1 Bantu baa Efulahi̱mu̱ baaghila Gi̱di̱yooni̱ bati, “Waatu̱koli̱ye otiyo bwaki? Nkiki kyaleki̱ye otaatubilikila obu waaghendi̱ye kulwana na Banami̱di̱yaani̱?” Baamusoghosa basaakaaye.

2 Bhaatu aabaghila ati, “Eki naagu̱bhi̱ye kukola, takyengaane nʼeki enu̱we mwakoli̱ye. Eki enu̱we bantu baa Efulahi̱mu̱ mwakoli̱ye kisaai̱ye kwonini byona ebi ntu̱la yaatu ya Abyejeeli̱ yaakoli̱ye. 3 Luhanga aabahaaye mu mukono ghwanu bakulu baa mahe baa Banami̱di̱yaani̱, Olebbu na Jeebbu. Buuye eki mwakoli̱ye takisaai̱ye eki si̱ye naakoli̱ye?” Obu baaghu̱u̱ye eki, baaleka kusaaliluwa.

4 Gi̱di̱yooni̱ na basaasa be bi̱ku̱mi̱ bisatu baahi̱ka haa maasi Yolodaani̱ kandi baaghabhasuka, nankabha mbaabaagha baluwakaki̱ye, baakala mbanahuma ngi̱ghu̱ syabo. 5 Obu baaki̱dhi̱ye mu kibugha kya Su̱kooti̱, aaghambila basaasa bʼomu tau̱ni̱ eghi ati, “Gutu muhe basaasa banje byokuliya nanga baluwakaki̱ye kandi niibuwo naanahuma Jebba na Jalumuna, bakulu baa mahe baa Mi̱di̱yaani̱.”

6 Bhaatu bakulu baa mahe bʼomu kibugha kya Su̱kooti̱ baaghila bati, “Buuye mwakwete Jebba na Jalumuna niikuwo tuhe mahe ghaawe byokuliya?”

7 Gi̱di̱yooni̱ aaghila ati, Mukama akaakuleka ninaasi̱ngu̱la Jebba na Jalumuna, nkukuuka mbahuuliye bibbooko bya mahuwa ghaa mu kisaka. 8 Gi̱di̱yooni̱ aalu̱gha mu kibugha kya Su̱kooti̱ aaghenda mu kibugha kya Peneeli̱, aasaba bantu baayo nga eki aasabi̱ye bantu baa Su̱kooti̱, bantu aba baamukuukamu nga eki bantu baa Su̱kooti̱ baamu̱ku̱u̱ki̱yemu. 9 Aaghila bantu baa Peneeli̱ ati, “Nkaakumala ku̱si̱ngu̱la bakama aba, nkukuuka kandi nkugenga hansi ngbaali yaanu eni.”

10 Bwile obu Jebba na Jalumuna bakaba bali mu kyalo kya Kali̱kooli̱ na mahe ghaabo aghaabaaghamu basaasa mutwalo ghumui na nku̱mi̱ etaano, abaabaagha bati̱ghaaye haa mahe ghaa bantu baa bu̱lu̱gha ejooba, nanga basaasa baabo balwani̱ mitwalo eku̱mi̱ nʼebili bakaba mbaabaati̱ye. 11 Gi̱di̱yooni̱ aakwama kihanda ekili haa kumaliilila kwa kiigbete, kya bu̱lu̱gha ejooba bwa Nobba na Yogobbeha, aalu̱mba mahe agha ghatamani̱ye. 12 Bakama babili Banami̱di̱yaani̱, Jebba na Jalumuna baali̱gi̱ta, bhaatu Gi̱di̱yooni̱ aabahuma kandi aabakwata, aaleka mahe ghaabo ghoona ghoobaha.

13 Obu Gi̱di̱yooni̱ mutabani̱ wa Yowaasi aabaaye naakuuka ku̱lu̱gha haa bulemo, aakwama mu kibugha kya Helesi̱. 14 Aakwata mutabhana wa mu kibugha kya Su̱kooti̱, aamu̱bu̱u̱li̱ya kumughambila mali̱i̱na ghaa beebembeli̱ baa tau̱ni̱ eghi. Mutabhana oghu aamuhandiikila mali̱i̱na nsanju̱ na musanju̱. 15 Gi̱di̱yooni̱ aaghenda aaghambila basaasa baa mu kibugha kya Su̱kooti̱ ati, “Jebba na Jalumuna mbani! Mukuusuka ngoku mwabhengi̱ye kunkoonela? Mwabhenga kuha basaasa banje byokuliya abaabaagha baluwakaki̱ye, mwaghila muti nanga nkaba ntakwete Jebba na Jalumuna?” 16 Gi̱di̱yooni̱ aakwata beebembeli̱ baa kibugha kya Su̱kooti̱ eghi kandi aabaha kifubilo kya kuhuuluwa bibbooko bya mahuwa ghaa mu kisaka. 17 Aagenga hansi ngbaali yʼomu kibugha kya Peneeli̱ kandi aata basaasa boona bʼomu tau̱ni̱ eghi.

18 Aabu̱u̱li̱ya Jebba na Jalumuna ati, “Basaasa aba mwatiiye mu kibugha kya Tabbola bakaba bali baa mulingo ki?”

Baamukuukamu bati, “Bakaba bali ngoku uwe oli, nabo dhee niikuwo baabaagha. Bakaba bali nga batabani̱ baa mukama.”

19 Gi̱di̱yooni̱ aaghila ati, “Bakaba bali baana baa maaha, tubyahuwe nabo etundu limui. Nkulahila ewaa Mukama mwomi̱i̱li̱, nguli mutaabaati̱ye, nanje tanangwi̱ti̱ye enu̱we.” 20 Niibuwo aaghi̱li̱ye Yeteeli̱ mutabani̱ wee mukulu ati, “Obaate!” Bhaatu Yeteeli̱ oobaha kubhulayo kihiyo kiye kubaata, nanga akaba anali mutabhana muto.

21 Jebba na Jalumuna baaghila Gi̱di̱yooni̱ bati, “Wiise, weenini otwi̱te, nanga ngoku muntu ali, niikuwo na maani̱ ghe ghali.” Gi̱di̱yooni̱ aata Jebba na Jalumuna, aatwala bukwanji obwabaagha mu bikiya bya ngamila syabo.

22 Niibuwo Banai̱saaleeli̱ baaghi̱li̱ye Gi̱di̱yooni̱ bati, “Otuleme, uwe na mutabani̱ waawe na muusukulu waawe, nanga waatu̱ju̱ni̱ye mukono ghwa Banami̱di̱yaani̱.”

23 Gi̱di̱yooni̱ aabaghila ati, “Tankubalema kandi mutabani̱ wanje taakubalema, Mukama niiye akubalema.” 24 Gi̱di̱yooni̱ aabaghila ati, “Oleke mbasabe kini, bu̱li̱ omui mu enu̱we ampe mpete esili mu matui esi aahu̱ngi̱yʼo ngi̱ghu̱ syatu.” (Ekaba eli asi̱li̱ ya Banasumai̱li̱ basaasa ku̱lu̱wala mpete sya feeja mu matui.)

25 Baakuukamu bati, “Tukukuha siyo tu̱dheedheeu̱we.” Baala hansi kooti̱, bu̱li̱ musaasa aakubʼo mpete syʼomu matui esi aahu̱ngi̱ye haa bulemo. 26 Mpete sya feeja esi Gi̱di̱yooni̱ aatu̱ngi̱ye, syahi̱ka haai ki̱lo maku̱mi̱ abili otabaliiyemu bintu bisemeeye, bukwanji, na ngoye mutuku esi bakama baa Mi̱di̱yaani̱ baalu̱walagha kedha nkoba syomu bikiya bya ngamila syabo. 27 Gi̱di̱yooni̱ aakola kisasani̱*8:27 Bbai̱bbu̱li̱ sinji sighambi̱ye efodi̱. ku̱lu̱gha mu mpete sya feeja esi kandi aakita mu tau̱ni̱ yʼewaabo Ofula. Banai̱saaleeli̱ boona baaba nga baamalaaya kandi baalami̱ya kisasani̱ eki kandi kyafooka ki̱ki̱ya ewaa Gi̱di̱yooni̱ na bantu baa ka yee.

28 Nahabweki Banai̱saaleeli̱ baasi̱ngu̱la Banami̱di̱yaani̱ kandi Banami̱di̱yaani̱ tabaatodhi̱ye baba na maani̱ ghaa ku̱lu̱mba I̱saaleeli̱. Nsi eghi yaatunga bu̱si̱nge haabwa myaka maku̱mi̱ anaa eghi Gi̱di̱yooni̱ aamali̱ye anaakaaye.

29 Yelubbaali mutabani̱ wa Yowaasi, aaghenda aakala ewe e ka. 30 Gi̱di̱yooni̱ aabyala baana baabusaasa nsanju̱, nanga akaba ali na bakali̱ bakani̱ye. 31 Akaba ali na mukali̱ onji mu kibugha kya Sekeemu, naye dhee aamubyalila mwana wabusaasa kandi Gi̱di̱yooni̱ aamuluka li̱i̱na Abbi̱meleeki̱. 32 Gi̱di̱yooni̱ mutabani̱ wa Yowaasi aaku̱wa akaakuuye kwonini kandi baamujiika mu kituulo†8:32 Mu asi̱li̱ ya Bahebbulaayo, bu̱li̱ ka yaalimagha kihulu mu kikuka hambali baajiikagha bantu baabo. Kini kili dhee mu nsuula 16:31. eki baaji̱i̱ki̱yemu ese wee Yowaasi mu kibugha kya Ofula mu ntu̱la ya Banabyejeeli̱.

33 Obu Gi̱di̱yooni̱ aaku̱u̱ye, Banai̱saaleeli̱ baatodha baalu̱ghʼo Luhanga kandi baalami̱ya Baabbaali̱ kandi baafoola Bbaali̱-bbeli̱ti̱ kuba luhanga wabo. 34 Bantu baa I̱saaleeli̱ baabululuwa Mukama Luhanga wabo, oghu akabajuna ku̱lu̱gha mu mikono ya ngi̱ghu̱ syabo baa bu̱li̱ luhande. 35 Baasaaghuwa dhee kughilila kisa ka ya Yelubbaali (oghu ni Gi̱di̱yooni̱) haabwa bilungi byona ebi aakoleeye Banai̱saaleeli̱ aba.