9
Magheji kandi budhoma
1 Wamagheji*9:1 Olole bighambo ebili hansi ya nsuula 1:20. aakweye numba yee,
aaghi̱gu̱mi̱ya na mpaghi musanju̱.
2 Aasali̱ye kisolo kiye,
aahi̱si̱ya vi̱i̱ni̱ esemeeye
kandi aamali̱ye kuteekani̱ja ki̱ghenu̱.
3 Aatu̱mi̱ye baheeleli̱ya be baabukali̱ kubilikila
haa bi̱i̱kalo bikangami̱ye byʼomu kibugha ati,
4 “Enu̱we boona abali na magheji ghakee,
mwise mutaahe mu numba.”
Akughilagha badhoma ati,
5 “Mwise muliye byokuliya byanje
kandi munuwe haa vi̱i̱ni̱ eghi naahi̱i̱si̱i̱ye.
6 Muleke kuukala na bantu abali na magheji ghakee niikuwo mube na bwomi̱i̱li̱
kandi mukwamilile abeetegheleei̱ye.
7 “Nuwaahabuuye wa mighayo, akukwambula,
nuwaasoghosi̱ye muntu mubhi akukuhutaali̱ya.
8 Otahana wa mighayo, akukwoha,
bhaatu nuwaahabuuye mugheji, akukukunda.
9 Kyona eki okughambila mugheji, kikumwongela kuba mugheji.
Eki okwegheesi̱ya oghu ahi̱ki̱li̱li̱i̱ye, kikumwongela kwetegheeleli̱ya.
10 Ku̱hu̱ti̱ya Mukama niiyo ntandiko ya magheji
kandi kumanya oghu Ahi̱ki̱li̱i̱ye,
kikuhaagha kwetegheeleli̱ya.
11 Kuba mugheji kukuleka omale bilo bikani̱ye
kandi kwongele myaka eghi okumala onali mwomi̱i̱li̱.
12 Nuwaabaaye mugheji, kikukughasila,
bhaatu nuwaaghai̱ye magheji,
nuuwe weenini okubona-bona.”
13 Mukali̱ mudhoma akuukalagha naatongana,
taali na magheji kandi taali nʼeki amani̱ye.
14 Akusitamagha haa mulyango ghwa numba yee,
kedha haa ntebe mu bi̱i̱kalo bikulu byʼomu kibugha.
15 Aakala kubilikila abakwete kusaala,
kughenda mu byabo ati,
16 “Weena oghu ali na magheji ghakee, aase hani!”
Aghila badhoma ati,
17 “Maasi baabhi̱ye ghasemeeye kughanuwa
kandi byokuliya ebikuliibuwa mu ki̱bi̱so bi̱nu̱li̱ye.”
18 Abakutaahagha mu numba ya mukali̱ oghu,
tabakumanyagha ngu halimu lu̱ku̱.
Abaataahi̱yemu̱ boona, bali endindi eku̱li̱mu̱.