3
Kufubila bantu bʼomu mahanga ghanji
1 Mukama aaghila ati, “Mu bilo ebi kandi bwile obu,
nkutodha kuha mi̱gi̱sa bantu baa Yu̱da na Yelusaalemu.
2 Nkukumaani̱ya bantu bʼomu mahanga ghoona
kandi mbatwale mu kighona kya Yehosifaati.
Nkubatwi̱la musango mu kighona eki,
haabwa kukola kubhi bantu banje Banai̱saaleeli̱
abali bugwetuwa bwanje,
nanga bakalalangi̱ya bantu banje aba mu mahanga
kandi baatambulana nsi yanje.
3 Baakoma buluulu kutambulana bantu banje.
Baaghu̱li̱ya baana baabusaasa kusasula baamalaaya
kandi baaghu̱li̱ya baana baabukali̱ kughula vi̱i̱ni̱ ya kunuwa kandi kutamiila.
4 “Enu̱we bantu baa Ti̱lo, Si̱dooni̱ na byalo bya Bafi̱li̱si̱ti̱, mukwete kukola eki nangaaki? Buuye mukubbala kuhoola ngi̱ghu̱ ewanje? Nkubafubila bwangu haabwa eki mukwete kukola. 5 Mwatwete siliva, feeja na bintu byanje bya muhendo mu sitoowa sya manumba ghaa baaluhanga baanu. 6 Bantu bʼomu kyalo kya Yu̱da na kibugha kya Yelusaalemu mwabaghu̱li̱i̱ye Bagi̱li̱ki̱, niikuwo mubaaye mu nsi yabo kandi mubatwale hambali haseli̱ye.
7 “Mulole, nkuuya bantu banje aba hambali mwabaghu̱li̱i̱ye kandi eki mwabakoli̱ye, niikiyo nkukola enu̱we. 8 Nku̱ghu̱li̱ya batabani̱ baanu na bahala baanu bantu bʼomu kyalo kya Yu̱da kandi nabo baku̱ghu̱li̱ya baana aba mu Basebbeya abaakaaye mu ehanga li̱seli̱ye. Ni̱i̱si̱ye Mukama naabu̱ghi̱ye.”
9 Mulangilile bantu bʼomu mahanga muti,
“Mweteekani̱li̱je bulemo!
Mubilikile basaasa baanu baamaani̱.
Basaasa baanu boona balwani̱ baase ku̱lu̱mba.
10 Nsu̱ka syanu musiwiisemu bihiyo
kandi bisali̱li̱yo byanu mubiwiisemu mati̱mu̱.
Oleke muntu muceke aghile ati, ‘Ndi mulwani̱ wamaani̱!’
11 Mwise bwangu enu̱we boona mahanga agheeli̱ghi̱li̱li̱i̱ye I̱saaleeli̱
kandi mwekumaani̱li̱ye mu kighona.”
Ai̱ Mukama, osindike mahe ghaawe ghaamaani̱ ku̱lu̱mba bantu aba.
12 “Oleke bantu bʼomu mahanga ghoona,
baamuke kandi baghende mu kighona kya Yehosifaati.
Mu kighona eghi niiyo nkusitama kandi ku̱twi̱la musango
bantu bʼomu mahanga ghoona agheeli̱ghi̱li̱li̱i̱ye kyalo kya Yu̱da.
13 Mubajombe na si̱i̱ko, ngoku bakujombagha bilimuwa byeli̱ye.
Mubakpeetaagule nga bi̱ghu̱ma bya mi̱jaabbi̱i̱bbu̱
eesuuye mu ndeeba kukama kandi kuuyamu nsandi ku̱u̱su̱li̱ya binagha,
nanga bantu aba mbabhi munu.”
14 Bantu bakaniiye kimui
bali mu kighona kya ku̱twi̱lamu musango.
Nanga kilo kya Mukama,
kubatwi̱la musango mu kighona eki kili haai ku̱hi̱ka.
15 Bwile obu mweli̱ma ghu̱ku̱swi̱ki̱la musana na kweli̱
kandi nsooli̱ya sikuleka ku̱bbeni̱ya.
16 Mukama akwetanuka nga nkubha ku̱lu̱gha Sayu̱u̱ni̱
kandi elaka liye lyamaani̱ baku̱li̱i̱ghu̱wa ku̱lu̱gha Yelusaalemu.
Nsi na mwanya bikutandika kutukumila.
Bhaatu Mukama niiye buulukilo bwa bantu be
kandi kigho ki̱gu̱mi̱ye kya Banai̱saaleeli̱.
Kukula-kulana kwa bantu baa Yu̱da
17 Mukama aaghila ati, “Bwile obu mukumanya ngoku ndi Mukama Luhanga waanu,
oghu akuukalagha haa mwena ghwanje ghu̱hi̱ki̱li̱i̱ye Sayu̱u̱ni̱.
Yelusaalemu ekufooka kibugha ki̱hi̱ki̱li̱i̱ye
kandi baasilikale baa banamahanga tabakutodha kukikwata.
18 “Haa kilo kya Mukama eki, vi̱i̱ni̱ enuliliiye ekusenda ku̱lu̱gha mu myena
kandi mata ghakusenda ku̱lu̱gha mu bwena.
Maasi ghakusenda ku̱lu̱gha mu nsulo sya Yu̱da
kandi maasi ghaku̱lu̱gha mu numba ya Mukama
kandi ghasende mu kighona kya Si̱ti̱mu̱.*3:18 Bbai̱bbu̱li̱ sinji sighambi̱ye kighona kya bi̱i̱lu̱mbo.
19 Bhaatu ehanga lya Mi̱si̱li̱ likufooka kyalo ekitalimu bantu
kandi nsi ya Edomu ekufooka elungu,
nanga bakalu̱mba bantu baa Yu̱da
kandi baata bantu abatali na musango mu nsi eghi.
20 Bantu balaakalagha mu kyalo kya Yu̱da bilo nʼebilo
kandi mu kibugha kya Yelusaalemu mu mijo yoona.
21 Nkuhoola ngi̱ghu̱ Banami̱si̱li̱ na Banʼedomu haabwa bantu aba baati̱ye
kandi tankuuyʼo bantu aba musango.”
Mukama akuukalagha haa mwena Sayu̱u̱ni̱.