1 Bbejaleeli̱ na baanakiye baakola bi̱lu̱waalo bisemeleeye kimui mu ngoye sya langi̱ ya bbu̱lu̱lu̱, papo na mutuku bya bahongi̱ ku̱lu̱waalagha mbakola mulimo mu Ki̱i̱kalo Ki̱hi̱ki̱li̱i̱ye. Baakola bi̱lu̱waalo bi̱hi̱ki̱li̱i̱ye bya Alooni̱, ngoku Mukama aalaghiiye Musa.

2 Baakoleesi̱ya feeja, mahu̱u̱ji̱ ghaa langi̱ ya bbu̱lu̱lu̱, papo, mutuku na lughoye lusemeeye, kukola efodi̱. 3 Baakoleesi̱ya nondo kuwiisa feeja kandi baaghiiyamu buntu bu̱ti̱-bu̱ti̱i̱, du̱mbi̱ baabujombakaka baayamu mahu̱u̱ji̱ kandi bantu abali na bukugu baaghasoni̱ya lughoye lusemeeye lwa langi̱ ya bbu̱lu̱lu̱, papo, mutuku na lughoye lusemeeye. 4 Efodi̱ eghi baata haa mpande syombi buheeko bwa kukwatani̱ya haa mabegha ki̱twi̱ke kya mu maaso na kyʼenu̱ma, niikuwo ekwatane hamui. 5 Basaasa aba baakola muheeko mu lughoye lusemeeye olu baakoli̱yemu efodi̱ kandi baatamu mahu̱u̱ji̱ ghaa feeja ghaa langi̱ ya bbu̱lu̱lu̱, papo, mutuku na lughoye lusemeeye ngoku Mukama aalaghiiye Musa.

6 Baabhaaka mabaale abili onika, baaghata mu buufuleemu buunabwana bwa feeja kandi muntu aahandiikʼo mali̱i̱na ghaa batabani̱ eku̱mi̱ na babili baa I̱saaleeli̱. 7 Mabaale abili agha baaghaboha haa mabegha haagu̱u̱li̱ ya efodi̱ kuba kaakuusukilʼo batabani̱ baa I̱saaleeli̱, ngoku Mukama aalaghiiye Musa.

8 Baasona kyaku̱lu̱waala haa ki̱ku̱bha mu lughoye lwonini olu baakoli̱yemu efodi̱. Baakitaamu mahu̱u̱ji̱ ghaa feeja, langi̱ ya bbu̱lu̱lu̱, papo, mutuku na lughoye lusemeeye. 9 Kyaku̱lu̱wala haa ki̱ku̱bha eki, baaki̱ku̱namu kabili kandi kyengaana mpande syona, i̱nci̱ mwenda kujamba kandi i̱nci̱ mwenda kugbaatikana. 10 Baatʼo lai̱ni̱ enaa sya mabaale ghaa muhendo. Lai̱ni̱ yʼoku̱du̱bha baatʼo ghaamutuku salu̱di̱yo, ghaa ki̱si̱ka kibisi topaji̱ na ghaamutuku kabu̱nku̱lo. 11 Lai̱ni̱ yaakabili baatʼo ghaa ki̱si̱ka kibisi i̱mi̱lali̱do, ghaa bbu̱lu̱lu̱ su̱fi̱lo na ghaa njelu dayamondi̱. 12 Lai̱ni̱ yaakasatu baatʼo ghaa mutuku takwi̱je, ghaa njelu agate na ghaa papo ameti̱si̱to. 13 Lai̱ni̱ yaakanaa baatʼo ghaa kinjaali̱ bbelu̱lo, ghaa mutuku onika na ghaa ki̱si̱ka kibisi yesipa kandi baaghata mu buufuleemu buunabwana bwa feeja. 14 Haabʼo mabaale eku̱mi̱ nʼabili kandi haa bu̱li̱ ebaale baahandiikʼo li̱i̱na lya omui haa batabani̱ eku̱mi̱ na babili baa Yakobbo kwoleka ntu̱la eku̱mi̱ nʼebili sya I̱saaleeli̱.

15 Kyaku̱lu̱waala haa ki̱ku̱bha eki baakikolela bujeghele bubili bwa feeja busemeeye kandi obutali̱ye nga bughuwo. 16 Baakola buufuleemu buunabwana bubili bwa feeja bwa kutaamu mabaale agha. Kyaku̱lu̱waala haa ki̱ku̱bha eki baakikolela mpete ebili sya feeja kandi baasita haa nsondo syakiyo ebili syʼelughulu. 17 Baaboha bujeghele bubili bwa feeja mu mpete ebili esili haa mpande ebili sya kyaku̱lu̱waala haa ki̱ku̱bha. 18 Baakwatani̱ya kumaliilila kunji kwa bujeghele bubili haa buufuleemu buunabwana bwa feeja kandi baabuboha mu maaso ghaa efodi̱ eghi. 19 Baakola mpete ebili sya feeja kandi baasita haa nsondo ebili syʼeku̱wa ya kyaku̱lu̱waala haa ki̱ku̱bha, mukati haai na efodi̱. 20 Baakola dhee mpete sinji ebili sya feeja kandi baasita haakumaliilila kwa bughuwo bubili bwa haa mabegha ghaa efodi̱, hambali ki̱twi̱ke kyayʼo kyʼeku̱wa kilabhaane na muheeko oghu̱soni̱ye kulungi. 21 Mpete syakiyo baasibohela haa mpete sya kyaku̱lu̱waala haa ki̱ku̱bha na bughuwo bwa langi̱ ya bbu̱lu̱lu̱, niikuwo kilangaale haa muheeko ghwa efodi̱ eghi ekoleeu̱we kulungi, niikuwo kitatelebuka haa efodi̱ eghi, ngoku Mukama aalaghiiye Musa.

22 Baakola nkanji̱ ya langi̱ ya bbu̱lu̱lu̱ ya ku̱lu̱waala mukati ya efodi̱. 23 Nkanji̱ eghi yaaba na kihulu haagati ekiliyo mukughilo kya kukwami̱yamu mutuwe niikuwo etatemuka. 24 Baata haa mukughilo ghwa nkanji̱ eghi mikomamahanga mu langi̱ ya bbu̱lu̱lu̱, papo, mutuku na lughoye lusemeeye. 25 Baakola bida bya feeja esemeeye kandi baabyeli̱ghi̱i̱li̱li̱ya haa mukughilo ghwa nkanji̱ eghi mbalabhani̱ya kida na mukomamahanga. 26 Baalabhani̱yagha kida na mukomamahanga, kida na mukomamahanga, kweli̱ghi̱i̱li̱li̱ya mukughilo ghwa eku̱wa ghwa nkanji̱ eghi. Alooni̱ aghi̱lu̱waalaghe naakola mulimo ghuwe nga mu̱hongi̱, ngoku Mukama aalaghiiye Musa.

27 Baakolela Alooni̱ na batabani̱ be kyaku̱lu̱waala mukati, mu lughoye lusemeeye. 28 Baabakolela kyaku̱lu̱waala mu mutuwe, sipeewa na mpale sya mukati, mu lughoye lusemeeye. 29 Mu̱soni̱ mulungi aasona muheeko mu lughoye lusemeeye kandi aasonelʼo mahu̱u̱ji̱ ghaa langi̱ ya bbu̱lu̱lu̱, papo na mutuku, ngoku Mukama aalaghiiye Musa.

30 Baakola kaapa mu feeja esemeeye kandi baakahandiikʼo bati, “Ahi̱ki̱li̱i̱ye ewaa Mukama.” 31 Kaapa aka aakaboha na kaghuwo kaa langi̱ ya bbu̱lu̱lu̱ mu maaso ghaa kyaku̱lu̱waala mu mutuwe, ngoku Mukama aalaghiiye Musa.

32 Nahabweki mulimo ghwona ghwa kukwela weema ehi̱ki̱li̱i̱ye, weema ya kusanga-sangaanamu, ghwahuwa. Banai̱saaleeli̱ baakola bintu byona ngoku Mukama aalaghiiye Musa. 33 Baaleeta ewaa Musa weema ehi̱ki̱li̱i̱ye na bintu byayʼo byona: bigwasi byayʼo, fuleemu syayʼo, mikiiko yayo, mpaghi syayʼo, ncuba sya kutaamu mpaghi, 34 kyaku̱swi̱ki̱la weema eghi eki̱koleeu̱we mu mpu siimutuku sya ntu̱u̱li̱ sya ntaama, mpu sya mbu̱li̱, kateni̱ ya kuta mu maaso ghaa sandu̱u̱ku̱, 35 sandu̱u̱ku̱ ya ndaghaano, mpaghi syayʼo, kyakughaniililʼo bantu bibhi, 36 meeja na byaku̱koleesi̱yʼo byona, mugaati̱ ghwa kuhongela Luhanga, 37 kyakutʼo taala kya feeja esemeeye na taala syakiyo, byaku̱koleesi̱yʼo byona na mafu̱ta ghaakuta mu taala esi, 38 kyakuhongelʼo bihonguwa kya feeja, mafu̱ta ghaa kusiigha, bubbani̱ busasi̱ye, kateni̱ ya kuta haa mulyango ghwa weema ehi̱ki̱li̱i̱ye, 39 kyakuhongelʼo kya bbu̱looji̱, kati̱mba kaakiyo kaa bbu̱looji̱, mpaghi syakiyʼo, byaku̱koleesi̱yʼo byona, bbaafu ya bbu̱looji̱ na kyakughitʼo, 40 kateni̱ sya kukola lugho lwa jighati̱, mpaghi sya jighati̱ eghi, ncuba sya kutaamu mpaghi esi, kateni̱ ya kuta haa geeti̱ ya jighati̱, mighuwo na nkondo sya jighati̱ ya weema eghi na byaku̱koleesi̱ya byona mu weema ehi̱ki̱li̱i̱ye, weema ya kusanga-sangaanamu. 41 Baaleeta bi̱lu̱waalo bi̱koleeu̱we kulungi bya bahongi̱ ku̱lu̱waalagha mbakola mulimo mu Ki̱i̱kalo Ki̱hi̱ki̱li̱i̱ye, bi̱lu̱waalo bi̱hi̱ki̱li̱i̱ye bya mu̱hongi̱ Alooni̱ na bi̱lu̱waalo bya batabani̱ be balalu̱waalagha mbaheeleli̱ya nga bahongi̱.

42 Banai̱saaleeli̱ baakola mulimo ghwona ngoku Mukama aalaghiiye Musa. 43 Musa aalola bhyani bintu ebi byona kandi aabona ngoku baakoli̱ye mulimo oghu kwonini ngoku Mukama aalaghiiye. Nahabweki Musa aaha bantu aba mu̱gi̱sa.