1 Kilo kimui Luhanga aaghila Yakobbo ati, “Oghende Bbeteeli̱ aaniiyo waakala kandi okweleyo eki okuhongelʼo bihonguwa byanje, si̱ye Luhanga oghu akakubonekela obu waalukagha wanjoko waawe Esau.”

2 Niibuwo Yakobbo aaghi̱li̱ye bakali̱ be na baana be hamui na boona abaabaagha naye ati, “Mwehiyʼo baaluhanga banji aba muli nabo aba, munaabe mwele kandi mu̱lu̱waale bi̱lu̱walo binji. 3 Du̱mbi̱ mwise tughende tau̱ni̱ ya Bbeteeli̱ hambali nkukwelela Luhanga kyakuhongelʼo bihonguwa, oghu akankoonela obu naabaagha mu kubona-bona kandi oghu aakalagha nanje hoona hambali naakaghendagha.” 4 Niibuwo baahaaye Yakobbo bisasani̱ bya baaluhanga baabo ebi baabaagha nabiyo. Baamuha na manengeniya*35:4 Manengeniya agha nagho ghakaba ghali ghaa bihongano byabo. agha bali balu̱wete haa matui. Aaghajiika hansi mu ki̱i̱looku̱ mu kyalo kya Sekeemu.

5 Obu baamu̱ki̱ye kughenda, Luhanga aaleeteleja bantu bʼomu maatau̱ni̱ agha baasalilaghamu kwobahila kimui, niikuwo atabʼo muntu nʼomui oghu akubakwama kughenda kubakola kubhi.

6 Du̱mbi̱ Yakobbo hamui na bantu boona abaabaagha naye baaki̱dha mu tau̱ni̱ ya Lu̱u̱ji̱ eghi baadu̱bhagha kughilamu Bbeteeli̱ mu nsi ya Kanaani̱. 7 Du̱mbi̱ Yakobbo aakwela mu tau̱ni̱ ya Bbeteeli̱ kyakuhongelʼo Luhanga bihonguwa kandi aakiluka li̱i̱na Eli̱-bbeteeli̱ nanga niiyo Luhanga aamubonekeeye obu aalukagha waani̱na wee Esau.

8 Bwile obu Debbola, oghu akalela Lebbeeka, aaku̱wa, baamujiika eku̱wa ya tau̱ni̱ ya Bbeteeli̱ hansi ya kiti ki̱i̱looku̱. Kiti eki baakiluka li̱i̱na Aloni̱-bbaku̱si̱.†35:8 Li̱i̱na eli likumani̱i̱si̱ya ki̱i̱looku̱ kya kulililʼo.

9 Obu Yakobbo aamali̱ye kukuuka mu kyalo kya Padanalaamu,‡35:9 Padanalaamu eghi niiyo dhee Mesopotami̱ya. Luhanga aatodha aamubonekela kandi aamuha mu̱gi̱sa. 10 Luhanga aamughila ati, “Li̱i̱na lyawe nuuwe Yakobbo, bhaatu bantu tabakutodha kukughilamu Yakobbo, kuuyʼo nuuwe okuba I̱saaleeli̱.” Du̱mbi̱ aamuluka li̱i̱na lya I̱saaleeli̱.

11 Du̱mbi̱ Luhanga aamughila ati, “Ndi Luhanga wa Bu̱toki̱ Bwona, obyale baana bakaniiye kimui, baasukulu baawe balifooka mahanga ghakani̱ye kandi bamui mu bo balifooka bakama. 12 Nkukuha kyalo eki naahaaye Ebbulahi̱mu̱ na I̱saka kuba kyawe bilo nʼebilo kandi haanu̱ma yaawe, ndikiha baasukulu baawe.” 13 Du̱mbi̱ Luhanga aalu̱ghʼo Yakobbo, aaghenda.

14 Yakobbo aasimba mpaghi ya ebaale hambali aabu̱ghi̱i̱ye na Luhanga haala. Aaghiseesʼo kihonguwa kyakunuwa hamui na mafu̱ta kughifoola ya kulamiliyʼo Luhanga. 15 Ki̱i̱kalo eki Yakobbo aakighilamu Bbeteeli̱.

16 Du̱mbi̱ baamu̱ki̱ya ku̱lu̱gha Bbeteeli̱. Obu baanaghendagha, hanati̱ghaayʼo lughendo lujambi̱ye ku̱hi̱ka mu kyalo kya Efulaati̱, Lakeeli̱ aakwatuwa ku̱byala. Aaghu̱wa busaali̱ji̱ bukani̱ye. 17 Obu aanalumuwagha, mukali̱ oghu aamu̱byali̱i̱si̱yagha aamughila ati, “Otoobaha, nanga oku̱byala mwana onji wabusaasa.” 18 Obu Lakeeli̱ aaboone naaghenda ku̱ku̱wa, mwana oghu aamuluka li̱i̱na ati niiye Bbenoni̱.§35:18 Bbenoni̱ likumani̱i̱si̱ya mwana wa kubona-bona. Bhaatu ese wee aamuluka li̱i̱na ati niiye Bbenjami̱i̱ni̱.*35:18 Bbenjami̱i̱ni̱ likumani̱i̱si̱ya mwana wa kudheedhuwa.

19 Haanu̱ma obu Lakeeli̱ aaku̱u̱ye, baamujiika mu kihanda ekikughenda Efulaati̱ eghi baaghilaghamu dhee Bbeteleheemu. 20 Haagu̱u̱li̱ ya kituulo eki, Yakobbo aasimbʼo mpaghi. Ti̱ nʼendindi mpaghi eghi enaliyo kwoleka hambali kituulo kya Lakeeli̱ kili.

21 Yakobbo oghu baaghilaghamu I̱saaleeli̱ aatodha aamu̱ki̱ya lughendo luwe, du̱mbi̱ aakwela weema yee luhande lweli̱ lwa ki̱i̱kalo baaghilaghamu Migidaali-eda.†35:21 Ki̱i̱kalo eki niikiyo baalindilaghamu maghana ghaa bisolo.

22 Obu Yakobbo aabaagha anaakaaye mu kyalo eki, Leu̱bbeeni̱, omui mu batabani̱ be eku̱mi̱ na babili, aaghenda aalaala na Bbi̱i̱la, mukali̱ wee onji. Yakobbo‡35:22 Bbai̱bbu̱li̱ sinji sikumughilaghamu I̱saaleeli̱. aakimanya.

23 Baana aba Yakobbo aabyayʼo Leei̱ya niibo bani: Leu̱bbeeni̱ wa mu̱li̱ghaaso, Si̱mi̱yooni̱, Leevi̱, Yu̱da I̱sakaali, hamui na Jabbu̱looni̱.

24 Baana aba Yakobbo aabyayʼo Lakeeli̱ niibo bani: Yojeefu̱ na Bbenjami̱i̱ni̱.

25 Baana aba Yakobbo aabyayʼo Bbi̱i̱la mu̱syana wa Lakeeli̱ niibo bani: Daani̱ na Nafutaali.

26 Baana aba Yakobbo aabyayʼo Ji̱li̱pa mu̱syana wa Leei̱ya niibo bani: Gaadi̱ na Aseli̱. Bani niibo baana baa Yakobbo aabyaye obu aabaagha anali Padanalaamu.

27 Yakobbo aaghenda ewaabo e ka mu kyalo kya Mami̱le kulola ese wee I̱saka. Kyalo eki endindi bakwete kughilamu Hebbu̱looni̱. Ebbulahi̱mu̱ na I̱saka nabo dhee bakaba mbaakaayʼo mu kyalo eki. 28 I̱saka aamala myaka 180 ya bukulu. 29 Aaku̱wa akaakuliiye kimui. Batabani̱ be Yakobbo na Esau baamujiika.