1 Mukama aaghila Musa ati, 2 “Oghile Banai̱saaleeli̱ oti, ‘Kaakuba muntu alahila kuhaayo muntu onji ewaa Mukama, muntu oghu ali na kuba na bughabe haanu̱ma ya kusasula muhendo ghwa sente. 3 Musaasa oghu ali na myaka maku̱mi̱ abili ku̱hi̱ki̱ya haa myaka nkaagha ya bukulu, bamusasuulilaghe bi̱twi̱ke maku̱mi̱ ataano bya siliva, kusighikila haa ki̱pi̱i̱mo kya mu ki̱i̱kalo ki̱hi̱ki̱li̱i̱ye 4 kandi muntu oghu naabaaye ali mukali̱, bamusasuulilaghe bi̱twi̱ke maku̱mi̱ asatu bya siliva. 5 Kaakuba aba ali mwana wabusaasa oghu ali na myaka etaano ku̱hi̱ki̱ya haa myaka maku̱mi̱ abili ya bukulu, bamusasuulilaghe bi̱twi̱ke maku̱mi̱ abili bya siliva kandi wabukali̱ bi̱twi̱ke eku̱mi̱ bya siliva. 6 Kaakuba mwana wabusaasa aba ali haagati ya kweli̱ kumui na myaka etaano ya bukulu, bamusasuulilaghe bi̱twi̱ke bitaano bya siliva kandi wabukali̱ bi̱twi̱ke bisatu bya siliva. 7 Kaakuba musaasa oghu aba ali na myaka nkaagha ya bukulu na kusaalʼo, bamusasuulilaghe bi̱twi̱ke eku̱mi̱ na bitaano bya siliva kandi naabaaye ali wabukali̱ bamusasuulilaghe bi̱twi̱ke eku̱mi̱ bya siliva. 8 Kaakuba muntu oghu aalahiiye aba ali munaku kandi ataakugubha kusasula muhendo oghu baataayʼo, aghende ewaa mu̱hongi̱ kandi mu̱hongi̱ amughambile muhendo, naasighikila ngoku muntu oghu akugubha kusasula.

9 “ ‘Kaakuba muntu aalahila kuhaayo kisolo nga kihonguwa ewaa Mukama, kisolo eki kikufooka ki̱hi̱ki̱li̱i̱ye ewaa Mukama. 10 Kisolo kisemeeye atakihingamu kisolo ki̱bhi̱i̱hi̱ye kandi kisolo ki̱bhi̱i̱hi̱ye atakihingamu kisolo kisemeeye. Kaakuba kisolo eki akihingamu kisolo kinji, byombi bikufooka bi̱hi̱ki̱li̱i̱ye. 11 Kaakuba kisolo eki muntu aalahiiye kuhaayo kiba eki̱teeli̱ye ewaanu kandi eki bataakugubha kuhongela Mukama, muntu oghu akitwale ewaa mu̱hongi̱. 12 Mu̱hongi̱ atu̱wemu muhendo ghwa kisolo eki, naasighikila haa kusemela kedha kutasemela kwakiyo kandi muhendo oghu aku̱tu̱wamu aaniighuwo baakighula. 13 Kaakuba mukama wa kisolo eki abbala kukicungula, ali na kwongela kimui kyakataano haa muhendo ghwakiyo.

14 “ ‘Kaakuba muntu ahayo numba yee nga kintu ki̱hi̱ki̱li̱i̱ye ewaa Mukama, mu̱hongi̱ atu̱wemu muhendo ghwa numba eghi naasighikila haa kusemela kedha kutasemela kwayo kandi muhendo oghu aku̱tu̱wamu aaniighuwo baaghighula. 15 Kaakuba musaasa oghu aahaayeyo numba eghi abbala kughicungula, ali na kwongela kimui kyakataano haa muhendo oghu kandi numba eghi etodhe ebe yee.

16 “ ‘Kaakuba muntu ahayo ewaa Mukama ki̱twi̱ke kya kibanja baa ka yee bamuhaaye, mu̱hongi̱ atu̱wemu muhendo ghwakiyo naasighikila haa kukana kwa nsigho eghi bakuhelamu, nsigho ya bbaale niyaabaaye eli ki̱lo maku̱mi̱ abili baghighulaghe bi̱twi̱ke eku̱mi̱ bya siliva. 17 Kaakuba muntu ahayo musili ghuwe mu mwaka ghwa bughabe, muhendo oghu mu̱hongi̱ aatu̱u̱yemu aaniighuwo baaghughula. 18 Kaakuba ahayo musili ghuwe haanu̱ma ya mwaka ghwa ki̱ghenu̱ eki, mu̱hongi̱ abaliilile muhendo ghwa musili oghu naasighikila haa myaka eghi enati̱ghaaye ku̱hi̱ka haa mwaka ghunji ghwa bughabe kandi akeehi̱ye haa muhendo ghwa musili oghu. 19 Kaakuba musaasa oghu aahaayeyo musili oghu abbala kughucungula, ali na kwongelʼo kimui kyakataano kya muhendo oghu kandi musili oghu ghutodhe ghube ghuwe. 20 Bhaatu kaakuba atabbala kucungula musili oghu, kedha aba aghu̱ghu̱li̱i̱ye muntu onji, taakugubha kutodha kughucungula. 21 Kaakuba musili oghu baghucungula mu mwaka ghwa bughabe, ghukufooka musili ghu̱hi̱ki̱li̱i̱ye nga musili bahaayeyo ewaa Mukama kandi ghukuba ghwa bahongi̱.

22 “ ‘Kaakuba muntu ahayo ewaa Mukama musili oghu aghu̱li̱ye, oghutali ki̱twi̱ke kya kibanja eki bantu baa ka yee bamuhaaye, 23 mu̱hongi̱ ali na ku̱tu̱wamu muhendo ghwa musili oghu ku̱hi̱ka haa mwaka ghwa bughabe kandi muntu oghu aaghu̱ghu̱li̱ye aghusasule kilo eki kyonini nga kintu ki̱hi̱ki̱li̱i̱ye ewaa Mukama. 24 Mu mwaka ghwa bughabe oghu, musili oghu ghuli na kukuukila oghu akaghu̱ghu̱li̱ya, oghu akadu̱bha kuba mukama waghuwo. 25 Muhendo ghwa bu̱li̱ musili, mu̱hongi̱ aaniiye aaghu̱tu̱waagha naasighikila haa ki̱pi̱i̱mo kyomu ki̱i̱kalo ki̱hi̱ki̱li̱i̱ye.

26 “ ‘Hatabʼo muntu nʼomui oghu akuhaayo mu̱li̱ghaaso ghwa kisolo, nanga mi̱li̱ghaaso yoona ni ya Mukama. Mi̱li̱ghaaso yoona ya nte, ntaama kedha mbu̱li̱, ni ya Mukama. 27 Mu̱li̱ghaaso ghwa kisolo eki̱teeli̱ye, mukama waghuwo ali na kughucungula haa muhendo oghu mu̱hongi̱ aataayʼo kandi ongelʼo kimui kyakataano kya muhendo oghu. Kaakuba ataghucungula baghu̱ghu̱li̱ye haa muhendo oghu mu̱hongi̱ aatu̱u̱yemu.

28 “ ‘Bhaatu taaliyo kintu na kimui eki musaasa aahaayeyo ewaa Mukama, eki bali na ku̱ghu̱li̱ya kedha kucungula, nankabha ali muntu, kisolo kedha musili, nanga kintu kyona eki bahaayeyo ewaa Mukama ki̱hi̱ki̱li̱i̱ye kwonini. 29 Muntu oghu baahaayeyo kuhwelekeelela, taali na kucunguluwa, bhaatu ali na kwitibuwa.

30 “ ‘Kimui kyʼeku̱mi̱ kya bu̱li̱ kintu eki̱lu̱ghi̱ye mu nsi eghi, kibe kya bilimuwa byʼomu musili kedha kya bi̱ghu̱ma bya biti, byona ni bya Mukama kandi bi̱hi̱ki̱li̱i̱ye ewaa Mukama. 31 Kaakuba muntu abbala kucungula bimui haa kimui kyʼeku̱mi̱ eki, ali na kwongelʼo kimui kyakataano kya muhendo ghwa kintu eki. 32 Kimui kyʼeku̱mi̱ kya nte, ntaama kedha mbu̱li̱, kisolo eki mu̱li̱i̱si̱ya wakiyo akutaaghʼo mwi̱gho ghuwe makibala, kikuba kisolo ki̱hi̱ki̱li̱i̱ye ewaa Mukama. 33 Muntu taali na kukoma mu bisolo ebi ekisemeeye nʼekitasemeeye, kedha ku̱hi̱ngamu kisolo kinji. Kaakuba ahingamu kinji, byombi bi̱hi̱ki̱li̱i̱ye kandi tabili na kucunguluwa.’ ”

34 Ebi niibiyo bilaghilo ebi Mukama aahaaye Musa haa mwena Si̱naai̱ haabwa Banai̱saaleeli̱.