4
Kuhanuulila abanali bato
1 Baana banje, mu̱u̱ghu̱we ebi si̱ye eseenu̱we nkwete kubahabula,
nimwabi̱tegheleei̱ye, mukutunga kwetegheeleli̱ya.
2 Ebi nkwete ku̱beegheesi̱ya bisemeeye,
nahabweki mutabi̱lu̱ghʼo.
3 Obu naanabaagha mwana,
tita na maaha banku̱ndi̱ye nga mwana wabo omui enkaha,
4 tita akanjegheesi̱ya naaghila ati,
“Oosuke haa mutima ghwawe ebi nkwete ku̱bu̱gha kandi otabiibululuwa.
Okole ebi nkwete kukughambila, okuba mwomi̱i̱li̱.
5 Obe mugheji kandi weetegheeleli̱ye,
otaabululuwa kedha ku̱lu̱ghʼo ebi nkwete kukughambila.
6 Otalu̱ghʼo magheji, ghakukulinda.
Oghakunde, ghakukuloleelela.
7 Kintu kikulu eki obhonganuuwe kukola ni kutunga magheji.
Kuba mugheji kisaai̱ye kutunga bintu bikani̱ye.
8 Kaakuba okunda Wamagheji kandi omwebohelʼo bhyani,
akuleka baku̱hu̱ti̱ye.
9 Aku̱ku̱lu̱wi̱ka haa mutuwe sipeewa ya bimole,
sipeewa ya bukama eghi esemeleeye kimui.”
10 Mwana wanje, otegheeleli̱ye kandi osi̱i̱me ebi nkwete kukughambila,
okuba na bwomi̱i̱li̱ bukani̱ye.
11 Naakwegheseei̱ye ngoku okuba mugheji
kandi naakwoleka mulingo ghusemeeye ghwa kuukalamu.
12 Nuwaabaaye noolubhatanga taaliyo ekikukutanga
kandi nuwaabaaye nooli̱gi̱ta tookukobhoka.
13 Bwile bwona oosukaghe ebi weeghi̱ye,
obikwate kwonini, nanga bikukuha bwomi̱i̱li̱.
14 Otakola bintu ebi bantu babhi bakukolagha
kandi otaghendagha na bantu abakukolagha bintu bi̱bhi̱i̱hi̱ye.
15 Otabyeli̱li̱kanʼo, otabikola,
obi̱lu̱ghʼo kandi okole ebyawe.
16 Bantu babhi tabakughwesaghilagha ku̱hi̱ki̱ya bakoli̱ye kintu ki̱bhi̱i̱hi̱ye.
Bakuukalagha babhaliiye ku̱hi̱ki̱ya baleeteli̱i̱je muntu ku̱sobi̱ya.
17 Babbali̱ye kukola bintu bi̱bhi̱i̱ye kandi katabanguko,
ngoku babbali̱ye byokuliya kandi maaluwa!
18 Kihanda kya bahi̱ki̱li̱i̱ye kili nga musana ghukwete kutuwa,
oghukughendagha nguneeyongela
ku̱hi̱ki̱ya ghu̱bbeneleei̱ye kimui ntangaali̱.
19 Bhaatu kihanda kya bantu babhi kili nga mweli̱ma ghwonini.
Tabakubonagha bintu ebi bakwete kukobhoka.
Kugumila haa bikoluwa byawe
20 Mwana wanje, ooghu̱we bighambo byanje
kandi otegheeleli̱ye bhyani ebi nkwete ku̱bu̱gha.
21 Otabiibululuwa, ookalaghe noobiisuka
kandi noobyeli̱li̱kanʼo haa mutima ghwawe.
22 Bikuha bwomi̱i̱li̱ abakubitunga
kandi bi̱ki̱li̱ye weena oghu aku̱byetegheeleli̱ya.
23 Olinde mutima ghwawe kusaali̱ya bintu byona,
nanga ebi okweli̱li̱kanagha niibiyo okukolagha.
24 Otabu̱ghagha bisubha
kandi bighambo ebikuhabi̱i̱si̱ya banji.
25 Ololaghe tonono hambali okwete kughenda,
oleke kulolakaka.
26 Kyona eki okubbala kukola odu̱bhaghe okyeli̱li̱kanʼo bhyani,
niikuwo okolaghe eki̱hi̱ki̱ye.
27 Weetantale kukola bintu bi̱bhi̱i̱hi̱ye
kandi otali̱hi̱dha eki̱nde ku̱lu̱gha haa kihanda eki̱hi̱ki̱ye.