Kyabaleevi̱
Kwanjula
Kitabo Kyabaleevi̱ kilimu ndaghikiililo ngoku bahongi̱ na Baleevi̱ bali na kukola mulimo ghwabo haa weema ya kusanga-sangaanamu. Kitabo kini kilimu dhee bilaghilo bikani̱ye ngoku Banai̱saaleeli̱ bali na kwetwalikani̱ya kandi nʼekikuleka mbafooka abateeli̱ye. Kilimu dhee bilaghilo ebikwetʼo bihonguwa bikani̱ye na bi̱ghenu̱. Nsuula ya maku̱mi̱ abili nʼesatu ebu̱ghi̱yʼo bi̱ghenu̱ byamaani̱.
Luhanga niiye akalaghila Banai̱saaleeli̱ kuhaaghayo bihonguwa na kukola mi̱ghendi̱yo eghi eli mu Bbai̱bbu̱li̱. Bintu ebi byabakoonelagha kwehaayo ewaa Luhanga kandi ku̱mu̱hu̱ti̱ya. Bihonguwa bikani̱ye na bi̱ghenu̱ byʼomu ndaghaano nkulu byolekagha ndaghaano mpyaka eghi Yesu akutʼo.
Kighambo kyamaani̱ eki babu̱ghi̱yʼo mu kitabo kini ni bu̱hi̱ki̱li̱i̱le. Luhanga ahi̱ki̱li̱i̱ye kandi abbali̱ye bantu be kuba bahi̱ki̱li̱i̱ye. Kukwama mu saghama ya bihonguwa, Luhanga aalekagha muntu agubha kughaniluwa. Eki kyolekagha ku̱ku̱wa kwa Yesu haa musalaba, hambali saghama yee yaaleki̱ye muntu na Luhanga baakuukanganamu. (Bahebbulaayo 9:11-14.)
Lukaala lwamaani̱ munu mu kitabo kini ni olu Yesu aabu̱ghi̱yʼo kandi aalughilamu lumui haa bilaghilo bibili bikulu munu. Lukaala olu lu̱ghi̱li̱ye luti, “Okundaghe muunakyawe ngoku weeku̱ndi̱ye weenini.” (Baleevi̱ 19:18).
Kitabo kini ni kimui haa bitabo bitaano ebi Musa aahandi̱i̱ki̱ye.
1
Bihonguwa byona byokeei̱ye
1 Mukama aabilikila Musa kandi aabu̱gha naye ku̱lu̱gha mu weema ya kusanga-sangaanamu, aamughila ati, 2 “Obu̱ghe na Banai̱saaleeli̱ kandi obaghile oti, ‘Kaakuba muntu weena mu enu̱we abbala kutwala kihonguwa ewaa Mukama, akiiyaghe mu nte, ntaama kedha mbu̱li̱ siye.
3 “ ‘Kaakuba kihonguwa kyona kyokeei̱ye kiba eki̱lu̱ghi̱ye mu nte siye, atwale yabusaasa kandi eghi etali na kamogo. Ali na kughileeta haa mulyango ghwa weema ya kusanga-sangaanamu niikuwo Mukama aghi̱si̱i̱me. 4 Muntu oghu ali na kuta mukono ghuwe haa mutuwe ghwa kihonguwa kyona kyokeei̱ye eki kandi Mukama aku̱ki̱si̱i̱ma haabwa mukolo ghwa muntu oghu kughaniluwa bibhi biye. 5 Ntu̱u̱li̱ ya nte eghi aghisalile mu maaso ghaa Mukama kandi bahongi̱ batabani̱ baa Alooni̱, batwale saghama yayo baghimisange haa mpande syona sya kyakuhongelʼo bihonguwa ekili haai na mulyango ghwa weema ya kusanga-sangaanamu. 6 Kihonguwa kyona kyokeei̱ye eki akibaaghe kandi ajombakake nyama syakiyo mu myana. 7 Batabani̱ baa mu̱hongi̱ Alooni̱, bali na ku̱tu̱mi̱ka mulilo haa kyakuhongelʼo bihonguwa kandi bapangʼo nkui. 8 Du̱mbi̱ bahongi̱ batabani̱ baa Alooni̱, bapange haa mulilo oghu nyama esi baajombakaki̱ye mu myana, mutuwe na bisabu̱, haa mulilo ghwa kyakuhongelʼo bihonguwa eki. 9 Muntu oghu ali na kunaabi̱ya na maasi byenda na bilenge, du̱mbi̱ mu̱hongi̱ ooki̱ye kisolo eki kyona haa kyakuhongelʼo bihonguwa. Eki kibe kihonguwa kyona kyokeei̱ye, kihonguwa bookeei̱ye haa mulilo, eki kusasa kwakiyo ku̱dheedhi̱ye Mukama.
10 “ ‘Kaakuba kihonguwa eki kiba kihonguwa kyona kyokeei̱ye ku̱lu̱gha mu ntaama kedha mbu̱li̱, ahonge yabusaasa kandi eghi etali na kamogo. 11 Kisolo eki akisalile haa luhande lwa elughulu ya kyakuhongelʼo bihonguwa mu maaso ghaa Mukama. Du̱mbi̱ bahongi̱ batabani̱ baa Alooni̱ bamisange saghama yakiyo haa mpande syona sya kyakuhongelʼo bihonguwa. 12 Kisolo eki akiiyemu myana, mutuwe na bisabu̱ kandi mu̱hongi̱ oghu abipange kusemeeye haa nkui esili haa mulilo haa kyakuhongelʼo bihonguwa. 13 Muntu oghu ali na kunaabi̱ya na maasi byenda na bilenge kandi mu̱hongi̱ aleete nyama sya kisolo eki syona kandi asyoki̱ye haa kyakuhongelʼo bihonguwa. Eki kibe kihonguwa kyona kyokeei̱ye, eki bookeei̱ye haa mulilo, eki kusasa kwakiyo ku̱dheedhi̱ye Mukama.
14 “ ‘Kaakuba muntu ahongela Mukama kihonguwa kyona kyokeei̱ye kya noni̱, ali na kuleeta kihonguwa kya ki̱i̱bbi̱mbo kedha kaapi̱i̱so. 15 Mu̱hongi̱ atwale noni̱ eghi haa kyakuhongelʼo bihonguwa, aki̱tu̱wʼo mutuwe kandi aghwokeli̱ye haa kyakuhongelʼo bihonguwa. Saghama ya noni̱ eghi aghitoonakaki̱ye haa mpande sya kyakuhongelʼo bihonguwa eki. 16 Mu̱hongi̱ aaye mu noni̱ eghi kisaki̱li̱yo kyayʼo na ebili mukati yakiyo kandi abikube haa luhande lwa bu̱lu̱gha ejooba bwa kyakuhongelʼo bihonguwa mu ki̱i̱kalo hambali bakukubagha ki̱bu̱. 17 Mu̱hongi̱ akwate mapapa ghaa noni̱ eghi kandi aghyati̱ye, bhaatu ataghi̱tu̱wamu kabili, du̱mbi̱ aghyokeli̱ye haa mulilo ghwa kyakuhongelʼo bihonguwa. Eki kibe kihonguwa kyona kyokeei̱ye, eki bookeei̱ye haa mulilo, eki kusasa kwakiyo ku̱dheedhi̱ye Mukama.