1 Mukama aaghila ati, “Mutalyekolela bisasani̱ bya baaluhanga kedha kusimba mpaghi sya mabaale kedha bisasani̱ bya mabaale mu nsi yaanu, mutali̱teeleli̱ya bintu ebi kubilami̱ya. Ni̱i̱si̱ye Mukama Luhanga waanu.

2 “Mu̱hu̱ti̱yaghe kilo kyanje kya Sabhato na ki̱i̱kalo ki̱hi̱ki̱li̱i̱ye kyanje. Ni̱i̱si̱ye Mukama.

3 “Kaakuba mukwamilila bilaghilo byanje kandi mweghendeseleja kukwata ebi nkubalaghila, 4 nkuleka mbu̱la etoone mu nsi yaanu mu bwile bwayʼo, nsi eghi ekweli̱ya bilimuwa kandi biti bikwanʼo bi̱ghu̱ma. 5 Mukukesa bilimuwa bikani̱ye ku̱hi̱ki̱ya haa bwile bwa kukobha mi̱jaabbi̱i̱bbu̱ kandi kukobha mi̱jaabbi̱i̱bbu̱ kukweyongela ku̱hi̱ki̱ya haa kuhela nsigho. Mukuliya byokuliya byona ebi mukubbala kandi muukale kusemeeye mu nsi yaanu.

6 “Nkubaha bu̱si̱nge mu nsi eghi, mukulangaala kandi mughwesaghile hataliyo muntu oghu akuboobahi̱i̱li̱li̱ya. Nkuuya mu nsi yaanu binyama bya kabhi bya mu kisaka ebikwitagha kandi taakubaamu bulemo bwona. 7 Mukubhinga ngi̱ghu̱ syanu kandi mubaate na kihiyo. 8 Bantu bataano mu enu̱we balabhingagha ki̱ku̱mi̱ kandi ki̱ku̱mi̱ balabhingagha bantu mutwalo ghumui baa ngi̱ghu̱ syanu kandi mukubaata boona na kihiyo. 9 Nkughilila enu̱we kisa, nkuleka mu̱byale baana bakani̱ye kandi mukane, nkulinda ndaghaano eghi naakoli̱ye naanu. 10 Mukuba nimunaliya bilimuwa ebi mwabi̱i̱ki̱ye mu mwaka ghuhooye kandi mulabiiyagha mu sitoowa syanu niikuwo mutunge mwanya ghwa kutaamu ebi mwakesi̱ye buhyaka. 11 Nkuukala naanu kandi tankubalu̱ghʼo. 12 Ndaghendagha naanu, nkuba Luhanga waanu kandi mukuba bantu banje. 13 Ni̱i̱si̱ye Mukama Luhanga waanu oghu akabaaya mu nsi ya Mi̱si̱li̱, niikuwo mutatodha kuba basyana baa Banami̱si̱li̱. Nkabaaya mu kubona-bona mwabaaghamu kandi naaleka mwalubhatanga mu̱gu̱mi̱ye.

14 “Kaakuba mubhenga ku̱nji̱ghu̱wa kandi kukwata bilaghilo byanje byona, nkubafubila. 15 Kaakuba mubhenga ebi nkubalaghila, mughaya ntu̱wamu syanje, musaaghuwa kukwata ebi nkubalaghila byona kandi mu̱tu̱wa ndaghaano yanje, 16 nkubakolʼo bini: nkubaleetʼo bintu bya kabhi, ndwala esitaakukila, mu̱swi̱ja oghukubaaghala maaso kandi mukwoloba kwonini. Mukuhela nsigho bhaatu ngi̱ghu̱ syanu niisiyo sikuliya bilimuwa byanu. 17 Nkufubila enu̱we kandi ngi̱ghu̱ syanu sikubasi̱ngu̱la, aboohi̱ye enu̱we niibo bakubalema kandi mulali̱gi̱tagha muntu nʼomui atakwete kubahuma.

18 “Kaakuba mubhenga ku̱nji̱ghu̱wa haanu̱ma ya kubakolʼo ebi byona, nkubafubila milundi musanju̱ kusaali̱ya haala haabwa bibhi byanu. 19 Nkubamalamu kwepanka kwanu kwa butaaghu̱wa, mbu̱la teekutodha kutoona ku̱lu̱gha mu mwanya, nsi yaanu ekwoma kandi yoomiile nga kyoma. 20 Maani̱ ghaanu ghaa kukola ghaku̱kwi̱la busa, nanga nsi yaanu teekweli̱ya bilimuwa kandi biti tabikwanʼo bi̱ghu̱ma.

21 “Kaakuba mweyongela kukola ebi ntabbali̱ye kandi kubhenga ku̱nji̱ghu̱wa, nkweyongela kubafubila milundi musanju̱ kusaali̱ya haala haabwa bibhi byanu. 22 Nkubatumila binyama bya mu kisaka, bikwita baana baanu, bi̱ku̱hwelekeeleli̱ya bisolo byanu, mu̱ku̱ti̱ghala bakee kandi nguudhe syanu si̱ku̱ku̱wa.

23 “Bhaatu haanu̱ma ya bifubilo ebi byona, kaakuba muukala munabhengi̱ye ku̱nji̱ghu̱wa kandi mweyongela kukola ebi ntabbali̱ye, 24 nanje nkukola ebi mutabbali̱ye kandi nkubafubila milundi musanju̱ kusaali̱yʼo haabwa bibhi byanu. 25 Nkubaleetamu bulemo nkuhoola ngi̱ghu̱ haabwa ku̱tu̱wa ndaghaano yanje. Kaakuba mughenda kwekumaani̱li̱ya mu bibugha byanu, nkubasindikila bifubilo bya ndwala kandi nkubahaayʼo mu mikono ya ngi̱ghu̱ syanu. 26 Nku̱keei̱ya byokuliya byanu, bakali̱ eku̱mi̱ balateekelagha mu capu̱li̱ya emui, balaleetagha byokuliya haanu̱ma ya ku̱pi̱i̱ma ebi muntu akuliya, mulaliyagha byokuliya bhaatu tamulaakutagha.

27 “Kaakuba mubona ebi byona, bhaatu mubhenga ku̱nji̱ghu̱wa kandi mweyongela kukola ebi ntabbali̱ye, 28 nanje nkukola ebi mutabbali̱ye, nkusaaliluwa kwonini naanu kandi nkubafubila milundi musanju̱ haabwa bibhi byanu. 29 Njala ekuleka muliye batabani̱ baanu na bahala baanu. 30 Nku̱hwelekeeli̱ya bi̱i̱kalo bya haagu̱u̱li̱ ya bwena hambali mukulami̱li̱yagha baaluhanga baanu. Nkujombakaka byakuhongelʼo bihonguwa byanu hambali mu̱ku̱tu̱mi̱kagha bubbani̱. Mi̱ku̱ yaanu nkughituuma haagu̱u̱li̱ ya bisasani̱ bya baaluhanga baanu kandi nkwoha enu̱we. 31 Nku̱hwelekeeleli̱ya bibugha byanu, nkugenga hansi bi̱i̱kalo hambali mukulami̱li̱yagha baaluhanga baanu kandi tanku̱si̱i̱ma bihonguwa byanu bisasi̱ye. 32 Nku̱hwelekeeleli̱ya kwonini nsi yaanu kandi ngi̱ghu̱ syanu abaakaayemu bakusweka. 33 Nkubaleetamu bulemo, ngi̱ghu̱ syanu sikubaata na kihiyo kandi nkulalangi̱ya enu̱we mu mahanga ghanji. Nku̱hwelekeeleli̱ya bibugha byanu kandi nsi yaanu ekifooka elungu. 34 Haanu̱ma yʼeki kubʼo, enu̱we munali mu mahanga ghaa ngi̱ghu̱ syanu, nsi yaanu ekutunga bilo bya Sabhato bya kuhuumula ngoku mwangughilekagha ehuumula haa bu̱li̱ mwaka ghwamusanju̱. 35 Bwile obu nsi ekumala etalimu muntu, ekutunga kuhuumula kwamaani̱ oku yaabaagha etakatu̱ngi̱ye mu bilo bya Sabhato enu̱we munaakaayemu.

36 “ ‘Bamui mu enu̱we abakuba bati̱ghaayʼo kandi balalangiiye mu mahanga ghaa ngi̱ghu̱ syabo bakwobahila kimui, elaka lya kibabi mpwegha eku̱hu̱ngi̱ya lilalekagha bali̱gi̱te. Mulali̱gi̱tagha nga bantu bakwete kuuluka kihiyo kandi muleegengagha muntu ataakubahuma. 37 Muntu alakobhokagha muunakiye nga bantu bakwete kuuluka kihiyo, nankabha hataliyo oghu akwete kubahuma. Nahabweki tamukugubha kulwana na ngi̱ghu̱ syanu. 38 Mu̱ku̱kwi̱la mu mahanga ghanji kandi bantu bʼomu nsi sya ngi̱ghu̱ syanu baku̱hwelekeeleli̱ya enu̱we. 39 Bakee mu enu̱we abakuba bati̱ghaayʼo mu nsi ya ngi̱ghu̱ syanu, bakuhwelekeelela haabwa bibhi byanu na bibhi bya baataata baanu.

40 “ ‘Kaakuba bantu aba baatula bibhi byabo na ebi baataata baabo baakoli̱ye haabwa kubhenga ku̱nji̱ghu̱wa kandi kukola ebi ntabbali̱ye. 41 Bintu ebi niibiyo byaleki̱ye naasaaliluwa na Banai̱saaleeli̱ kandi naabalalangi̱ya mu nsi sya ngi̱ghu̱ syabo. Bhaatu kaakuba Banai̱saaleeli̱ baba badhooti̱, baleka kuba na mitima yoomakakaane kandi basi̱i̱ma kufubiluwa haabwa bibhi byabo, 42 nkuusuka ndaghaano yanje eghi naakoli̱ye na Yakobbo kandi ndaghaano yanje eghi naakoli̱ye na I̱saka kandi ndaghaano yanje eghi naakoli̱ye na Ebbulahi̱mu̱ kandi nkuusuka nsi eghi. 43 Banai̱saaleeli̱ baku̱lu̱gha mu nsi eghi, eti̱ghale etalimu muntu kandi etunge bilo bya Sabhato bya kuhuumula. Bantu aba bakusasula haabwa bibhi byabo haabwa kubhenga bilaghilo byanje kandi kughaya ebi naalaghiiye. 44 Bhaatu eki kikaakubʼo, obu bakuba babatwete kandi banali mu nsi sya ngi̱ghu̱ syabo, tankubhenga Banai̱saaleeli̱ aba kedha kubooha kedha kubahwelekeeleli̱ya. Tankuleka ndaghaano eghi naakoli̱ye na bantu aba. Ni̱i̱si̱ye Mukama Luhanga wabo. 45 Haabwa Banai̱saaleeli̱ aba, nkuusuka ndaghaano eghi naakoli̱ye na baataata baabo aba naahi̱ye mu nsi ya Mi̱si̱li̱, bantu bʼomu mahanga ghanji banaloli̱ye kandi kuba Luhanga wa Banai̱saaleeli̱ aba. Ni̱i̱si̱ye Mukama.’ ”

46 Ebi niibiyo bilaghilo, ntu̱wamu na ndaghikiililo ebi Mukama aahaaye Musa haa mwena Si̱naai̱ haabwa Banai̱saaleeli̱.