8
Mi̱gi̱sa ya kuba mugheji
1 Wamagheji oghu eetegheleei̱ye,
akwete kubilikila nʼelaka lyamaani̱.
2 Aamiliiye haagu̱u̱li̱ ya bwena
kandi haakpengbu̱ ya ntanga-tangano sya nguudhe.
3 Ali haai na maageeti̱ ghaa kibugha
kandi niibuwo aabilikila nʼelaka lyamaani̱ ati,
4 “Nkwete kubilikila bu̱li̱ muntu
kandi niibuwo naakoobi̱ya nʼelaka lyamaani̱ bantu boona.
5 Enu̱we abali na magheji ghakee,
mweghe kwetegheeleli̱ya.
Enu̱we badhoma, mwekambe kuba bagheji.
6 Mu̱tegheeleli̱ye bighambo bisemeeye
kandi bi̱hi̱ki̱ye ebi nkubaghambila.
7 Nku̱bu̱ghagha majima,
nanga noohi̱ye bisubha.
8 Byona ebi nku̱bu̱gha na kanu̱wa kanje bi̱hi̱ki̱ye,
taalimu bisubha kedha ebikuhabi̱i̱si̱ya.
9 Byona bi̱hi̱ki̱ye ewaa oghu eetegheleei̱ye
kandi ni byamajima haa bantu bagheji.
10 Okomemu ebi nkukulaghila mu ki̱i̱kalo kya siliva
kandi magheji kusaali̱ya feeja esemeleeye kimui.
11 Ni̱i̱si̱ye magheji, nsaai̱ye mabaale ghaa muhendo,
taaliyo eki okugubha kususaani̱ya nanje.
12 Ni̱i̱si̱ye magheji, ndi na kwetegheeleli̱ya,
ndi mugheji kandi nku̱tu̱waghamu ebi̱hi̱ki̱ye.
13 Ku̱hu̱ti̱ya Mukama ni kwoha kibhi.
Noohi̱ye kwebhi̱mba-bhi̱mbi̱ya, myepanko, ngeso sibhi kandi bisubha.
14 Ni̱i̱si̱ye nkuhabulagha kandi ndi na magheji ghasemeeye,
neetegheleei̱ye kandi ndi na maani̱.
15 Nkukoonelagha bakama kulema
kandi balemi̱ kutʼo bilaghilo bisemeeye.
16 Nkukoonelagha balemi̱ baa munsi,
bantu abali na bu̱toki̱ kandi bacu̱ baa misango.
17 Abaku̱ndi̱ye siye, nanje niibo nku̱ndi̱ye,
abakumbalagha kwonini bakumbonagha.
18 Ni̱i̱si̱ye nkuhaagha bantu buguudha, kubahu̱ti̱ya,
kukula-kulana kandi kukola kulungi bintu.
19 Ebi nkuhaagha bisaai̱ye feeja esemeleeye kimui
kandi siliva esemeeye kwonini.
20 Nkukolagha ebi̱hi̱ki̱ye
kandi mu bwengani̱ja.
21 Abaku̱ndi̱ye siye nkubahaagha buguudha
kandi nku̱u̱su̱li̱yagha sitoowa syabo bintu bya mughaso.
22 Ni̱i̱si̱ye nkaba kintu kyʼoku̱du̱bha eki Mukama aahangi̱ye ku̱lu̱gha hambele,
atakakoli̱ye bintu binji byona.
23 Nkakoluwa ku̱lu̱gha hambele,
nkabʼo ku̱lu̱gha mu ntandiko nsi etakabaayʼo.
24 Nkabʼo maananja ghatakabaayʼo
kandi nsulo esikuseesagha maasi sitakabaayʼo.
25 Nkabyaluwa myena etakahangu̱u̱we
kandi bwena butakabaayʼo.
26 Nkaba ndiyo obu Luhanga aabaagha atakahangi̱ye nsi, kedha kutaamu misili
kandi atakataaye tu̱u̱tu̱ hansi.
27 Nkaba ndiyo obu aataagha bu̱li̱ kintu mu mwanya
kandi mitaano ya maananja.
28 Nkaba ndiyo obu aataagha bicu mu mwanya
kandi obu aataaghʼo nsulo kufooka nanja.
29 Nkaba ndiyo obu aataaghʼo mitaano ya maananja ghanamulito,
niikuwo maasi ghatasaala mitaano yagho
kandi obu aataaghʼo misingi ya nsi.
30 Nkaba ndi haai naye,
ndi mwebembeli̱ haa mulimo oghu,
bu̱li̱ kilo ni̱i̱si̱ye naalekagha adheedhuwa.
Kuukala naye kwalekagha ndheedhuwa.
31 Nsi eghi aahangi̱ye ekandheedha
kandi naasemeleluwa haabwa bantu aba aakoli̱ye.
32 Nahabweki baana banje, mu̱ntegheeleli̱ye.
Bali na mu̱gi̱sa abakukwatagha ebi mbaghambiiye.
33 Mu̱u̱ghu̱we ebi nkubahabula niikuwo mube bagheji
kandi mutabighaya.
34 Ali na mu̱gi̱sa oghu aku̱tegheeleli̱yagha ebi nku̱bu̱gha,
oghu akuukalagha bwile bwona haa lwighi lwanje,
alindilila haa mulyango ghwa numba yanje.
35 Weena oghu akuntungagha,
akutunga bwomi̱i̱li̱
kandi Mukama akumughilila kisa.
36 Bhaatu oghu ataakuntungagha,
akweleeteleja kusaaliluwa eenini.
Boona abanjohi̱ye baku̱ndi̱ye lu̱ku̱.”