1 Mukama aaghila Musa ati, 2 “Naakomi̱ye Bbejaleeli̱ mutabani̱ wa U̱li̱, muusukulu wa Hula, wʼomu ntu̱la ya Yu̱da. 3 Naaleki̱ye mwoyo wanje aamwisʼo kwonini, naamuhaaye magheji, kwetegheeleli̱ya kandi naamufoola oghu amani̱ye kukola bintu bya ngalo. 4 Akugubha kukola bintu bisemeeye ku̱lu̱gha mu feeja, siliva na bbu̱looji̱. 5 Akugubha kubhaaka mabaale kandi kughata mu buufuleemu bwa feeja, kulanda mbaau kandi kukola bu̱li̱ mulimo ghwona ghwa ngalo. 6 Naakomi̱ye dhee Oholi̱yaabbu, mutabani̱ wa Ahisamaki̱, wʼomu ntu̱la ya Daani̱, kukola hamui na Bbejaleeli̱. Naahaaye magheji bantu boona abakwete kukola milimo ya ngalo, niikuwo bagubhe kukola byona ebi naakulaghiiye. 7 Bakukola weema ya kusanga-sangaanamu, sandu̱u̱ku̱ ya ndaghaano, kyakughaniililʼo bantu bibhi, na bintu byona byʼomu weema eghi. 8 Bakukola dhee meeja na byaku̱koleesi̱yʼo, kyakutʼo taala kisemeeye na bintu byakiyo byona, kyaku̱tu̱mi̱kʼo bubbani̱, 9 kyakuhongelʼo bihonguwa byona byokeei̱ye na bintu byakiyo byona, bbaafu na kyakughitʼo, 10 bi̱lu̱waalo bi̱hi̱ki̱li̱i̱ye bya bu̱hongi̱ bya Alooni̱ na batabani̱ be ku̱lu̱waala mbakola mulimo ghwa bu̱hongi̱, 11 mafu̱ta ghaa kusiigha na bubbani̱ busasi̱ye bwa ku̱tu̱mi̱ka mu Ki̱i̱kalo Ki̱hi̱ki̱li̱i̱ye. Bintu ebi byona babikole ngoku naakulaghiiye.”

12 Mukama aaghila Musa ati, 13 “Oghambile bantu baa I̱saaleeli̱ oti, ‘Mu̱hu̱ti̱yaghe kilo kyanje kya Sabhato, nanga kilo eki ni kaakulolelʼo haagati yanje naanu mu mijo yaanu yoona, niikuwo mugubhe kumanya ngoku ndi Mukama oghu akubafoolagha bahi̱ki̱li̱i̱ye.

14 “ ‘Muli na ku̱hu̱ti̱ya kilo kya Sabhato nanga ni kilo ki̱hi̱ki̱li̱i̱ye ewaanu. Muntu weena oghu akukola bintu bi̱bhi̱i̱hi̱ye haa kilo eki nʼoghu akukola mulimo ghwona haa kilo eki, aatibuwaghe. 15 Muli na bilo mukaagha bya kukola milimo yaanu yoona, bhaatu kilo kyamusanju̱ ni kilo kya Sabhato kya kuhuumula kandi ni kilo ki̱hi̱ki̱li̱i̱ye ewaa Mukama. Muntu weena oghu alakolagha mulimo haa kilo kya Sabhato eki, aatibuwaghe. 16 Nahabweki bantu baa I̱saaleeli̱ bali na ku̱hu̱ti̱ya kilo kya Sabhato, mu mijo yabo yoona, nga ndaghaano ya bilo nʼebilo. 17 Kilo eki nkaakulolelʼo kaa bilo nʼebilo haagati yanje na Banai̱saaleeli̱, nanga mu bilo mukaagha Mukama akahanga eghulu na nsi kandi haa kilo kyamusanju̱ ataakola kantu kandi aahuumula.’ ”

18 Obu Mukama aamali̱ye ku̱bu̱gha na Musa haa mwena Si̱naai̱, aaha Musa bihande bibili bya mabaale, ebi Luhanga eenini ahandi̱i̱ki̱yʼo bilaghilo.