Kitabo kya
Yoweeli̱
Kwanjula
Mulangi̱ Yoweeli̱ tabamu̱bu̱ghi̱yʼo mu bitabo binji byʼomu Ndaghaano Nkulu kandi bwile obu kitabo kini kyahandi̱i̱ku̱u̱wemu tababumani̱ye. Bamui mu bantu abasomi̱ye bya Bbai̱bbu̱li̱ bakweli̱li̱kanagha bati kikahandiikuwa obu Mukama Yowaasi aabaaghʼo, haagati ya mwaka ghwa lunaanaa na maku̱mi̱ asatu nʼetaano na lusanju̱ kyenda na mukaagha Ki̱li̱si̱to atakabyauwe. Bhaatu banji baaghila bati kikahandiikuwa haanu̱ma ya mwaka ghwa bi̱ku̱mi̱ bitaano na maku̱mi̱ asatu na munaanaa, haanu̱ma ya bantu baa Yu̱da bakani̱ye kukuuka mu ehanga lyabo. Mulangi̱ Yoweeli̱ aakalagha mu kyalo kya Yu̱da, haai na kibugha kya Yelusaalemu.
Kitabo kini ki̱bu̱ghi̱yʼo kabhi kaamaani̱ kaa njighe na kyanda ebyabaayʼo mu kyalo kya Yu̱da, bintu ebi bikaba bili kaakulolelʼo kaa “Kilo kya Mukama” kya ku̱twi̱la bantu musango.
Kitabo kini ki̱ghi̱li̱ye kiti, kaakuba bantu beekuukamu, bakughaniluwa kandi bakuba kusemeeye mu bilo byʼomu maaso kusaali̱ye bwile obwasaaye. Bulangi̱ bwa Yoweeli̱ bukaba bulimu dhee kulaghi̱i̱sani̱ya kwa kwisa kwa Mwoyo Ahi̱ki̱li̱i̱ye kandi kulaghi̱i̱sani̱ya oku kukaasuliisibuwa haa kilo kya Pentekooti̱ (Bikoluwa 2:16-21).
1
1 Buni niibuwo butumuwa obu Mukama aahaaye Yoweeli̱ mutabani̱ wa Pesweli̱.
Ku̱lu̱mba kwa Njighe
2 Mu̱u̱ghu̱we kini, enu̱we beebembeli̱,
mu̱tegheeleli̱ye enu̱we bantu abaakaaye mu kyalo kya Yu̱da.
Buuye mu bwile bwanu bwona
kedha mu bwile obu baataata baanu baabaaghʼo,
kintu nga kini kyalabaayʼo?
3 Mukighambile baana baanu,
baana baanu bakighambile baana baabo
na baana baabo bakighambile mujo oghukulabhʼo.
4 Ebi njighe sikani̱ye syʼoku̱du̱bha syati̱ghi̱yʼo,
njighe siinamu̱li̱to syamaani̱ syakabili syabiliiye.
Ebi njighe siinamu̱li̱to syamaani̱ syakabili syati̱ghi̱yʼo,
njighe esinali sito syakasatu syabiliiye.
Ebi njighe esinali sito syakasatu syati̱ghi̱yʼo,
njighe esi̱ku̱hwelekeeleli̱yagha syabiliiye byona.
5 Muumuke, enu̱we batami̱i̱li̱ kandi mulile!
Mutakangane enu̱we abakunuwaagha vi̱i̱ni̱.
Mutaaghe kwonini nanga tamukutodha kubona
vi̱i̱ni̱ mpyaka ya kunuwa.
6 Njighe sikaniiye kimui syalu̱mbi̱ye nsi yanje,
sili na maani̱ kandi sikaniiye kimui.
Taaliyo muntu oghu akugubha kusibala.
Njighe esi sili na maano nga ghaa ntale
kandi sikusabangula eki syati̱ye nga ntale ya bukali̱.
7 Njighe esi syahwelekeleei̱ye mi̱jaabbi̱i̱bbu̱ yanje
kandi syaliya biti mi̱ti̱i̱ni̱ byanje.
Njighe esi syaliiye bi̱ku̱ku̱ bya matai ghaa biti ebi,
ku̱hi̱ki̱ya ghaafooki̱ye ghanjelu.
8 Mulile nga mwana wabukali̱ mugholi,
oghu alu̱wete ngoye sya bujune haabwa oghu aabbalagha kumuswela ku̱ku̱wa.
9 Kihonguwa kya bilimuwa na kihonguwa kyakunuwa
byahooye mu numba ya Mukama.
Nahabweki bahongi̱ abaku̱heeleli̱yagha Mukama,
batuntuuye kwonini.
10 Bilimuwa byʼomu musili byahwelekeleeye
kandi etaka lyomi̱ye.
Bilimuwa byabhi̱i̱hi̱ye,
taakyaliyo vi̱i̱ni̱ mpyaka
kandi mafu̱ta ghaa biti oli̱va ghaahweleeye kimui.
11 Enu̱we boona bali̱mi̱, mutuntule!
Enu̱we boona abakukolagha misili ya mi̱jaabbi̱i̱bbu̱, mutakangane!
Mulile haabwa kutaba na ngano kandi bbaale,
nanga bilimuwa bya kukesa mu musili byona byahwelekeleeye.
12 Mi̱jaabbi̱i̱bbu̱ yoomi̱ye
kandi biti mi̱ti̱i̱ni̱ byahotoki̱ye.
Mikomamahanga, mba, biti apo
na biti byona byʼomu musili byomi̱ye
kandi bantu baaleki̱ye kudheedhuwa.
Bantu mbasabuwa kwekuukamu
13 Enu̱we bahongi̱, mu̱lu̱wale ngoye sya bujune kandi mulile.
Enu̱we abaku̱heeleli̱yagha haa kyakuhongelʼo bihonguwa, mutakangane.
Enu̱we boona abaku̱heeleli̱yagha Luhanga wanje, mutaahe mu numba ya Luhanga
kandi mu̱lu̱waale ngoye sya bujune mukilo yoona.
Nanga kihonguwa kya bilimuwa na kihonguwa kyakunuwa,
byahooye mu numba ya Luhanga waanu.
14 Mulangilile bantu ku̱si̱i̱ba
kandi mubabilikile kuba na kusanga-sangaana ku̱hi̱ki̱li̱i̱ye.
Mubilikile beebembeli̱ na bantu boona bʼomu kyalo kini
kwisa haa numba ya Mukama Luhanga waanu
kandi mutaaghile Mukama.
15 Kilo kya Mukama kili haai ku̱hi̱ka!
Kilo eki wa Bu̱toki̱ Bwona akuleeta kuhwelekeelela.
Kilo eki kikuba kya kabhi kwonini!
16 Buuye bilimuwa byatu tabyahwelekeleeye tunaloli̱ye?
Buuye kudheedhuwa kandi kusemeeleluwa tabyahooye
mu numba ya Luhanga waatu?
17 Nsigho syomeeye mu etaka,
sitoowa tasilimu kantu
kandi nguli syegengi̱ye
nanga bilimuwa byomi̱ye.
18 Nte niibuwo syatakangana
kandi niibuwo syalalanga
haabwa kubuluwa bi̱si̱ngo.
Ntaama sikani̱ye na mbu̱li̱ niibuwo byabona-bona.
19 Ai̱ Mukama, nuuwe nkwete kutaaghila.
Nanga mulilo ghwokeei̱ye bi̱si̱ngo byona byʼomu kisaka
kandi ghwahwelekeeleli̱ya biti byona byʼomu musili.
20 Binyama byʼomu kisaka niibuwo byakutaaghila,
nanga maasi ghakusenda ghoomi̱ye
kandi mulilo ghwahwelekeleleei̱ye bi̱si̱ngo byona byʼomu kisaka.