7
Kuteelelela kunji haa bu̱syani̱
1 Mwana wanje, okwate bighambo byanje
kandi otaabululuwa ebi nkukulaghila kukola.
2 Okwate bilaghilo byanje kandi okuba mwomi̱i̱li̱.
Olinde njegheesi̱ya yanje ngoku okulindagha mboni̱ ya li̱i̱so lyawe.
3 Okwate njegheesi̱ya yanje mu bwile bwona
kandi oghihandiike haa mutima ghwawe.
4 Okunde magheji nga mwanjoko waawe
kandi kwetegheeleli̱ya nga bhootu̱ syawe eenini.
5 Bikukukoonela kwelinda mukali̱ wa baanini
kandi mukali̱ oghu ali na bighambo bya kusoona-soona.
6 Bwile bumui nkaba ndi mu numba yanje,
ndi haai na di̱li̱sa ndoli̱ye enja.
7 Naabona batabhana abateetegheleei̱ye,
mu ebo akaba halimu omui atali na magheji.
8 Aalubhatangagha mu luguudhe, aasaalila haa koona,
kughenda hambali numba ya mukali̱ malaaya eli.
9 Ekaba eli lwagholo,
hambali mweli̱ma ghutandika kukwatila.
10 Du̱mbi̱ mukali̱ oghu aatuwa kumusangaana,
alu̱wete nga malaaya
kandi neeli̱li̱kana kusoona-soona mutabhana oghu.
11 (Nahabweki mukali̱ oghu akaba ali wa mpaka kandi ali mu̱jeemi̱.
Taakalagha ewe e ka.
12 Bwile bunji aabungagha mu nguudhe,
na bunji mu butale kuhiigha musaasa.)
13 Mukali̱ oghu aaghwilikiilila mutabhana oghu
kandi aamughuwa mu ki̱ku̱bha.
Aamulola tonono, aamughila ati,
14 “Obwalo naahongi̱ye kihonguwa kyanje
kandi ndi na nyama esyati̱ghaayʼo.
15 Nahabweki nuuwe naasi̱ye kubbala,
niikaaye ninkulolakaka kwonini
kandi naakuboone!
16 Naali̱ye haa bulili bwanje,
si̱i̱ti̱ sya langi̱ esi̱lu̱ghi̱ye Mi̱si̱li̱.
17 Naafuhililiiye bulili bwanje
bigita bya maasi bisasi̱ye.
18 Wiise tweghonje ku̱hi̱ki̱ya nkyambisi,
tudheedhuwe kandi twolekangane kukunda.
19 Bali̱i̱ wanje taali e ka,
aaghendi̱ye mu lughendo hambali haseli̱ye.
20 Aaghendi̱ye na kikapa kiisuuye sente
kandi akukuuka haanu̱ma ya wi̱i̱ki̱ ebili.”
21 Mukali̱ oghu aamusoona-soona na bighambo biheheeye
kandi mutabhana oghu aasi̱i̱ma ebi akwete ku̱bu̱gha.
22 Mutabhana oghu aamukwama,
ali nga nte bakutwala kwita
kandi nga mpala ekwatu̱u̱we mu ki̱ki̱ya.
23 Atamani̱ye ngu bakugubha kumulasa kimala aku̱we.
Aaba nga noni̱ ekughenda kukwatuwa mu kati̱mba
kandi ataamanya ngoku bwomi̱i̱li̱ buwe buli mu kabhi.
24 Baana banje, mu̱ntegheeleli̱ye,
mu̱u̱ghu̱we ebi nkwete ku̱bu̱gha.
25 Otasi̱i̱ma mukali̱ oghu kuhabi̱i̱si̱ya mutima ghwawe
kandi otaghenda omukwamiliiye.
26 Mukali̱ oghu aaleki̱ye basaasa bakani̱ye bahwelekeelela
kandi taaliyo oghu akugubha kubala basaasa aba aati̱i̱si̱i̱ye.
27 Kutaaha mu numba ya mukali̱ oghu,
nkughenda mu kihanda kya kituulo.
Ni kihanda kya bwangu kya ku̱ku̱wa.