2
Njighe sikaniiye kimui
1 Muteele ki̱i̱di̱yo kandi nduulu,
haa mwena ghwanje ghu̱hi̱ki̱li̱i̱ye Sayu̱u̱ni̱.
Oleke bantu boona abaakaaye mu kyalo kya Yu̱da batukumile,
nanga kilo kya Mukama kili haai ku̱hi̱ka.
2 Kilo eki kikuba kilo kya mweli̱ma kandi kya kusaaliluwa.
Bicu bikukwata haa kilo eki kandi hakubʼo mweli̱ma ghwamaani̱.
Njighe sikaniiye kimui kandi syamaani̱ nga mahe
si̱ku̱swi̱ki̱la myena nga bicu binjilaghu̱li̱.
Kintu nga eki takikabaaghʼo ku̱lu̱gha hambele
kandi takilitodha kubʼo mu mijo yoona eghi ekwisa.
3 Njighe esi si̱ku̱hwelekeeleli̱ya bu̱li̱ kintu nga mulilo
kandi taaliyo ekikugubha kuuluka.
Njighe esi sitakaasi̱ye, nsi ekaba eli nga musili ghwa Edeni̱,
bhaatu haanu̱ma yasiyo, nsi eli nga elungu.
4 Njighe esi si̱su̱si̱ye nga nkai̱na
kandi si̱ku̱li̱gi̱tagha nga nkai̱na esikughenda haa bulemo.
5 Elaka lya maki̱nde ghaasiyo lili nga lya bigaali̱ bikani̱ye.
Sikuhalalagha bwangu haagu̱u̱li̱ ya myena nga mulilo ghu̱ku̱hu̱u̱li̱kanga kwoki̱ya bi̱si̱ngo byomi̱ye.
Njighe esi sili nga mahe ghaamaani̱ gheeteekani̱i̱je kulwana.
6 Bantu bakaakubona ngoku njighe esi sikwete kwisa,
maaso ghakubatukula kandi boobahe.
7 Si̱ku̱lu̱mba bilimuwa byatu nga baa mahe baamaani̱
kandi si̱ku̱ni̱i̱na haa bisiika nga baasilikale.
Njighe esi syona sikughendela mu lai̱ni̱ emui
kandi taaliyo ekikusitanga.
8 Si̱ku̱li̱gi̱ti̱la mu lai̱ni̱ kandi tasi̱ku̱ti̱ngi̱tana.
Nankabha bantu basikubila mati̱mu̱ na bipanga, tasikwemilila.
9 Si̱ku̱li̱gi̱ta ku̱lu̱mba kibugha
kandi si̱ku̱ni̱i̱na haa bigho byakiyo.
Sikukwamila mu madi̱li̱sa kutaaha mu manumba ghaatu nga musuma.
10 Njighe esi sikuleka nsi edhinga-dhinge
kandi mwanya ghutukumile.
Mweli̱ma ghu̱ku̱swi̱ki̱la musana na kweli̱
kandi nsooli̱ya sikuleka ku̱bbeni̱ya.
11 Mukama niiye akudhuumilagha mahe ghe,
nanga ghalimu baasilikale bakani̱ye aba muntu ataakugubha kubala.
Abaku̱hu̱ti̱yagha ebi alaghiiye bakubaagha baamaani̱.
Nanga kilo kya Mukama nkyamaani̱
kandi kikuleka bantu boobahe.
Ni ani̱ akugubha ku̱ki̱gu̱mi̱si̱li̱ja?
Bantu mbasabuwa kwekuukamu
12 Mukama niibuwo aaghila ati, “Munkuukʼo na mitima yaanu yoona,
mu̱si̱i̱be, mulile kandi mweghunge.
13 Mutatemula bi̱lu̱waalo byanu kwoleka ngoku mutuntuuye
bhaatu mwoleke haa mitima yaanu ngoku mweghu̱ngi̱ye.”
Mukuuke ewaa Mukama Luhanga waanu,
nanga ali na ngughuma kandi kisa.
Taakusaaliluwagha bwangu,
ali na kukunda kwamaani̱ kandi taabbali̱ye kubafubila.
14 Buuye ni ani̱ amani̱ye? Mukama Luhanga waanu akugubha kuhindula byeli̱li̱kano biye,
abahe mu̱gi̱sa ghwa kweli̱ya bilimuwa bikani̱ye
niikuwo mugubhe kuhongela Mukama Luhanga waanu
kihonguwa kya bilimuwa na kyakunuwa.
15 Muteele ki̱i̱di̱yo mu Sayu̱u̱ni̱,
mulangilile bantu ku̱si̱i̱ba
kandi mubabilikile kuba na kusanga-sangaana ku̱hi̱ki̱li̱i̱ye.
16 Mukumaani̱ye bantu boona
kandi mweli̱ye ki̱bbu̱la kya bantu abeekumaani̱i̱ye aba.
Mubilikile beebembeli̱ baa bantu,
baana bato nankabha nkelembe abakwete kwonka.
Mugholi wabusaasa alu̱ghe mu kisiika kiye
na mugholi wabukali̱ alu̱ghe hambali akwete kulaala.
17 Oleke bahongi̱, abaku̱heeleli̱yagha Mukama,
beemilile haagati ya kyakuhongelʼo bihonguwa na mulyango ghwa numba ya Luhanga,
balile kandi baghile bati,
“Ai̱ Mukama, oghilile kisa bantu baawe abali bugwetuwa bwawe.
Otasi̱i̱mi̱lani̱ya bantu baa mahanga ghanji kutughaya kandi kutusekeelela,
niikuwo bantu bʼomu mahanga agha baleke ku̱bu̱u̱li̱ya bati, ‘Luhanga waanu ali haa?’ ”
Mukama naaha nsi eghi mu̱gi̱sa
18 Du̱mbi̱ Mukama aafuwʼo kwonini nsi yee eghi
kandi aaghilila bantu be kisa.
19 Mukama aakuukamu bantu be aba naaghila ati,
“Olole, nkubaha bilimuwa, vi̱i̱ni̱ mpyaka na mafu̱ta ghaa biti oli̱va.
Mukuliya kandi muukute.
Tankutodha ku̱si̱i̱mi̱lani̱ya bantu baa mahanga ghanji kusekeelela enu̱we.
20 “Njighe sikani̱ye nga mahe syʼelughulu hambali haseli̱ye naanu,
nkusibhinga sighende mu elungu.
Njighe syamaani̱ esihikiiye, nkusikuba mu nanja ya bu̱lu̱gha ejooba
kandi esili enu̱ma, nkusikuba mu nanja ya bughuwa ejooba.
Mi̱ku̱ yasiyo eku̱gu̱nda kandi enu̱nke kwonini,
haabwa bintu byamaani̱ bi̱bhi̱i̱hi̱ye ebi syakoli̱yʼo enu̱we.”
21 Enu̱we bantu abali mu nsi yanje, mutoobaha.
Mudheedhuwe endindi kandi musemeeleluwe,
nanga Mukama aakoli̱ye bintu byamaani̱.
22 Enu̱we binyama bya mu kisaka, mutoobaha,
nanga bi̱si̱ngo bya mu kisaka byatooye.
Biti niibuwo byana bi̱ghu̱ma byabiyo
kandi biti mi̱ti̱i̱ni̱ na mi̱jaabbi̱i̱bbu̱ byani̱yʼo bi̱ghu̱ma bikaniiye kimui.
23 Enu̱we bantu baa Sayu̱u̱ni̱ mudheedhuwe kwonini.
Musemeeleluwe haabwa eki Mukama Luhanga waanu aabakoleeye.
Nanga mbu̱la eghi akubahaagha ekwolekagha ngoku ali mwesighibuwa.
Aabahaaye mbu̱la ekani̱ye mu bwile bwa elobe
na bwa kyanda ngoku aakolagha.
24 Bilimuwa bikuusula mu bi̱i̱kalo hambali mukusihilagha
kandi binagha byanu bikuusulamu vi̱i̱ni̱ na mafu̱ta.
25 Nkubaku̱u̱ki̱li̱ya ebi mwafeeleeu̱we
mu myaka eghi njighe syaliiye bilimuwa byanu,
njighe siinamu̱li̱to syamaani̱ na njighe esinali sito,
njighe sinji sikaniiye kimui
na njighe esi̱ku̱hwelekeeleli̱yagha byona,
njighe siinamu̱li̱to syamaani̱ esi nga mahe, ni̱i̱si̱ye nkasituma ku̱lu̱mba enu̱we.
26 Mukuliya byokuliya muukute ngoku mubbali̱ye,
niikuwo musinde Mukama Luhanga waanu,
haabwa kubakolela byakuswekani̱ya
kandi enu̱we bantu banje tamukutodha kuhemuka.
27 Mukumanya ngoku niikaaye mu Banai̱saaleeli̱
kandi ngoku ndi Mukama Luhanga waanu.
Mukumanya dhee ngoku hataliyo luhanga onji
kandi bantu banje tabakutodha kuhemuka.
Kilo kya Mukama
28 “Haanu̱ma yʼeki,
ndiseesa Mwoyo wanje haa bantu boona.
Batabani̱ na bahala baanu balilangilila,
basaasa bakulu baanu baliloota bilooto, batabhana baanu balibonekeluwa.
29 Nankabha baheeleli̱ya baabukali̱ na baabusaasa,
ndibaseesʼo Mwoyo wanje mu bilo ebi.
30 Ndikola byakuswekani̱ya mu mwanya kandi munsi,
halibʼo saghama, mulilo na mwi̱ka ghwamaani̱.
31 Musana ghulifooka mweli̱ma
kandi kweli̱ kulifooka saghama.
Ebi bilibʼo kilo kyamaani̱ kandi kya kwobahi̱i̱li̱li̱ya kya Mukama kitakahi̱ki̱ye.
32 Muntu weena oghu alibilikila
li̱i̱na lya Mukama alijunuwa.
Nanga haa mwena Sayu̱u̱ni̱ kandi Yelusaalemu
niiyo bantu bakutungila kucunguluwa,
ngoku Mukama aabu̱ghi̱ye
kandi mu bantu aba, hakubaamu dhee aba Mukama akubilikila.”