3
Nsaala ya Habbaku̱u̱ki̱
1 Nsaala ya mulangi̱ Habbaku̱u̱ki̱ kusighikila haa elaka lya Ki̱si̱gi̱yonoti̱.
2 Ai̱ Mukama, naaghu̱u̱ye makulu aghakukwetʼo
kandi ebi okukolagha, nahabweki nku̱ku̱hu̱ti̱ya.
Gutu otodhe okole mu bwile bwatu buni bintu byamaani̱ ebi waakolagha
kandi oosuke kutughilila kisa, nankabha osaaluuwe.
3 Mu kubonekeluwa, naabona Luhanga naalu̱gha mu di̱si̱tu̱li̱ki̱ti̱ ya Temaani̱*3:3 Temaani̱ ekaba eli di̱si̱tu̱li̱ki̱ti̱ mu ehanga lya Edomu.
kandi oghu Ahi̱ki̱li̱i̱ye oghu naalu̱gha haa mwena Palaani̱.
Ki̱ti̱i̱ni̱sa kiye kyaswi̱ki̱la mwanya ghwona
kandi bantu baa munsi yoona baamusindagha.
4 Aabbebbeniyagha nga musana,
kubbyoka nga kwa nkubha kwalu̱ghagha haa mukono ghuwe
kandi mu kubbyoka oku niiyo aabaagha abi̱si̱ye maani̱ ghe.
5 Ndwala sya kabhi syaghendagha simuhikiiye
kandi bifubilo bya lu̱ku̱ bimulabhi̱ye enu̱ma.
6 Obu aamiliiye, nsi yaatandika kudhinga-dhinga.
Obu aaloli̱ye haa mahanga, bantu baamu baatandika kutukumila.
Myena eghi ekaba eliyo bilo nʼebilo yeegenga
kandi bwena obwabaaghʼo ku̱lu̱gha hambele bwatikaatika.
Ebi niibiyo byabaagha bihanda biye bya bilo nʼebilo.
7 Naabona bantu bʼomu ntu̱la ya Bakusaani̱ boobahi̱ye mu weema syabo
kandi Banami̱di̱yaani̱ mbatukumila mu maka ghaabo.
8 Ai̱ Mukama, buuye maasi niigho ghaaleki̱ye waasaaliluwa?
Maasi ghakusenda niigho ghaaleki̱ye waakwatuwa ki̱i̱ni̱gha otiyo?
Buuye nanja niiyo yaaleki̱ye waasaaliluwa kwonini,
obu waani̱i̱ni̱ye haa nkai̱na syawe
kandi haa bigaali̱ byawe bya bu̱si̱ngu̱li̱?
9 Nuuwe waateekani̱i̱je buta bwawe
kandi waataamu bimala byawe kubhasula.
Nuuwe okwati̱yagha nsi kandi maasi ghalu̱ghamu.
10 Obu myena yaakuboone yaatandika kutukumila.
Mbu̱la yaatoona ku̱lu̱gha mu mwanya kandi yaaleka maasi ghatungeela.
Nanja yaasula kandi mighina yaatandika kusamba.
11 Musana na kweli̱ byemilila mu bi̱i̱kalo byabiyo,
obu bimala byawe ebikwete kubbebbeniya byasaalagha mbi̱li̱gi̱ta
na eti̱mu̱ lyawe elikwete kubbyokelela.
12 Waasaaliiye munsi osaaluuwe
kandi waakpeetaaga mahanga oli na ki̱i̱ni̱gha kyamaani̱.
13 Waaghenda kucungula bantu baawe aba waakomi̱yemu
kandi kujuna mukama oghu waaseesi̱yʼo mafu̱ta.
Waakpeetaagula mwebembeli̱ wa ehanga lya bantu babhi
kandi waamu̱tu̱u̱bbu̱la ngoye ku̱lu̱gha haa mutuwe ku̱hi̱ka mu maghulu.
14 Waatu̱bhi̱ta mwebembeli̱ oghu mu mutuwe nʼeti̱mu̱ liye lyonini
kandi waahwelekeeleli̱ya mahe ghe.
Baasilikale be baasa nga kyegha kutulalangi̱ya badheedheeu̱we,
mbeeli̱li̱kana bati baku̱tu̱si̱ngu̱la bwangu nga bantu banaku kandi baceke.
15 Waakpeetaaga nanja na nkai̱na syawe
kandi waaleka maasi ghaa nanja ghatandika kutukumila.
16 Obu naaghu̱u̱ye ebi byona noobaha, mi̱nu̱wa yaatandika kuntukumila
kandi maku̱wa ghanceka.
Maghulu ghatandika kuntukumila kandi ntaagubha kulubhatanga!
Bhaatu naakala mpoleei̱ye
kandi naalindilila kilo kya kabhi
eki Luhanga akufubila abakwete ku̱tu̱lu̱mba.
17 Nankabha bimole bitatuwa haa biti mi̱ti̱i̱ni̱,
kedha mi̱jaabbi̱i̱bbu̱ etaani̱yʼo bi̱ghu̱ma,
kedha biti oli̱va bitaani̱yʼo bi̱ghu̱ma,
kedha misili eteeli̱ya byokuliya,
kedha ntaama sikwete ku̱kwi̱la haa bwena,
kedha nte sitali mu bigho byasiyo,
18 bhaatu si̱ye nkudheedhuwa kandi nsemeeleluwe,
nanga Mukama Luhanga niiye Mu̱ju̱ni̱ wanje.
19 Mukama Luhanga niiye akumpaagha maani̱.
Akufoolagha maghulu ghanje kuba nga ghaa ngabi
kandi aleka ndubhatangila haa bi̱i̱kalo bikangami̱ye.
Ewaa mukulu wa bilimbo, naakoleesi̱ya du̱ngu̱.