23
Butumuwa bwa Bbalaamu bwʼoku̱du̱bha
1 Bbalaamu aaghila Bbalaki̱ ati, “Onkwelele hani byakuhongelʼo bihonguwa musanju̱ kandi ondeetele ntu̱u̱li̱ sya nte musanju̱ na ntu̱u̱li̱ sya ntaama musanju̱.”
2 Bbalaki̱ aakola ngoku Bbalaamu aamughambiiye kandi bombi baahonga ntu̱u̱li̱ ya nte emui na ntu̱u̱li̱ ya ntaama emui haa bu̱li̱ kyakuhongelʼo bihonguwa.
3 Bbalaamu aaghila Bbalaki̱ ati, “Weemilile haai na kihonguwa kyona kyokeei̱ye kyawe. Oleke ngende haakpengbu̱ hali̱, kedha Mukama aasa kusanga-sangaana nanje. Eki akundaghila niikiyo nkukughambila.”
Du̱mbi̱ Bbalaamu aani̱i̱na haagu̱u̱li̱ ya keena akatatooyʼo kantu koona. 4 Luhanga aasanga-sangaana na Bbalaamu kandi Bbalaamu aamughila ati, “Naakweye byakuhongelʼo bihonguwa musanju̱ kandi haa bu̱li̱ kyakuhongelʼo bihonguwa naahongeeyʼo ntu̱u̱li̱ ya nte emui na ntu̱u̱li̱ ya ntaama emui.”
5 Mukama aaghambila Bbalaamu ebi akughambila Bbalaki̱ kandi aamughila ati, “Okuuke hambali Bbalaki̱ ali kandi omughambile ebi naakughambiiye.” 6 Nahabweki Bbalaamu aakuuka hambali Bbalaki̱ ali kandi aamusanga eemiliiye haai na kihonguwa kyona kyokeei̱ye kiye na beebembeli̱ boona bʼomu ehanga lya Mowaabu.
7 Bbalaamu aaghila ati,
“Bbalaki̱ mukama wa Mowaabu anji̱hi̱ye mu ehanga lya Si̱li̱ya,*23:7 Si̱li̱ya mu Luhebbulaayo ni Alaamu.
mu myena ya bu̱lu̱gha ejooba.
Aaghila ati, ‘Wiise kandi onkiinile baasukulu baa Yakobbo
kandi obu̱ghʼo bintu bi̱bhi̱i̱hi̱ye Banai̱saaleeli̱.’
8 Buuye nkugubha nti̱ya kukiina bantu aba Luhanga ataki̱i̱ni̱ye?
Buuye nkugubha nti̱ya ku̱bu̱ghʼo bintu bi̱bhi̱i̱hi̱ye bantu aba Mukama atabu̱ghi̱yʼo bintu bi̱bhi̱i̱hi̱ye.
9 Mboone bantu aba ku̱lu̱gha haa bikuka bikangami̱ye
kandi nkubalolagha ndi haagu̱u̱li̱ ya bwena.
Bantu aba ni ehanga elili lyonkaha
kandi talikwebalilagha mu mahanga ghanji.
10 Buuye ni ani̱ akugubha kubala muhendo ghwa baasukulu baa Yakobbo abakani̱ye nga tu̱u̱tu̱?
Ni ani̱ akugubha kubala kimui kyakanaa kya Banai̱saaleeli̱?
Oleke nku̱we mu bu̱si̱nge
nga bantu bahi̱ki̱li̱i̱ye aba!”
11 Bbalaki̱ aaghila Bbalaamu ati, “Mbiki wankoli̱ye? Naaku̱leeti̱ye hani kukiina ngi̱ghu̱ syanje, bhaatu niibuwo waabaha mu̱gi̱sa!”
12 Bbalaamu aamukuukamu ati, “Buuye ntabu̱gha eki Mukama aaghi̱li̱ye ati mbu̱ghe?”
Butumuwa bwa Bbalaamu bwakabili
13 Bbalaki̱ aaghila Bbalaamu ati, “Wiise tughende mu ki̱i̱kalo kinji hambali okugubha kubona Banai̱saaleeli̱ aba, bhaatu okubona ki̱twi̱ke kya bantu aba etali boona. Du̱mbi̱ mu ki̱i̱kalo eki, onkiinile bantu aba.” 14 Nahabweki Bbalaki̱ aatwala Bbalaamu mu ki̱i̱kalo Jofi̱mu̱ haagu̱u̱li̱ ya mwena ghwa Pisiga kandi aakwelʼo byakuhongelʼo bihonguwa musanju̱ kandi aahongela haa bu̱li̱ kimui ntu̱u̱li̱ ya nte emui na ntu̱u̱li̱ ya ntaama emui.
15 Bbalaamu aaghila Bbalaki̱ ati, “Weemilile haai na kihonguwa kyona kyokeei̱ye kyawe, oleke ngende haakpengbu̱ hali kandi nsanga-sangaane na Mukama.”
16 Mukama aasanga-sangaana na Bbalaamu kandi aamuha butumuwa bunji ati, “Okuuke hambali Bbalaki̱ ali kandi omughambile ebi naakughambiiye.”
17 Nahabweki Bbalaamu aakuuka kandi aasanga Bbalaki̱ eemiliiye haai na kihonguwa kyona kyokeei̱ye kiye na beebembeli̱ boona bʼomu ehanga lya Mowaabu. Bbalaki̱ aamu̱bu̱u̱li̱ya ati, “Mbiki Mukama aabu̱ghi̱ye?” 18 Du̱mbi̱ Bbalaamu aaghila ati,
“Bbalaki̱, oomuke kandi ontegheeleli̱ye.
Onji̱ghu̱we, uwe mutabani̱ wa Jipola.
19 Luhanga taali nga bantu, kuha bisubha
kandi taali mutabani̱ wa muntu kuhindula byeli̱li̱kano biye.
Buuye aku̱bu̱ghagha kintu atakikola?
Buuye akulaghi̱i̱sani̱yagha kintu kitabʼo?
20 Mukama andaghiiye kuha mu̱gi̱sa Banai̱saaleeli̱.
Aabahaaye mu̱gi̱sa kandi si̱ye tankugubha kuhindula eki bbaa.
21 Taaliyo kabhi akakubʼo baasukulu baa Yakobbo
kandi Banai̱saaleeli̱ tabakutunga kijibu kyona.
Mukama Luhanga wabo ali hamui nabo
kandi bakulangililagha nʼelaka lyamaani̱ ngoku ali mukama wabo.
22 Luhanga akabaaya mu nsi ya Mi̱si̱li̱.
Bali na maani̱ nga ghaa mbogho.
23 Taaliyo oghu akugubha kukiina baasukulu baa Yakobbo.
Taaliyo mu̱ku̱mu̱ oghu ali na maani̱ kukolʼo kabhi koona Banai̱saaleeli̱ aba.
Nahabweki bantu baku̱bu̱ghʼo baasukulu baa Yakobbo
na Banai̱saaleeli̱ bati,
‘Olole bintu byamaani̱ ebi Luhanga aabakoleeye!’
24 Bantu aba bali na maani̱ nga ghaa ntale yabukali̱
kandi baku̱lu̱mbagha nga ntale
eghi etaakulangaalagha ku̱hi̱ki̱ya eliiye nyama
kandi enooye saghama yʼeki yaati̱ye.”
25 Du̱mbi̱ Bbalaki̱ aaghila Bbalaamu ati, “Waabhengi̱ye kukiina Banai̱saaleeli̱, bhaatu gutu otabaha mu̱gi̱sa!”
26 Bbalaamu aakuukamu Bbalaki̱ ati, “Buuye tanaakughambiiye nti kyona eki Mukama aku̱bu̱gha niikiyo nkukola?”
Butumuwa bwa Bbalaamu bwakasatu
27 Bbalaki̱ aaghila Bbalaamu ati, “Wiise, nkutwale mu ki̱i̱kalo kinji. Eki kyangudheedha Luhanga kandi aku̱si̱i̱mi̱lani̱ye kunkiinila bantu aba mu ki̱i̱kalo eki.” 28 Nahabweki Bbalaki̱ aatwala Bbalaamu haagu̱u̱li̱ ya mwena ghwa Peyola, hambali akugubha kulola hansi mu elungu.
29 Bbalaamu aaghila Bbalaki̱ ati, “Onkwelele hani byakuhongelʼo bihonguwa musanju̱ kandi ondeetele ntu̱u̱li̱ sya nte musanju̱ na ntu̱u̱li̱ sya ntaama musanju̱.” 30 Bbalaki̱ aakola ngoku Bbalaamu aabu̱ghi̱ye kandi Bbalaki̱ aahonga ntu̱u̱li̱ ya nte emui na ntu̱u̱li̱ ya ntaama emui haa bu̱li̱ kyakuhongelʼo bihonguwa.