1 Mukama aaghila Musa ati, 2 “Okwele weema ehi̱ki̱li̱i̱ye, weema ya kusanga-sangaanamu, haa kilo kyʼoku̱du̱bha kya kweli̱ kwokubanja. 3 Ote mu weema eghi sandu̱u̱ku̱ ya ndaghaano kandi odhodhooki̱ye kateni̱ mu maaso ghaayo. 4 Otaahi̱yemu meeja kandi otʼo bintu byayʼo. Du̱mbi̱ otaahi̱yemu kyakutʼo taala kandi otʼo taala syakiyo. 5 Ote kyaku̱tu̱mi̱kʼo bubbani̱ kya feeja mu maaso ghaa sandu̱u̱ku̱ ya ndaghaano kandi ote kateni̱ haa mulyango ghwa weema ehi̱ki̱li̱i̱ye.

6 “Ote kyakuhongelʼo bihonguwa byona byokeei̱ye mu maaso ghaa mulyango ghwa weema ehi̱ki̱li̱i̱ye, weema ya kusanga-sangaanamu. 7 Ote bbaafu haagati ya weema ya kusanga-sangaanamu na kyakuhongelʼo bihonguwa kandi otemu maasi. 8 Okole jighati̱ kweli̱ghi̱i̱li̱li̱ya weema eghi kandi ote kateni̱ haa geeti̱ ya lugho lwa jighati̱ eghi.

9 “Okwate mafu̱ta ghaa kusiigha kandi oghasiighe haa weema ehi̱ki̱li̱i̱ye na bu̱li̱ kintu ekilimu, oghyeli̱ye na bintu byayʼo byona kandi ekuba ehi̱ki̱li̱i̱ye. 10 Osiighe mafu̱ta haa kyakuhongelʼo bihonguwa byona byokeei̱ye na byaku̱koleesi̱yʼo byona, weeli̱ye kyakuhongelʼo bihonguwa eki kandi kikufooka ki̱hi̱ki̱li̱i̱ye kwonini. 11 Osiighe mafu̱ta haa bbaafu na haa kyakughitʼo kandi obyeli̱ye.

12 “Oleete Alooni̱ na batabani̱ be haa mulyango ghwa weema ya kusanga-sangaanamu kandi obanaabi̱ye na maasi. 13 Olu̱wi̱ke Alooni̱ bi̱lu̱waalo bi̱hi̱ki̱li̱i̱ye bya bu̱hongi̱, omusiighe mafu̱ta kandi omweli̱ye, niikuwo agubhe ku̱mpeeleli̱ya nga mu̱hongi̱. 14 Oleete batabani̱ baa Alooni̱ kandi obalu̱wi̱ke byaku̱lu̱waala mukati byabo. 15 Obasiighe mafu̱ta ngoku waaghasi̱i̱ghi̱ye esebo, niikuwo bagubhe ku̱mpeeleli̱ya nga bahongi̱. Kusiigha mafu̱ta Alooni̱ na batabani̱ be, kukubafoola na baasukulu baabo kuba bahongi̱ mu mijo yabo yoona eghi ekwisa.” 16 Musa aakola bu̱li̱ kintu ngoku Mukama aamulaghiiye.

17 Nahabweki aakwela weema ehi̱ki̱li̱i̱ye haa kilo kyʼoku̱du̱bha kya kweli̱ kwokubanja kwa mwaka ghwakabili haanu̱ma ya ku̱lu̱gha Mi̱si̱li̱. 18 Musa aakola ncuba, aataamu fuleemu, aakwatani̱ya mikiiko kandi aakwela weema ehi̱ki̱li̱i̱ye, du̱mbi̱ aasimba mpaghi sya kutʼo kateni̱. 19 Aabi̱swi̱ki̱la na weema kandi aata haa weema ehi̱ki̱li̱i̱ye eghi kya ku̱ghi̱swi̱ki̱la, ngoku Mukama aamulaghiiye.

20 Aakwata bihande bibili bya mabaale bya ndaghaano, aabita mu sandu̱u̱ku̱ ya ndaghaano, aata mpaghi mu mpete syayʼo kandi aatʼo kyakughaniililʼo bantu bibhi kyaku̱swi̱ki̱la haagu̱u̱li̱. 21 Aataahi̱ya mu weema ehi̱ki̱li̱i̱ye sandu̱u̱ku̱ ya ndaghaano kandi aata kateni̱ haagati ya weema eghi ku̱bi̱sa sandu̱u̱ku̱ ya ndaghaano, ngoku Mukama aamulaghiiye.

22 Musa aata meeja mu weema ya kusanga-sangaanamu haa luhande lwʼelughulu lwa weema ehi̱ki̱li̱i̱ye eghi, mu maaso ghaa kateni̱ eghi. 23 Aata mugaati̱ haa meeja eghi mu maaso ghaa Mukama, ngoku Mukama aamulaghiiye.

24 Aata kyakutʼo taala haa luhande lwʼeku̱wa lwa weema ya kusanga-sangaanamu kandi kyalolana na meeja ya kuhongelʼo mugaati̱ mu weema ehi̱ki̱li̱i̱ye eghi. 25 Aatʼo taala mu maaso ghaa Mukama, ngoku Mukama aamulaghiiye.

26 Musa aata kyakuhongelʼo bihonguwa kya feeja mu weema ya kusanga-sangaanamu eghi, mu maaso ghaa kateni̱ eghi. 27 Aatu̱mi̱ka haa kyakuhongelʼo bihonguwa eki bubbani̱ busasi̱ye ngoku Mukama aamulaghiiye. 28 Du̱mbi̱ aata kateni̱ enji haa mulyango ghwa weema ehi̱ki̱li̱i̱ye eghi.

29 Musa aata kyakuhongelʼo bihonguwa byona byokeei̱ye haai na mulyango ghwa weema ehi̱ki̱li̱i̱ye, weema ya kusanga-sangaanamu kandi aahongelʼo bihonguwa byona byokeei̱ye na bihonguwa bya bilimuwa, ngoku Mukama aamulaghiiye.

30 Aata bbaafu haagati ya weema ya kusanga-sangaanamu na kyakuhongelʼo bihonguwa kandi aataamu maasi ghaa kunaaba. 31 Maasi agha niigho Musa, Alooni̱ na batabani̱ baa Alooni̱ baanaabagha mu ngalo na mu maghulu. 32 Baanaabagha mbaghenda mu weema ya kusanga-sangaanamu kedha mbeebinga kyakuhongelʼo bihonguwa, ngoku Mukama aalaghiiye Musa.

33 Du̱mbi̱ Musa aakwela jighati̱ kweli̱ghi̱i̱li̱li̱ya weema ehi̱ki̱li̱i̱ye na kyakuhongelʼo bihonguwa kandi aata kateni̱ haa geeti̱ ya jighati̱ eghi. Nahabweki Musa aamala mulimo oghu.

34 Du̱mbi̱ kicu kyaswi̱ki̱la weema ya kusanga-sangaanamu kandi ki̱ti̱i̱ni̱sa kya Mukama kyasula mu weema ehi̱ki̱li̱i̱ye eghi. 35 Musa ataagubha kutaaha mu weema ya kusanga-sangaanamu nanga kicu kikaba ki̱ghi̱swi̱ki̱ye kandi ki̱ti̱i̱ni̱sa kya Mukama kiisuuye mu weema ehi̱ki̱li̱i̱ye eghi.

36 Mu lughendo lwona lwa Banai̱saaleeli̱, kicu eki kyakaamukagha haa weema ehi̱ki̱li̱i̱ye eghi, du̱mbi̱ Banai̱saaleeli̱ baatandika ku̱lu̱gha mu ki̱i̱kalo eki kandi baghenda mu ki̱i̱kalo kinji. 37 Bhaatu kicu eki kyakabaagha kitalu̱ghi̱ye haa weema ehi̱ki̱li̱i̱ye eghi, baghoona mu ki̱i̱kalo eki ku̱hi̱ki̱ya ki̱todhi̱ye ku̱lu̱ghʼo. 38 Nahabweki kicu kya Mukama kyakalagha haa weema ehi̱ki̱li̱i̱ye ntangaali̱ kandi mulilo ghwakagha mu kicu eki mukilo, mu maaso ghaa Banai̱saaleeli̱ boona mu ngendo syabo syona.