Kitabo kya
Yosuwa
Kwanjula
Kitabo kya Yosuwa kyeyongeeye ku̱bu̱ghʼo Banai̱saaleeli̱ hambali kitabo Kyabilaghilo kyaheleeye. Kitabo kini ki̱bu̱ghi̱yʼo ngoku Banai̱saaleeli̱ baabhasu̱ki̱ye maasi Yolodaani̱ kandi baakwata nsi ya Kanaani̱. Yosuwa, oghu akakuuka mu ki̱i̱kalo kya Musa, niiye akaba ali mwebembeli̱ wabo. Baakwata nsi ya Kanaani̱ kusighikila ngoku Luhanga aabalaghiiye. Luhanga aakola eki ku̱u̱su̱li̱i̱si̱ya eki aalaghi̱i̱sani̱i̱ye ati akuha nsi ya Kanaani̱ baasukulu baa Ebbulahi̱mu̱ (Ntandiko 12:7).
Oghu akahandiika kitabo kyona kya Yosuwa tabamumani̱ye. Bantu banamu̱nji̱ bakweli̱li̱kanagha bati Yosuwa eenini niiye akugubha kuba naakihandi̱i̱ki̱ye. Bhaatu ki̱twi̱ke kyakumaliilila kya kitabo kini, Yosuwa akugubha kuba ataakihandi̱i̱ki̱ye nga ku̱ku̱wa kandi kujiikuwa kuwe (Yosuwa 24:29-31).
Kitabo kini ki̱bu̱ghi̱yʼo ngoku Luhanga aateekani̱li̱i̱je kihanda bantu be aba aakomi̱yemu kandi aabaha nsi hambali bakuukala kandi ku̱mu̱heeleli̱ya. Banai̱saaleeli̱ kukwata nsi ya Kanaani̱ kikwolekagha bu̱si̱ngu̱li̱ bwa Luhanga haa bantu abakulami̱yagha bisasani̱ kandi bakola bintu bi̱bhi̱i̱hi̱ye. Mwebembeli̱ wabo Yosuwa oolekagha kisasani̱ kya Yesu oghu aasagha kuhikila bantu baa Luhanga kubahi̱ki̱ya haa bu̱si̱ngu̱li̱ bwa kutakola bintu bi̱bhi̱i̱hi̱ye kandi kulami̱ya Luhanga omui wamajima kandi mwomi̱i̱li̱.
1
Mukama naalaghila Yosuwa
1 Haanu̱ma ya ku̱ku̱wa kwa Musa mu̱heeleli̱ya wa Mukama, Mukama aaghila Yosuwa mutabani̱ wa Nu̱u̱ni̱, oghu aakoonelagha Musa haa mulimo ati, 2 “Musa mu̱heeleli̱ya wanje aaku̱u̱ye. Nahabweki uwe na Banai̱saaleeli̱ aba boona, mweteekani̱je kubhasuka maasi Yolodaani̱, ku̱ki̱dha mu nsi eghi ndimabaha. 3 Ki̱i̱kalo kyona hambali mu̱ku̱kpeeti̱ya kighele kyanu, nkubaha kiyo ngoku naalaghi̱i̱sani̱i̱ye Musa. 4 Mukutwala nsi yoona ku̱lu̱gha mu elungu eku̱wa ku̱hi̱ka mu myena ya Lebbanooni̱ elughulu. Nsi eghi etandikiiye haa maasi ghaanamu̱li̱to Efulaati̱, ku̱hi̱ka haa Nanja ya Medi̱teleni̱yani̱ ya bughuwa ejooba. Kyalo kya Bahi̱ti̱ eki kyona kikuba kyanu. 5 Taaliyo muntu nʼomui oghu akugubha ku̱ku̱si̱ngu̱la onaakaaye. Nkuba naawe ngoku naabaagha na Musa. Tankukuleka kedha ku̱ku̱lu̱ghʼo.
6 “Obe wamaani̱ kandi ogume, nanga nuuwe okuhikila bantu bani kugwetuwa nsi eghi naalahiiye kuha baataata baabo. 7 Obe wamaani̱ kandi ogume. Weeghendeseleje kukwata bilaghilo byona ebi mu̱heeleli̱ya wanje Musa aakulaghiiye. Otali̱bi̱lu̱ghʼo kukola bintu binji, niikuwo obe kulungi hoona hambali olaghendagha. 8 Kitabo kya bilaghilo kini, okisomelaghe bantu bwile bwona. Okyeli̱li̱kanaghʼo mukilo na ntangaali̱ kandi weeghendeseleje kukola byona ebihandi̱i̱ku̱u̱wemu, niikuwo okula-kulane kandi obe kulungi. 9 Ni̱i̱si̱ye naakulaghiiye. Obe wamaani̱ kandi ogume, otoobaha kedha kutukumila, nanga Mukama Luhanga waawe ali naawe hambali olaghendagha.”
Yosuwa naalaghila Banai̱saaleeli̱
10 Yosuwa aalaghila beebembeli̱ baa Banai̱saaleeli̱ ati, 11 “Musaalile haagati mu bantu hambali baghooneeye kandi mubalaghile muti, ‘Muteekani̱je byokuliya bikumala, kilo ekikulabha munkiya mukubhasuka maasi Yolodaani̱ kandi mu̱ki̱dhe mu nsi eghi Mukama Luhanga waanu akubaha kutwala.’ ”
12 Yosuwa aaghila bantu baa ntu̱la ya Leu̱bbeeni̱ na ya Gaadi̱ na kimui kyakabili kya ntu̱la ya Manase ati, 13 “Muusuke kighambo eki Musa mu̱heeleli̱ya wa Mukama aabalaghiiye ati, ‘Mukama Luhanga waanu alimabaha nsi ya bu̱lu̱gha ejooba bwa maasi Yolodaani̱ kuba ki̱i̱kalo kyanu kya kuhuumulilamu.’ 14 Bakali̱ baanu, baana baanu na bisolo byanu bi̱ti̱ghale mu nsi eghi Musa ahaaye enu̱we luhande lweli̱ lwa bu̱lu̱gha ejooba bwa maasi Yolodaani̱. Bhaatu basaasa baanu baamaani̱ balwani̱ babhasuke maasi agha, bakwete byakulwani̱i̱si̱ya. Baghende bahikiiye Banai̱saaleeli̱ baanakyabo kandi babakoonele, 15 ku̱hi̱ki̱ya Mukama ahaaye bu̱si̱nge Banai̱saaleeli̱ baanakyanu aba ngoku aabuhaaye enu̱we kandi batwete nsi eghi Mukama Luhanga waanu akubaha. Du̱mbi̱ mukuuke mu nsi yaanu mughitwale kandi muukalemu. Nsi ya luhande lweli̱ lwa bu̱lu̱gha ejooba bwa maasi Yolodaani̱, eghi Musa mu̱heeleli̱ya wa Mukama abahaaye.”
16 Baakuukamu Yosuwa bati, “Byona ebi okutulaghila tukubikola kandi hambali okututuma tukughendayo. 17 Tu̱ku̱ku̱hu̱ti̱ya ngoku twahu̱ti̱yagha Musa. Mukama Luhanga waawe abe naawe ngoku aabaagha na Musa! 18 Muntu weena oghu alajeemagha kukola ebi waamulaghiiye kandi naaghaya bighambo byawe, alaatibuwagha. Bhaatu obe wamaani̱ kandi ogume!”