2
Yona naasi̱i̱ma Mukama
1 Yona anali munda ya ki̱su̱i̱ eki, aasinda Mukama Luhanga wee ati,
2 “Mukama, mu kubona-bona kwanje,
nkakubilikila, wankuukamu.
Nkakutakila ndi eku̱li̱mu̱ mu baku̱wa,
wanji̱ghu̱wa.
3 Okankoteli̱ya kimui mu ntunga ya nanja etobheeye,
mi̱goli̱ ebhangikaane yaammela.
Mighina ekongomi̱ye yansaalilagha eegu̱u̱li̱.
4 Naaghila nti, ‘Dhelu buni naabhi̱ngu̱u̱we mu maaso ghaawe,
numba yaawe ehi̱ki̱li̱i̱ye tankutodha kughisiigha li̱i̱so.’
5 Maasi ghaaneeli̱ghi̱i̱li̱li̱ya, ghaabbala kunsala.
Nanja yaammela weena-weena,
bi̱si̱ngo byamu byaneeli̱ngelela mu mutuwe.
6 Naakotela kimui eku̱li̱mu̱ mu nanja,
mu kyalo eki butwelo bwakiyo buughaaye.
Bhaatu uwe, Mukama Luhanga wanje,
wanjiya eku̱li̱mu̱ eghi.
7 Obu neehi̱ghu̱u̱ye ndi haai ku̱ku̱wa,
naakuusuka Mukama.
Naakwesengeleli̱ya,
tooli̱ wanji̱ghwi̱la mu numba yaawe ehi̱ki̱li̱i̱ye.
8 Boona abakulami̱yagha bihongano byabo
bakubaagha boonini beehi̱i̱yʼo kukunda kwawe kwamaani̱.
9 Bhaatu si̱ye ndakuhongelagha bisembo,
ninkulimbila bilimbo bya ku̱ku̱si̱i̱ma.
Ndakukolelagha ebi neelaghi̱i̱sani̱i̱ye,
nanga Mukama, nuuwe okujunagha bantu!”
10 Niibuwo Mukama aalaghiiye ki̱su̱i̱ eki kughenda kutanaka Yona haa ki̱si̱yo, du̱mbi̱ kyaghenda, kyamutanakʼo.