2
1 Nku̱ni̱i̱na kandi neemilile mu ngbaali yanje nga mu̱li̱ndi̱.
Nkuukala eghulu eghi,
ninaloli̱ye kandi ninalindiliiye ku̱u̱ghu̱wa eki Mukama akungambila
kandi ngoku akukuukamu kutongana kwanje.
Mukama naatodha kukuukamu
2 Mukama ankuukamu ati,
“Ebi waaboone mu kubonekeluwa,
obihandiike kusemeeye haa bihande bya mabaale,
niikuwo bidhoote kubisoma.
3 Ebi nkukwoleka mu kubonekeluwa bikubʼo mu bwile obu neenini naataayʼo.
Weesighe ebi naabu̱ghi̱ye ngoku bikubʼo.
Bikugubha kubʼo haanu̱ma ya bwile bukani̱ye,
bhaatu ookale olindiliiye nanga bili na kubʼo haa bwile bwabiyo bwonini.
4 “Olole, ngi̱ghu̱ yaatu niibuwo eepanka
kandi taabbali̱ye kukola ebi̱hi̱ki̱ye.
Bhaatu muntu oghu ahi̱ki̱li̱i̱ye akuba mwomi̱i̱li̱ haabwa ku̱hi̱ki̱li̱ja kuwe.
5 “Vi̱i̱ni̱ na buguudha bikudimaagagha Bakaladi̱ya.
Bantu aba bali na mululu, myepanko
kandi tabakuhuumulagha kukola bintu bi̱bhi̱i̱hi̱ye.
Bali nga lu̱ku̱ kandi eku̱li̱mu ebitaakuukutagha.
Bakubbalagha mahanga ghoona kuba ghaabo
kandi bakukwatagha bantu bakani̱ye kuba banyankomo baabo.”
6 “Kilo kimui banyankomo baa Bakaladi̱ya aba bakubasekeelela mbaghila bati,
“ ‘Ngamulikibona enu̱we abakubiikagha bintu ebitali byanu ebi mwabhi̱yʼo
bantu bʼomu mahanga ghanji!
Buuye mukweyongela kukola eki ku̱hi̱ki̱ya dhi̱?’
7 Bantu abeeholeei̱ye enu̱we bya buguudha bwabo,
bakwisa bwangu kubalu̱mba mutamani̱ye.
Bakwisa kutwala bintu byabo kandi mukwobaha kwonini.
Bakwisa kubahu̱ngʼo bintu ebi.
8 Mwabhi̱ye bintu ku̱lu̱gha mu bantu bʼomu mahanga ghakani̱ye.
Mwati̱ye bantu bakani̱ye bʼomu mahanga,
mwahwelekeeleli̱ya nsi yabo na bibugha byabo.
Nahabweki bantu abanati̱ghaayʼo banali boomi̱i̱li̱ bakwisa kwibhʼo enu̱we
bintu bya mughaso.
9 “Ngaalikibona muntu oghu akweye ka yee haabwa bintu ebi ahu̱ngi̱ye,
oghu akweye numba esemeeye kandi egu̱mi̱ye hambali akangami̱ye,
niikuwo kabhi katabʼo bantu be.
10 Waahemuuye ka yaawe haabwa kwita bantu bakani̱ye
kandi weeleeteleja kuhwelekeelela weenini.
11 Mabaale agha mu̱kwehi̱ye bisiika bya manumba ghaanu ghakubanyegheelela
kandi na fuleemu esi mu̱kwehi̱ye haa lusui si̱ku̱bu̱gha dhee ebi nʼelaka lyamaani̱.
12 “Ngaalikibona muntu oghu akukwelagha tau̱ni̱ haabwa kwita bantu
kandi aleka kibugha kikula-kulana haabwa kukola bintu bi̱bhi̱i̱hi̱ye!
13 Olole, Mukama wa mahe aatu̱u̱yemu ku̱hwelekeeleli̱ya na mulilo,
manumba ghoona agha bantu abakukolagha bintu bi̱bhi̱i̱hi̱ye ebi bakukwela
kandi maani̱ ghaabo baakoleeseei̱ye ghakuba ghakwi̱li̱i̱ye busa.
14 Nanga ngoku maasi ghakuusulagha mu nanja,
niikuwo nsi yoona ekuusulamu
kumanya ngoku Mukama ali na ki̱ti̱i̱ni̱sa.
15 “Ngaalikibona muntu oghu akuhaagha baliilanuwa be maaluwa.
Abahambi̱li̱ja kutamiila ku̱hi̱ki̱ya beetu̱u̱bbu̱u̱ye
niikuwo agubhe kubona mihina yabo.
16 Mukama akufubila enu̱we
kandi aleke munuwe kiikopo kya vi̱i̱ni̱ esaaliiye.
Mukutamiila kandi bantu bakubona mihina yaanu.
Mu ki̱i̱kalo kya bantu ku̱hu̱ti̱ya enu̱we,
mukuhemuka kandi bantu bakubaghaya.
17 Mukakola kubhi bantu bʼomu Lebbanooni̱
kandi mwata binyama byamu byʼomu kisaka.
Mukufubiluwa kwonini haabwa kukola kintu eki.
Mwati̱ye bantu bakani̱ye kandi mwahwelekeeleli̱ya nsi yabo na bibugha byabo.
18 “Buuye kisasani̱ kili na mughaso ki
kandi kikugubha ki̱ti̱ya kukoonela muntu?
Ni kisasani̱ eki muntu akoli̱ye kya luhanga wa bisubha
kandi kikulekagha bantu baha butumuwa bwa bisubha.
Ni kintu kya budhoma muntu kwesigha eki akoli̱ye eenini,
kuba luhanga oghu ataakugubha nankabha ku̱bu̱gha!
19 Ngaalikibona muntu oghu akughilagha kintu eki̱koleeu̱we mu lubbaau ati, ‘Osu̱su̱mu̱ke!’
Aghila ebaale elitaaku̱bu̱ghagha ati, ‘Oomuke!’
Buuye kisasani̱ kikugubha kwegheesi̱ya?
Ni kintu baswi̱ki̱ye feeja kandi siliva,
bhaatu takili na bwomi̱i̱li̱.
20 Bhaatu Mukama ali mu numba yee ehi̱ki̱li̱i̱ye.
Oleke nsi yoona eekale eholeei̱ye mu maaso ghe.”