1 Niibuwo Yosuwa mutabani̱ wa Nu̱u̱ni̱ aatu̱mi̱ye bambega babili mu ki̱bi̱so ku̱lu̱gha Si̱ti̱i̱mu̱. Aabaghila ati, “Mughende kandi mulole nsi ya Kanaani̱, kukilamunu kibugha kya Yeli̱ko.” Obu basaasa aba baaki̱dhi̱ye mu kibugha eki, baaghenda kandi baalaala mu numba ya mukali̱ malaaya li̱i̱na liye Lahaabbu.

2 Bantu baaghambila mukama wa Yeli̱ko bati, “Olole, bamui mu Banai̱saaleeli̱ baasi̱ye hani mukilo kubega nsi yaatu.” 3 Niibuwo mukama wa Yeli̱ko aatu̱mi̱ye bantu kughambila Lahaabbu bati, “Otwesi̱ye basaasa abaasi̱ye mukilo mu numba yaawe, nanga baasi̱ye kubega nsi yaatu yoona.”

4 Bhaatu Lahaabbu akaba naamali̱ye ku̱bi̱sa basaasa babili aba. Aakuukamu aba mukama aatu̱mi̱ye ati, “Majima basaasa aba baaki̱dhi̱ye hani, bhaatu tanimani̱ye hambali baalu̱ghi̱ye. 5 Lwagholo obu bwile bwa kuughala maageeti̱ ghaa kibugha bwabaagha buli haai ku̱hi̱ka, basaasa aba baatooye kandi tanimani̱ye hambali baaghendi̱ye. Mubakwame bwangu-bwangu, mukugubha kubakwata.” 6 Bhaatu Lahaabbu akaba naatwete basaasa aba haa lusui lwa numba yee kandi ababi̱si̱ye hansi ya bu̱goi̱go obu aabaagha haali̱yeyo. 7 Basaasa aba mukama aatu̱mi̱ye aba, baatuwa mu kibugha kya Yeli̱ko, du̱mbi̱ bali̱ndi̱ baaghala geeti̱ yakiyo. Basaasa aba baaghenda balabhi̱ye Banai̱saaleeli̱ aba ku̱hi̱ka hambali luguudhe lubhasukiiye maasi Yolodaani̱.

8 Obu bambega aba baabaagha batakalangaaye, Lahaabbu aaghenda haa lusui hambali bali. 9 Aabaghila ati, “Nimani̱ye ngoku Mukama aahaaye enu̱we Banai̱saaleeli̱ nsi eni kandi etu̱we tuboobahi̱ye na bantu boona abaakaaye mu nsi eni mitima ebakangami̱ye munda haabwanu. 10 Tukaaghu̱wa ngoku Mukama oomeei̱ye Nanja Mutuku munaloli̱ye obu mwalu̱ghagha Mi̱si̱li̱ kandi twaghu̱wa dhee ngoku mwati̱ye Si̱hooni̱ na Ogi̱, bakama babili baa Bamooli̱, baa luhande lweli̱ lwa bu̱lu̱gha ejooba bwa maasi Yolodaani̱, aba mwahwelekeleei̱ye. 11 Obu twaghu̱u̱ye ebi, mitima yaatukangama munda kandi bu̱li̱ muntu maani̱ ghaamuhuwa haabwa kwobaha enu̱we, nanga Mukama Luhanga waanu ni Luhanga oghu alemi̱ye mu eghulu na munsi. 12 Nahabweki mulahile ewanje mu li̱i̱na lya Mukama ngoku mukungilila kisa na ka ya tita ngoku naabaghiliiye kiyo. Mumpe kaakulolelʼo akakwoleka 13 ngoku mukujuna tita, maaha, baana baamaaha baabusaasa na baabukali̱, na bantu baabo boona kandi ngoku mukujuna bwomi̱i̱li̱ bwatu kutaku̱wa.”

14 Basaasa aba baamughila bati, “Mukama atwite kaakuba tutakola ngoku twabu̱ghi̱ye! Kaakuba otaghambila muntu weena ngoku twabaagha hani, tulimakulaghani̱ja ngu, obu Mukama akutuha nsi eni, tukukughilila kisa kandi bwesighibuwa.”

15 Lahaabbu aakwami̱li̱ya basaasa aba mu di̱li̱sa aabasu̱ndu̱ki̱li̱ya haa mughuwo enja ya kibugha eki, nanga numba ya Lahaabbu hambali aakalagha ekaba eli haa kisiika ekyeli̱ghi̱li̱i̱ye kibugha eki. 16 Aabaghila ati, “Mughende kandi mwebi̱se mu bwena, niikuwo abakwete kubahuma batababona. Mumale bilo bisatu mu̱neebi̱si̱ye, ku̱hi̱ki̱ya abakwete kubahuma baaku̱u̱ki̱ye, niikuwo mughende.”

17 Basaasa aba baamughila bati, “Eki twalahiiye ewaawe tukukikola. 18 Kini niikiyo oli na kukola. Tukaakwisa ku̱lu̱mba nsi eni, obohe mughuwo ghuumutuku ghuni haa di̱li̱sa eli waaleki̱ye twaasu̱ndu̱ki̱lamu. Okumaani̱li̱ye mu numba yaawe eni, so waawe, njoko waawe, baana baa njoko waawe, na ka ya so waawe yoona. 19 Kaakuba muntu aatuwa mu numba yaawe aghenda mu luguudhe kandi bamwitilayo, oghu ni musango ghuwe, taghuli musango ghwatu. Bhaatu kabhi nkaahi̱ki̱yʼo muntu weena oghu ali mu numba yaawe, oghu ni musango ghwatu. 20 Kaakuba oghambila bantu ekyaleki̱ye twasa hani, naatu tatukukola eki twalahiiye ewaawe.”

21 Lahaabbu aabaghila ati, “Naasi̱i̱mi̱ye kukola eki mwabu̱ghi̱ye.” Aabalagha kandi baaghenda. Du̱mbi̱ aaboha mughuwo ghuumutuku oghu mu di̱li̱sa eli.

22 Basaasa aba baalu̱ghʼo kandi baaghenda beebi̱sa mu bwena, baakalayo haabwa bilo bisatu, ku̱hi̱ki̱ya abaabahumagha baaku̱u̱ki̱ye. Abaabahumagha aba baabbala basaasa aba hoona mu luguudhe, bhaatu bataababona. 23 Du̱mbi̱ basaasa babili aba baakota ku̱lu̱gha mu bwena. Baabhasuka maasi Yolodaani̱, baakuuka ewaa Yosuwa mutabani̱ wa Nu̱u̱ni̱. Baamughambila byona ebyababaayʼo. 24 Baaghila Yosuwa bati, “Majima Mukama aatuhaaye nsi eghi, nanga bantu abaakaayemu boona, batwobahi̱ye kwonini.”