakumpakani̱ya.
Nkwita banyankomo na abahutaaye boona
kandi njombʼo mituwe ya beebembeli̱ baa ngi̱ghu̱ syanje.’ ”
43 Enu̱we mahanga ghanji, mudheedhuwe na bantu be,
nanga akufubila ngi̱ghu̱ syanu abakwitagha baheeleli̱ya be.
Akughanila bantu be bibhi byabo
kandi eeli̱ye nsi yabo.
44 Musa aasa na Yosuwa mutabani̱ wa Nu̱u̱ni̱, eegheesi̱ya bighambo byona ebili mu kilimbo eki, bantu boona banategheleei̱ye. 45 Obu Musa aamali̱ye ku̱bu̱gha bighambo ebi byona na I̱saaleeli̱ yoona, 46 aabaghila ati, “Mukwate haa mutima ghwanu bighambo byona ebi naabaghambiiye obwalo kandi mu̱byegheesi̱ye baana baanu, niikuwo beeghendeseleje kukwata bighambo byona ebili mu bilaghilo bini. 47 Tabili bighambo kwonkaha ewaanu, bhaatu bikubaha bwomi̱i̱li̱ kandi bikuleka muukale bwile bukani̱ye mu nsi eghi mukughenda kubhasuka maasi Yolodaani̱ kutwala.”
Ku̱ku̱wa kwa Musa
48 Kilo eki kyonini, Mukama aaghila Musa ati, 49 “Oghende mu myena ya Abbali̱i̱mu̱, mu ehanga lya Mowaabu, oni̱i̱ne haa mwena Nebbo oghulolaane na Yeli̱ko. Olole nsi ya Kanaani̱, eghi ndimaha bantu baa I̱saaleeli̱ kutwala. 50 Oku̱kwi̱la haa mwena oghu kandi okwame baataata baawe, ngoku mu̱ghenji̱ waawe Alooni̱ aakwi̱li̱i̱ye haa mwena Hooli̱ kandi aakwama baataata be, 51 nanga enu̱we bombi tamwabaaye beesighibuwa ewanje mu maaso ghaa bantu baa I̱saaleeli̱. Obu mwabaagha haa maasi ghaa Meli̱ba mu Kadesi̱ mu elungu lya Ji̱i̱ni̱, mukangaya mu maaso ghaa bantu baa I̱saaleeli̱. 52 Nahabweki okubona nsi eghi nkuha bantu baa I̱saaleeli̱, bhaatu tooku̱ghi̱ki̱dhamu.”