33
Musa naaha mu̱gi̱sa ntu̱la sya I̱saaleeli̱
1 Ghuni niighuwo mu̱gi̱sa oghu Musa muntu wa Luhanga aahaaye bantu baa I̱saaleeli̱ atakaku̱u̱ye. 2 Aaghila ati,
“Mukama aalu̱gha haa mwena Si̱naai̱.
Aatuwa nga musana haa mwena Seyi̱li̱
kandi aabbeneli̱ya bantu be ku̱lu̱gha haa mwena Palaani̱.
Aasa ali na mitwalo ya baamalai̱ka be
kandi mukono ghuwe ghwabuliyo ghwakaghʼo mulilo.
3 Mukama aku̱ndi̱ye bantu be bahi̱ki̱li̱i̱ye
kandi akulindagha bantu be aba.
Nahabweki tuli na ku̱teeli̱ya mu bighele biye
kandi ku̱hu̱ti̱ya ebi aalaghiiye.
4 Musa akatuha bilaghilo,
kuba kintu kya mughaso kya ki̱bbu̱la kya Yakobbo.
5 Mukama aafooka mukama wa bantu be baa I̱saaleeli̱,
obu ntu̱la syabo na beebembeli̱ beekumaani̱i̱ye hamui.”
6 Musa aabu̱ghʼo ntu̱la ya Leu̱bbeeni̱ ati,
“Leu̱bbeeni̱ abe mwomi̱i̱li̱,
nankabha bantu be bali bakee.”
7 Aabu̱ghʼo ntu̱la ya Yu̱da ati,
“Ai̱ Mukama ooghu̱we Yu̱da naakubilikiiye kumukoonela.
Otodhe omulungani̱ye na ntu̱la sinji.
Mukama omulwanilile kandi omukoonele
kulwani̱i̱si̱ya ngi̱ghu̱ siye.”
8 Aabu̱ghʼo ntu̱la ya Leevi̱ ati,
“Ai̱ Mukama, osu̱u̱ku̱le ntegheka yaawe
nookoleesi̱ya Tu̱mi̱i̱mu̱ yaawe na U̱li̱i̱mu̱
kukwama mu mu̱heeleli̱ya waawe mwesighibuwa, Leevi̱.
Okamulengesa e Masa
kandi waatongana naye haa maasi Meli̱ba,
9 oghu akabu̱ghʼo ese wee na ni̱na wee ati,
‘Tambafuuyʼo’
kandi aaghaya baana baani̱na wee
na baana be.
Nanga bakakwata kighambo kyawe
kandi baahu̱ti̱ya ndaghaano yaawe.
10 Bakwegheesi̱ya Yakobbo ntu̱wamu syawe
kandi I̱saaleeli̱ kilaghilo kyawe.
Balaku̱tu̱mi̱ki̱lagha bubbani̱
kandi bakuhongelaghe bihonguwa byona byokeei̱ye
haa kyakuhongelʼo bihonguwa kyawe.
11 Ai̱ Mukama ohe mu̱gi̱sa mulimo ghwa Leevi̱
kandi byona ebi akukola na mikono yee bikudheedhe.
Ohwelekeeleli̱ye ngi̱ghu̱ siye syona
kandi otatodha ku̱si̱i̱mi̱lani̱ya ngi̱ghu̱ siye kutodha kumulwani̱i̱si̱ya.”
12 Aabu̱ghʼo ntu̱la ya Bbenjami̱i̱ni̱ ati,
“Bbenjami̱i̱ni̱ oghu Mukama aku̱ndi̱ye akuleka aakale kusemeeye.
Akumulinda bwile bwona
kandi aakale mu mikono ya Mukama.”
13 Aabu̱ghʼo ntu̱la ya Yojeefu̱ ati,
“Mukama ahe nsi yee mu̱gi̱sa ghwa kutunga mbu̱la ku̱lu̱gha mu mwanya
kandi maasi ku̱lu̱gha hansi yʼetaka.
14 Nsi eghi ebemu bi̱ghu̱ma ebi musana ghu̱kweli̱yagha
kandi ebikwelelagha haa bwile bwabiyo.
15 Myena ya hambele yeelʼo bintu bisemeeye
kandi ebemu bwena obukuukalʼo bwile bwona.
16 Nsi eghi ebemu bisembo bilungi byona ebili munsi.
Mukama oghu akabu̱gha ali mu mulilo,
ahe mu̱gi̱sa nsi yee kweli̱ya bilimuwa bisemeeye.
Mi̱gi̱sa eghi yoona ebʼo Yojeefu̱
nanga niiye akaba ali mwebembeli̱ wa baana baani̱na wee.
17 Mitwalo yʼomu ntu̱la ya Efulahi̱mu̱ na nku̱mi̱ syʼomu ntu̱la ya Manase,
bakani̱ye kandi bali na maani̱ nga ntu̱u̱li̱ ya nte.
Ngoku mbogho eku̱koleesi̱yagha mahembe ghaayo kuhuma ngi̱ghu̱ syayʼo,
niikuwo baku̱koleesi̱ya mati̱mu̱ ghaabo kuhuma ngi̱ghu̱ syabo kandi kubaseleli̱ya kimui.”
18 Aabu̱ghʼo ntu̱la ya Jabbu̱looni̱ ati,
“Jabbu̱looni̱, odheedhuwaghe mu ngendo syawe
kandi I̱sakaali, osemeleluwaghe mu weema syawe.
19 Balabilikilagha bantu kwisa haa mwena
kandi bahongelaghʼo bihonguwa bi̱hi̱ki̱li̱i̱ye,
nanga buguudha bakutunga ku̱lu̱gha mu nanja
na bintu bya mughaso ebi babi̱si̱ye mu musene.”
20 Aabu̱ghʼo ntu̱la ya Gaadi̱ ati,
“Musinde oghu akugbaatikani̱ya nsi ya Gaadi̱.
Gaadi̱ akulinda nga ntale kuhenanga mikono
kandi kukpeetaagula mituwe ya ngi̱ghu̱ siye.
21 Akeekomela nsi eghi esemeeye kwonini,
nanga niiye akaheebuwa mughabo ghwa mwebembeli̱.
Obu bakulu baa ntu̱la sya I̱saaleeli̱ beekumani̱li̱i̱ye hamui,
aakola ebi̱hi̱ki̱ye mu maaso ghaa Mukama
kandi aahu̱ti̱ya bilaghilo biye.”
22 Aabu̱ghʼo ntu̱la ya Daani̱ ati,
“Daani̱ ali nga kyana kya ntale,
ekikuhalala ku̱lu̱gha Bbasaani.”
23 Aabu̱ghʼo ntu̱la ya Nafutaali ati,
“Uwe Nafutaali oghu Mukama aaghiliiye kisa kandi aakuha mi̱gi̱sa ekani̱ye.
Otunge nsi ya bughuwa ejooba na eku̱wa ya nanja ya Galilaaya.”
24 Aabu̱ghʼo ntu̱la ya Aseli̱ ati,
“Aseli̱ atunge mu̱gi̱sa kusaali̱ya ntu̱la sinji.
Baana baani̱na wee bamukunde,
nsi yee ebemu magita ghakani̱ye ku̱lu̱gha mu biti oli̱va.
25 Milyango ya bibugha byawe baghiighalaghe na njighi sya byoma
kandi obe na maani̱ aghengaane na bwomi̱i̱li̱ bwawe.”
26 “Taaliyo nʼomui oghu ali nga Luhanga wa I̱saaleeli̱,
oghu akukwamagha mu mwanya haabwa bu̱toki̱ buwe
kwisa kumukoonela.
27 Luhanga wa bilo byona niiye buulukilo bwawe.
Mikono yee ya bilo nʼebilo ekukulelagha.
Niiye akubhingagha ngi̱ghu̱ syawe,
aabilikila ati, ‘Obahwelekeeleli̱ye!’
28 Nahabweki I̱saaleeli̱ aakala mu bu̱si̱nge,
Yakobbo aakala enkaha,
mu nsi eghi elimu bilimuwa na vi̱i̱ni̱,
hambali ki̱me kikutoonagha ku̱lu̱gha mu mwanya.
29 Oli na mu̱gi̱sa uwe I̱saaleeli̱!
Taaliyo muntu nʼomui oghu ali nga uwe,
ehanga eli Mukama aaju̱ni̱ye.
Mukama eenini niiye ngabo yaawe kandi kihiyo kyawe,
kukulinda kandi kukuha bu̱si̱ngu̱li̱.
Ngi̱ghu̱ syawe balaasagha mbakwesengeleli̱ya kubaghilila kisa,
bhaatu olabakpeetagha haa mighongo.”