24
1 Obu Bbalaamu aaboone ngoku Mukama aabbali̱ye kuha Banai̱saaleeli̱ mu̱gi̱sa, ataaghenda kulaghu̱li̱ya ngoku aakolagha bwile bunji, bhaatu aalola mu elungu. 2 Obu Bbalaamu aaloli̱ye kandi naabona Banai̱saaleeli̱ baghooni̱ye kusighikila haa ntu̱la syabo, Mwoyo wa Luhanga aamwisʼo. 3 Bbalaamu aaghila ati,
“Buni niibuwo butumuwa bwa Bbalaamu mutabani̱ wa Bbeyola,
butumuwa bwa muntu oghu akubonagha bbeni̱-bbeni̱,
4 butumuwa bwa muntu oghu aku̱u̱ghu̱wagha bighambo bya Luhanga,
muntu oghu akubonagha ebi Luhanga wa Bu̱toki̱ Bwona akunjolekagha,
nankabha ndangaala hansi makpu̱ngbu̱ nkuukalagha mboone ebikubʼo.
5 Ai̱ Yakobbo, weema syawe sisemeeye kwonini,
Ai̱ I̱saaleeli̱, okuukalagha mu ki̱i̱kalo kilungi!
6 Weema syawe sili nga mba baheli̱ye mu bighona,
nga misili eghi eli haai na maasi,
nga biti bikangami̱ye
kandi bisasi̱ye ebi Mukama aheli̱ye,
nga bi̱i̱looku̱ bitooye haakpengbu̱ ya maasi.
7 Bbaketi̱ syawe silaseesekeli̱yagha maasi
kandi bilimuwa byawe bilatungagha mbu̱la ekani̱ye.
Mukama waawe akuba wamaani̱ kusaali̱ya mukama Agagi̱
kandi bantu bakusinda bukama buwe.
8 Luhanga akaaya Banai̱saaleeli̱ mu nsi ya Mi̱si̱li̱.
Ali na maani̱ nga ghaa mbogho kubalwanilila.
Baku̱hwelekeeleli̱ya mahanga aghakubahakani̱ya,
bahenange maku̱wa ghaa bantu aba mu bi̱twi̱ka-twi̱ke
kandi bakulasa ngi̱ghu̱ syabo na bimala byabo byonini.
9 Banai̱saaleeli̱ bali nga ntale,
eghi ekulangaalagha hansi kandi yeenanula.
Buuye ni ani̱ akugubha kulwana nabo?
Muntu weena oghu akuha Banai̱saaleeli̱ mu̱gi̱sa, akutunga mu̱gi̱sa.
Bhaatu oghu akubakiina naye akukiinuwa!”
10 Obu Bbalaamu aabu̱ghi̱ye eki, Bbalaki̱ aateela mu ngalo na maani̱ asaaluuwe kwonini kandi aaghila Bbalaamu ati, “Naakubilikiiye kwisa kukiina ngi̱ghu̱ syanje, bhaatu milundi esatu eghi yoona niibuwo waabaha mu̱gi̱sa. 11 Nahabweki olu̱ghe hani endindi kandi oghende mu ki̱i̱kalo kya ewaanu! Naabaagha ngi̱li̱ye nti nkukusasula kusemeeye, bhaatu Mukama aakutangi̱ye kutunga kantu koona.”
12 Bbalaamu aakuukamu Bbalaki̱ ati, “Buuye tanaghambiiye batumuwa aba waatu̱mi̱ye ewanje nti, 13 ‘Nankabha Bbalaki̱ ampa kikaali kiye kyona ekiisuuyemu siliva na feeja, tankukola kintu kyona haabwanje, kibe kilungi kedha ki̱bhi̱i̱hi̱ye, kusaali̱ya haa eki Mukama andaghiiye. Eki Mukama akungambila, niikiyo nku̱bu̱gha kyonkaha!’ 14 Endindi ndimakuuka mu bantu baa ewaatu, bhaatu wiise, oleke nkughambile eki Banai̱saaleeli̱ bakukolʼo bantu bʼomu ehanga lyawe mu bwile obuliisa.”
Butumuwa bwa Bbalaamu bwakanaa
15 Bbalaamu aaghila ati,
“Buni niibuwo butumuwa bwa Bbalaamu mutabani̱ wa Bbeyola,
butumuwa bwa muntu oghu akubonagha bbeni̱-bbeni̱,
16 butumuwa bwa muntu oghu aku̱u̱ghu̱wagha bighambo bya Luhanga,
eetegheeleli̱ya magheji ghaa wa Eghulu Munu,
muntu oghu akubonagha ebi Luhanga wa Bu̱toki̱ Bwona akunjolekagha,
nankabha ndangaala hansi makpu̱ngbu̱ nkuukalagha mboone ebikubʼo.
17 Mboone mukama oghu akulema ku̱lu̱gha mu Banai̱saaleeli̱.
Taakwisa kulema endindi, bhaatu mu bwile bwʼomu maaso.
Muusukulu wa Yakobbo oghu
akuba nga nsooli̱ya eghi ekwete kwaka kwonini.
Aku̱hwelekeeleli̱ya beebembeli̱ baa bantu baa Mowaabu
kandi akukpeetagula buhanga bwa baasukulu baa Seeji̱ boona.
18 Banai̱saaleeli̱ bakukwata nsi ya Edomu
kandi basi̱ngu̱le ngi̱ghu̱ syabo abaakaaye haai na mwena Seyi̱li̱.
Banai̱saaleeli̱ aba bakufooka baamaani̱.
19 Mu̱lemi̱ aku̱lu̱gha mu baasukulu baa Yakobbo
kandi aku̱hwelekeeleli̱ya abakuba bati̱ghaaye mu bibugha bya Edomu.”
Butumuwa bwa Bbalaamu bwokumaliilila
20 Bbalaamu aabona ebikughenda kubʼo Bameleeki̱ mu bwile bwa mu maaso kandi aalanga ati,
“Ehanga lya Bameleeki̱ niiliyo lyabaagha lyamaani̱ kusaali̱ya ghanji ghoona,
bhaatu haakumaliilila likuhwelekeelela.”
21 Obu aaboone Banakeeni̱ aaghila ati,
“Ki̱i̱kalo kyanu muukaayemu ki̱gu̱mi̱ye
kandi kili nga kisui kikwehuwe haa kikuka.
22 Bhaatu enu̱we Banakeeni̱ mukuhwelekeelela,
Banasi̱li̱ya bakukwata enu̱we haa bulemo kandi babatwale.”
23 Bbalaamu aatodha aaghila ati,
“Ni ani̱ akuukala ali mwomi̱i̱li̱
obu Luhanga akukola eki?
24 Maati̱ ghalimu balwani̱ ghaku̱lu̱gha Ki̱ti̱mu̱.
Baku̱si̱ngu̱la Si̱li̱ya na Ebbeli̱, bhaatu nabo bakuhwelekeelela dhee.”
25 Du̱mbi̱ Bbalaamu aamuka kandi aakuuka ewe e ka kandi Bbalaki̱ naye aaghenda dhee.