1 Okole kyakuhongelʼo bihonguwa kyaku̱tu̱mi̱kʼo bubbani̱ mu ki̱i̱lu̱mbo kandi kyona kyengana-ngana. 2 Kujamba kwakiyo fu̱u̱ti̱ emui nʼeki̱twi̱ke, kugbaatikana kwakiyo fu̱u̱ti̱ emui nʼeki̱twi̱ke kandi kukangama kwakiyo fu̱u̱ti̱ esatu. Mahembe ghaakiyo anaa ghalu̱ghe mu ki̱twi̱ke eki kyonini. 3 Oki̱swi̱ki̱le na feeja esemeeye haagu̱u̱li̱ yakiyo, haa mpande syakiyo syona na haa mahembe ghaakiyo kandi okyeli̱ghi̱i̱li̱li̱ye na mugoma ghwa feeja. 4 Okikolele mpete ebili sya feeja kandi osite hansi ya mugoma ghwa feeja haa mpande ebili mu maakpengbu̱ hambali bakuta mpaghi esi balakiheekelaghʼo. 5 Mpaghi esi osikole mu ki̱i̱lu̱mbo kandi osi̱swi̱ki̱le na feeja. 6 Ote kyaku̱tu̱mi̱kʼo bubbani̱ enja ya kateni̱ eghi eli mu maaso ghaa sandu̱u̱ku̱ ya ndaghaano na kyakughaniililʼo bantu bibhi eki̱swi̱ki̱ye haagu̱u̱li̱ yayo, hambali ndasanga-sangaanagha naawe.

7 “Bu̱li̱ nkyambisi obu Alooni̱ alaasagha kuteekani̱ja taala, atu̱mi̱kaghʼo bubbani̱ busasi̱ye kulungi. 8 Alooni̱ ali na ku̱tu̱mi̱ka dhee bubbani̱ bu̱li̱ lwagholo obu alabaagha naabhaki̱ya taala, bubbani̱ obu buukalaghe bwaki̱ye mu maaso ghaa Mukama mu mijo yaanu yoona. 9 Haa kyaku̱tu̱mi̱kʼo bubbani̱ eki, otali̱tu̱mi̱kʼo bubbani̱ obutasi̱i̱mi̱lani̱bu̱u̱we kedha kuhongelʼo kihonguwa kyona kyokeei̱ye, kedha kihonguwa kya bilimuwa kandi otaliseesʼo kihonguwa kyakunuwa. 10 Alooni̱ akolaghe mukolo ghwa kweli̱ya kyaku̱tu̱mi̱kʼo bubbani̱ eki mulundi ghumui mu mwaka. Asiighaghe haa mahembe ghaakiyo saghama ya kisolo eki baahongi̱ye haabwa mukolo ghwa kughaniluwa bibhi byabo mulundi ghumui bu̱li̱ mwaka mu mijo yaanu yoona, nanga kyaku̱tu̱mi̱kʼo bubbani̱ eki ki̱hi̱ki̱li̱i̱ye kwonini ewaa Mukama.”

11 Mukama aaghila Musa ati, 12 “Obu okuba noobala bantu baa I̱saaleeli̱, bu̱li̱ muntu aheyo ewaa Mukama sente sya kucungula bwomi̱i̱li̱ buwe, niikuwo kifubilo kya ndwala kitabahi̱kʼo obu okuba noobabala. 13 Bu̱li̱ muntu oghu balakabalagha, ali na kuhaayo kimui kyakabili kya mukwenge ghwa siliva*30:13 Bbai̱bbu̱li̱ sinji sighambi̱ye sekeeli̱. kusighikila haa ki̱pi̱i̱mo kya siliva mu ki̱i̱kalo ki̱hi̱ki̱li̱i̱ye, bu̱li̱ muntu ali na kuhaayo sente esi nga kihonguwa ewaa Mukama. 14 Muntu weena oghu bakubala mu kubaluwa oku, oghu ali na myaka maku̱mi̱ abili ya bukulu na kusaalʼo, ali na kuhaayo kihonguwa kya Mukama eki. 15 Baguudha batahayo sisaayʼo kandi banaku batahayo esili hansi ya kimui kyakabili kya mukwenge oghu, obu mulabaagha nimuhayo kihonguwa ewaa Mukama. Sente esi ni muhendo oghu bu̱li̱ muntu ali na kusasula haabwa kughaniluwa kwa bwomi̱i̱li̱ buwe. 16 Oli na kukumaani̱ya sente esi ku̱lu̱gha mu Banai̱saaleeli̱ kandi osi̱koleesi̱ye milimo yʼomu weema ya kusanga-sangaanamu. Sente esi silalekagha Mukama aasukaghe ngoku Banai̱saaleeli̱ baasasuuye haabwa kughaniluwa kwa bwomi̱i̱li̱ bwabo.”

17 Mukama aaghila Musa ati, 18 “Okole bbaafu ya bbu̱looji̱ ya kunaabilamu na kyakughitʼo kya bbu̱looji̱. Oghite haagati ya weema ya kusanga-sangaanamu na kyakuhongelʼo bihonguwa kandi ote maasi mu bbaafu eghi. 19 Alooni̱ na batabani̱ be bali na kunaaba maasi agha mu ngalo syabo na mu bighele. 20 Obu balabaagha mbaghenda mu weema ya kusanga-sangaanamu, kedha mbeebinga haa kyakuhongelʼo bihonguwa kukola mulimo kedha kuhongela Mukama bihonguwa bookeei̱ye haa mulilo, badu̱bhaghe banaabe maasi agha, niikuwo bataku̱wa. 21 Bali na kunaaba mu ngalo syabo na mu bighele byabo, niikuwo bataku̱wa. Kini kili na kuba kilaghilo kya bilo nʼebilo ewaa Alooni̱ na baasukulu be mu mijo yabo yoona.”

22 Mukama aaghila Musa ati, 23 “Okole mafu̱ta ku̱lu̱gha mu bintu bisasi̱ye bini: ki̱lo mukaagha sya mafu̱ta ghaa miila, ki̱lo esatu sya nsyano esasi̱ye kinamooni̱, ki̱lo esatu ku̱lu̱gha mu bikaka bisasi̱ye, 24 na ki̱lo mukaagha sya nsyano esasi̱ye bakughilaghamu kaasiya kandi li̱ta enaa sya mafu̱ta ghaa biti oli̱va, kusighikila haa bi̱pi̱i̱mi̱si̱yo byʼomu ki̱i̱kalo ki̱hi̱ki̱li̱i̱ye. 25 Bintu ebi obbale muntu oghu amani̱ye kubitabula kusemeeye, abikolemu bigita bisasi̱ye bya maasi kandi bibe mafu̱ta ghaa kusiigha ghahi̱ki̱li̱i̱ye. 26 Mafu̱ta agha oghasiighe haa weema ya kusanga-sangaanamu, sandu̱u̱ku̱ ya ndaghaano, 27 haa meeja na bintu byayʼo byona, haa kyakutʼo taala na bi̱twi̱ke byakiyo na kyaku̱tu̱mi̱kʼo bubbani̱. 28 Oghasiighe haa kyakuhongelʼo bihonguwa byona byokeei̱ye na bintu byakiyo byona kandi haa bbaafu na kyakughitʼo. 29 Bintu ebi byona obyeli̱ye niikuwo bibe bi̱hi̱ki̱li̱i̱ye kwonini. Kintu kyona ekilabi̱ku̱maghʼo kilafookagha ki̱hi̱ki̱li̱i̱ye.

30 “Alooni̱ na batabani̱ be obasiighe mafu̱ta agha kandi obeeli̱ye, niikuwo bagubhe ku̱mpeeleli̱ya nga bahongi̱. 31 Oghile bantu baa I̱saaleeli̱ oti, ‘Mafu̱ta ghaa kusiigha ghani ghalabaagha mafu̱ta ghanje ghahi̱ki̱li̱i̱ye mu mijo yaanu yoona. 32 Mutalighasiighʼo muntu wa bu̱li̱ kilo kandi otalikola mafu̱ta ghanji aghasu̱si̱ye nga mafu̱ta agha ku̱lu̱gha mu bintu ngʼebi waakoleeseei̱ye. Mafu̱ta ghani ghahi̱ki̱li̱i̱ye kandi ghali na kuba ghahi̱ki̱li̱i̱ye kwonini ewaanu. 33 Muntu weena oghu alakolagha mafu̱ta aghasu̱si̱ye ghani kedha aghasiigha muntu oghu atali mu̱hongi̱, bamubhingaghe mu bantu banje.’ ”

34 Mukama aaghila Musa ati, “Okwate bi̱lu̱ngi̱yo bisasi̱ye kulungi sitakite, onu̱ka, galibanu̱mu̱, obitabulani̱ye na bubbani̱ busemeeye kandi byona byengaane. 35 Oghile muntu oghu amani̱ye kubitabula abikolemu bubbani̱ busasi̱ye kandi otemu kisula niikuwo buukale busemeeye kandi bu̱hi̱ki̱li̱i̱ye. 36 Bimui haa bintu ebi obisiyemu nsyano esemeeye kandi oghite mu maaso ghaa sandu̱u̱ku̱ ya ndaghaano mu weema ya kusanga-sangaanamu, hambali ndasanga-sangaanagha naawe. Bubbani̱ obu bube bu̱hi̱ki̱li̱i̱ye kwonini ewaanu. 37 Muntu atali̱koleesi̱ya bintu ebi kwekolela bubbani̱ busasi̱ye obu. Bwile bwona mu̱bweli̱li̱kanaghʼo nga bubbani̱ bu̱hi̱ki̱li̱i̱ye bwa Mukama. 38 Weena oghu akwekolela bigita bisasi̱ye kwonini nga ebi, abhinguwe mu bantu banje.”