3
Kwesigha Mukama
1 Mwana wanje, otaabululuwa ebi nkwete ku̱kwegheesi̱ya.
Okwate haa mutima ghwawe ebi nkukulaghila kukola.
2 Nuwaabi̱koli̱ye okuba mwomi̱i̱li̱ myaka ekani̱ye
kandi okula-kulane.
3 Otaleka kuba na kukunda kwamaani̱ kandi bwesighibuwa.
Oleke bikubeele nga kikwanji alu̱wete mu bikiya
kandi obihandiike haa mutima ghwawe.
4 Nuwaakoli̱ye eki, Luhanga na bantu baku̱ku̱si̱i̱ma
kandi baku̱bu̱ghʼo kulungi.
5 Weesighe Mukama na mutima ghwawe ghwona,
oteesigha kukenga kwawe kwonkaha.
6 Oleke Mukama akuhikilaghe bwile bwona,
alakwolekagha kya kukola.
7 Oteeli̱li̱kanagha oti oli mugheji kusaali̱ya ngoku oli,
ohu̱ti̱yaghe Mukama kandi oleke kukola bintu bi̱bhi̱i̱hi̱ye.
8 Kini kikukuha bwomi̱i̱li̱
kandi okwehi̱ghu̱wa oli na maani̱.
9 Ohu̱ti̱yaghe Mukama noomuha haa bintu byawe.
Omuleetelaghe mughanulo ghwa ebi weeleei̱ye.
10 Nguli syawe sikuusula byokuliya
kandi binagha byawe bikuusula vi̱i̱ni̱.
11 Mwana wanje, otaghaya kuhana kwa Mukama
kandi naakutanu̱ki̱ye otahuwa maani̱.
12 Mukama akutanukagha aba aku̱ndi̱ye,
ngoku mubyaye akukolagha mwana oghu abbali̱ye.
Mu̱gi̱sa ghwa kutunga magheji
13 Ali na mu̱gi̱sa oghu akutungagha magheji
kandi aba na kukenga.
14 Wamagheji*3:14 Olole bighambo ebili hansi ya nsuula 1:20. ali na mughaso kusaali̱ya siliva
kandi na maghobo kusaali̱ya feeja.
15 Ni wa mughaso kusaali̱ya mabaale ghaa muhendo
kandi taaliyo kintu kyona eki okugubha kulengeesani̱ya naye.
16 Magheji ghe ghakuhaagha bwomi̱i̱li̱ bukani̱ye
kandi ghakuha buguudha na bantu ku̱ku̱hu̱ti̱ya.
17 Akulekagha ookala odheedheeu̱we
kandi akutwala hambali bu̱si̱nge buli.
18 Abakufookagha bagheji bakudheedhuwagha,
nanga magheji ghakubaha bwomi̱i̱li̱.
19 Mukama akahanga nsi haabwa magheji ghe.
Aatʼo mwanya haabwa kwetegheeleli̱ya kuwe.
20 Aatʼo maasi ghakusenda
kandi bicu kuleeta ki̱me munsi haabwa magheji ghe.
21 Mwana wanje, ogumile haa magheji kandi kwetegheeleli̱ya,
ookalaghe noobyeli̱li̱kanʼo bwile bwona.
22 Bikukuha bwomi̱i̱li̱ busemeeye
kandi bwa kudheedhuwa.
23 Okughenda kusemeeye mu kihanda kyawe
kandi tookukobhoka kighele kyawe.
24 Okughenda haa bulili bwawe otoobahi̱ye,
olangaale kandi oghwesaghiilile kimui.
25 Kintu kya kabhi nkyabaayʼo tookwobaha.
Tookwobaha ku̱hwelekeeleli̱ya kwa bantu babhi obu kukwisa nga kyegha.
26 Mukama akukulinda
kandi taakuleka kighele kyawe kukwatuwa mu ki̱ki̱ya.
27 Bwile bwona olabaagha noogubha,
ohaaghe buyambi̱ abakwetaaghisibuwa kubakoonela.
28 Otaghila muliilanuwa waawe oti, “Oghende, olakuuka munkiya nkuhe eki okubbala.”
Nuwaabaaye noogubha omukoonele bwile obu.
29 Otategheka kukola kubhi muliilanuwa waawe,
oghu aakaaye haai naawe kandi akwesi̱ghi̱ye.
30 Otalitongana na muntu otali na nsonga
kandi ataku̱koli̱ye kubhi.
31 Otalighilila etima bantu basaakaaye,
kedha kukopa ebi bakukolagha,
32 nanga Mukama oohi̱ye abakukolagha bintu bi̱bhi̱i̱hi̱ye,
bhaatu eesigha bantu bahi̱ki̱li̱i̱ye.
33 Mukama akukiinagha maka ghaa bantu babhi,
bhaatu aha mu̱gi̱sa ghaa bahi̱ki̱li̱i̱ye.
34 Akughayagha abakughayagha baanakyabo,
bhaatu aghilila ngughuma abadhooti̱ye.*3:34 Yakobbo 4:6
35 Bantu bagheji bakubahu̱ti̱yagha,
bhaatu badhoma beeyongela kuhemuka.