2
Mughaso ghwa magheji
1 Mwana wanje, otegheeleli̱ye bighambo byanje
kandi otaabululuwa ebi nkwete kukughambila kukola.
2 Ooghu̱waghe bighambo bya magheji
kandi otaaghe mutima ghwawe haa kwetegheeleli̱ya.
3 Obilikilaghe Luhanga kukuha magheji
kandi omwesengeleli̱yaghe kukuha kwetegheeleli̱ya.
4 Obibbalaghe ngoku bakubbalagha siliva
kedha kintu kya mughaso ekibabi̱si̱ye.
5 Okwetegheeleli̱ya ku̱hu̱ti̱ya Mukama
kandi otunge magheji ghaa kumanya Luhanga.
6 Mukama niiye akuhaagha magheji,
mu kanu̱wa ke haku̱lu̱ghaghamu kwetegheeleli̱ya kandi kukenga.
7 Niiye akukoonelagha kandi alinda bantu bahi̱ki̱li̱i̱ye
na abakukolagha ebi̱hi̱ki̱ye.
8 Akulindagha bihanda bya abali na bwengani̱ja
kandi aloleelela abamwesi̱ghi̱ye.
9 Nuwantegheleei̱ye, okumanya ebi̱hi̱ki̱ye, byamajima kandi bya bwengani̱ja
kandi okumanya ebi obhonganuuwe kukola.
10 Okufooka mugheji
kandi kwetegheeleli̱ya kwawe kukukuha kudheedhuwa.
11 Kweli̱li̱kana kulungi
kandi kwetegheeleli̱ya bikukulinda.
12 Magheji ghakukujuna bantu babhi,
abaku̱bu̱ghagha bighambo ebikuleeta bijibu.
13 Bakulekagha bwomi̱i̱li̱ bu̱hi̱ki̱li̱i̱ye
kandi baakala mu mweli̱ma ghwa kibhi.
14 Bakudheedhuwagha kukola bintu bi̱bhi̱i̱hi̱ye
kandi basemeeleluwa mu bubhi bwabo.
15 Bantu aba bakudimaagagha baanakyabo
kandi tabaku̱bu̱ghagha majima.
16 Okugubha kubhenga mukali̱ mu̱syani̱ weena,
oghu akulengʼo kukusoona-soona na bighambo biye biheheeye.
17 Mukali̱ oghu akulekagha eba wee oghu aasweuwe mu buujongo buwe
kandi aabululuwa ebi Luhanga aalaghiiye.
18 Kughenda mu numba ya mukali̱ oghu, oli mu kihanda kya lu̱ku̱.
Kughendayo ni kwetwala eku̱li̱mu̱.
19 Oghu akumubungilagha taakukuukagha.
Taakutodhagha akuuka mu boomi̱i̱li̱.
20 Nahabweki okolaghe ebi bantu balungi bakukolagha
kandi ookale na bwomi̱i̱li̱ bu̱hi̱ki̱li̱i̱ye.
21 Bantu bahi̱ki̱li̱i̱ye baliikala mu nsi
kandi beesighibuwa bali̱ghi̱ti̱ghalamu.
22 Luhanga aku̱hwelekeeleli̱ya bantu babhi mu nsi
kandi aayemu basi̱i̱si̱ ngoku bakumeenagha bi̱si̱ngo mu etaka.