10
Nsi̱mo sya Solomooni̱
1 Nsi̱mo sya Solomooni̱.
Mwana mugheji akulekagha ese wee adheedhuwa,
bhaatu mudhoma aleka ni̱na wee atuntula.
2 Etungo eli̱lu̱ghi̱ye mu kukola bintu bi̱bhi̱i̱hi̱ye talili na mughaso,
bhaatu bu̱hi̱ki̱li̱i̱le bukukujuna lu̱ku̱.
3 Mukama taakuleka bahi̱ki̱li̱i̱ye mbabuluwa byokuliya,
bhaatu akutangagha bantu babhi kutunga ebi bakubbala.
4 Muntu mughala akubaagha munaku,
bhaatu oghu akukolagha na maani̱ akubaagha muguudha.
5 Mugheji akukumaani̱yagha mu bwile bwa kukesa,
bhaatu oghu akughwesaghilagha
akuhemukagha.
6 Muntu mulungi akutungagha mi̱gi̱sa,
bhaatu kanu̱wa kaa muntu mubhi kabi̱sa ebikuleeta katabanguko.
7 Kuusuka muntu mulungi kukuhaagha mu̱gi̱sa,
bhaatu muntu mubhi bakumuubululuwagha bwangu.
8 Muntu mugheji aku̱si̱i̱magha bihanuulo bisemeeye,
bhaatu oghu aku̱bu̱ghagha bya budhoma alihwelekeelela.
9 Muntu wamajima akubaagha kulungi kandi aakala mu bu̱si̱nge,
bhaatu oghu atali wamajima bakumumanyagha.
10 Muntu oghu akubhengagha ku̱bu̱gha majima akuleetagha bijibu,
bhaatu oghu akusoghosagha bbeni̱-bbeni̱ akuleetagha bu̱si̱nge.
11 Kanu̱wa kaa muntu ahi̱ki̱li̱i̱ye ni nsulo ya bwomi̱i̱li̱,
bhaatu kanu̱wa kaa muntu mubhi kabi̱sa ebikuleeta katabanguko.
12 Kaakuba wooha bantu banji okutongana nabo,
bhaatu nuwaabaaye obaku̱ndi̱ye,
okubaghanila ebi basobeei̱ye.
13 Bantu bagheji baku̱bu̱ghagha byamagheji,
bhaatu bantu batali na magheji babahuula mi̱i̱gho haa mighongo.
14 Bantu bagheji bakuukalagha na kwetegheeleli̱ya kwabo,
bhaatu mbu̱gha ya badhoma, ekuleetagha kuhwelekeelela.
15 Muguudha ebi ali nabiyo bikumulindagha,
bhaatu bunaku bu̱ku̱hwelekeeleli̱yagha munaku.
16 Mpeela ya kukola bintu bisemeeye ni bwomi̱i̱li̱,
bhaatu eki bantu babhi bakutungagha ni kweyongela ku̱si̱i̱sa.
17 Oghu aku̱si̱i̱magha kumuhana ali mu kihanda kya bwomi̱i̱li̱,
bhaatu oghu akubhengagha kumuhabula akuhabagha.
18 Oghu akubisagha etima ni mu̱hi̱ wa bisubha
kandi oghu akukokagha bantu banji ni mudhoma.
19 Nuwaabu̱ghi̱ye bighambo bikani̱ye oku̱bu̱gha kintu ki̱sobi̱ye,
bhaatu mugheji akwelindagha kanu̱wa ke.
20 Ebi muntu mulungi aku̱bu̱ghagha bili nga siliva esemeeye,
bhaatu byeli̱li̱kano bya muntu mubhi tabili na mughaso.
21 Ebi muntu mulungi aku̱bu̱ghagha bikughasilagha bantu bakani̱ye,
bhaatu badhoma baku̱ku̱waagha
haabwa kubuluwa kwetegheeleli̱ya.
22 Mukama naakuhaaye mu̱gi̱sa okuba muguudha,
taghulimu kutuntula.
23 Nkintu kya budhoma kudheedhuwa okoli̱ye kintu ki̱bhi̱i̱hi̱ye,
bhaatu kukola byamagheji,
kikudheedhagha abeetegheleei̱ye.
24 Muntu mubhi kintu eki oobahi̱ye niikiyo kikumubʼo,
bhaatu bahi̱ki̱li̱i̱ye bakutunga eki bakubbala.
25 Bijibu ebikwisagha nga kyegha,
bi̱ku̱hwelekeeleli̱yagha bantu babhi,
bhaatu bantu balungi bakuukalagha bagu̱mi̱ye bilo nʼebilo.
26 Mughala akusaali̱jagha oghu amu̱tu̱mi̱ye,
ngoku vi̱i̱ni̱ esaaliiye mu kanu̱wa kandi mwi̱ka mu maaso.
27 Ku̱hu̱ti̱ya Mukama kukuhaagha bwomi̱i̱li̱ bukani̱ye,
bhaatu bantu babhi bakumala myaka nkee.
28 Kunihila kwa bantu bahi̱ki̱li̱i̱ye kukulekagha badheedhuwa,
bhaatu bantu babhi eki bakunihilagha tabakukitungagha.
29 Mukama akulindagha bantu balungi,
bhaatu ahwelekeeleli̱ya abakukolagha bintu bi̱bhi̱i̱hi̱ye.
30 Bantu bahi̱ki̱li̱i̱ye bakulinduwagha kusemeeye,
bhaatu babhi tabaliikala munsi eni.
31 Bantu bahi̱ki̱li̱i̱ye baku̱bu̱ghagha byamagheji,
bhaatu kanu̱wa akaku̱bu̱ghagha bintu bi̱bhi̱i̱hi̱ye balikaaghala.
32 Bantu abali na majima bamani̱ye eki̱hi̱ki̱ye ku̱bu̱gha,
bhaatu babhi bakuhaagha bisubha bwile bwona.