6
Kuhabula haa budhoma
1 Mwana wanje, olaba nuweemeeye bhootu̱ syawe,
kedha weelaghi̱i̱sani̱ya kusasula ebanja eeholeei̱ye,
2 ebi waabu̱ghi̱ye na kanu̱wa kaawe
byangukuleetela kijibu kyamaani̱.
3 Mwana wanje, oghende okole kini niikuwo weejune,
nanga oli hansi ya bu̱toki̱ bwa muntu oghu aamuhaaye ebanja.
Oghende bwangu weesengeleli̱ye bhootu̱ syawe kukuuya mu nsonga esi.
4 Otasi̱i̱ma kughwesaghila,
kedha kuhuumula otakabu̱ghi̱ye naye.
5 Weejune nga mpala ekuuluka mu̱hi̱i̱ghi̱
kandi nga noni̱ ekuhalala kati̱mba.
6 Uwe mughala weeghele haa nkubebe,
weetegheeleli̱ye ebi sikukolagha kandi obe mugheji.
7 Tasili na mwebembeli̱, mukama,
kedha mu̱lemi̱,
8 bhaatu mu bwile bwa kyanda,
sikukumaani̱yagha byokuliya byasiyo,
ebi sikuliya mu bwile bwa elobe.
9 Uwe mughala okughwesaghila ku̱hi̱ki̱ya dhi̱?
Oku̱su̱su̱mu̱ka dhi̱?
10 Mughala akughilagha ati, “Oleke ndangaalʼo kati̱i̱,
neekumbate kandi mpuumulʼo.”
11 Bhaatu ngoku okweyongela kughwesaghila,
niikuwo bunaku bu̱ku̱ku̱lu̱mba nga mu̱ji̱ndi̱ akwete kyakulwani̱i̱si̱ya.
12 Muntu mubhi kandi oghu atali na mughaso,
akughendagha naaha bisubha.
13 Akuukalagha naalolakaka,
naadhi̱ngi̱ya bighele
kandi nongota na byala biye.
14 Akuukalagha naategheka kukola bintu bi̱bhi̱i̱hi̱ye haa mutima ghuwe,
akuleetagha bijibu bwile bwona.
15 Nahabweki kubona-bona ku̱li̱mu̱hi̱kʼo bwangu,
du̱mbi̱ aku̱we kandi ahwelekeelele.
16 Haliyo bintu mukaagha ebi Mukama oohi̱ye,
kedha musanju̱ ebi ataakugubha ku̱gu̱mi̱si̱li̱ja:
17 Maaso ghaamyepanko, kanu̱wa akakuhaagha bisubha
kandi mikono eghi ekwitagha bantu abatali na musango,
18 mutima oghu̱kweli̱li̱kanagha kukola bintu bi̱bhi̱i̱hi̱ye
kandi bighele ebikughendagha bwangu kukola bintu bi̱bhi̱i̱hi̱ye,
19 kuha buukai̱so bwa bisubha
kandi kuleeta kutongana mu bantu baa ka emui.
Kuteelelela haa bu̱syani̱
20 Mwana wanje, ooghu̱waghe bilaghilo bya so waawe
kandi otaghaya ebi njoko waawe aku̱kwegheesi̱ya.
21 Obihandiike haa mutima ghwawe
kandi bikubeele nga kikwanji olu̱wete mu bikiya.
22 Bilakuhikilagha oli mu lughendo,
bikulindaghe mukilo olangaaye
kandi olakabbu̱mbu̱kagha bilabu̱ghagha naawe.
23 Bilaghilo ebi kandi nʼebi tukwete ku̱kwegheesi̱ya,
bili nga taala eghi ekukuha kyeleeli̱ mu kihanda.
Nitwakuhani̱ye tukuba ntukwoleka
mulingo ghusemeeye ghwa kuukalamu.
24 Bikukulinda kwetantala mukali̱ mubhi
kandi bighambo biheheeye bya mukali̱ wa baanini.
25 Kusemela kuwe kutakwohi̱ya
kandi mulingo akukulola kutakutwalilija.
26 Mukali̱ malaaya akukuha bunaku,
bhaatu kulangaala na mukali̱ wa baanini kyanguleka bakwite.
27 Muntu anguheeka mulilo haa ki̱ku̱bha
kandi ngoye siye siikala sitahiiye?
28 Muntu angukpeeta haa makala ghaaki̱ye,
bighele biye biikala bitahiiye?
29 Kili kitiyo nʼoghu akulangaalagha na mukali̱ wa baanini
kandi oghu akukikola akubona-bona.
30 Bantu tabakughayagha musuma oghu aabhi̱ye byokuliya,
haabwa njala kumukwata.
31 Bakaakumukwatagha, bamusasu̱li̱ya ebi aabhi̱ye milundi musanju̱
kandi ahayo byona ebi ali nabiyo.
32 Musaasa oghu aku̱syanagha na mukali̱ wa baanini, taali na magheji,
nanga akweleetelejagha kuhwelekeelela eenini.
33 Mbaamukwete, baku̱mu̱hu̱taali̱ya kandi bamuswaje
kandi kuhemuka oku takukumuhuwʼo.
34 Bali̱i̱ wa mukali̱ oghu kusaaliluwa kukuleka asaakalile kimui
kandi mafubila muunakiye taakughila kisa.
35 Taaliyo sente sikani̱ye esi aku̱si̱i̱ma kumuha,
kedha bintu kumumalʼo ki̱i̱ni̱gha.