11
1 Mukama oohi̱ye minjaani̱ esitahi̱ki̱ye,
bhaatu abbala esi̱hi̱ki̱ye.
2 Myepanko ekuleetagha kuhemuka,
bhaatu mugheji akwebundaali̱yagha.
3 Bantu balungi bwesighibuwa bwabo bukulekagha bakola byamajima,
bhaatu abatali beesighibuwa bakuhwelekeelela haabwa bisubha byabo.
4 Buguudha tabukukoonela haa kilo kya ku̱twi̱lu̱wa musango,
bhaatu bu̱hi̱ki̱li̱i̱le bukujunagha lu̱ku̱.
5 Bu̱hi̱ki̱li̱i̱le bwa muntu atali na kamogo bukuleka akole ebi̱hi̱ki̱ye,
bhaatu muntu mubhi akweleetelejagha kuhwelekeelela.
6 Bu̱hi̱ki̱li̱i̱le bwa muntu ahi̱ki̱li̱i̱ye bukumujunagha,
bhaatu abatali beesighibuwa bakukwatuwagha haabwa mululu ghwabo.
7 Muntu mubhi akaaku̱ku̱waagha, ebi aanihilagha bihuwʼo.
Buguudha eesighagha bubuluwa mughaso.
8 Muntu ahi̱ki̱li̱i̱ye akulinduwagha mu bijibu,
bighendʼo muntu mubhi.
9 Muntu atahu̱ti̱i̱ye Luhanga kanu̱wa ke kaku̱hwelekeeleli̱yagha muliilanuwa wee,
bhaatu bantu bahi̱ki̱li̱i̱ye kwetegheeleli̱ya kwabo kukubajunagha.
10 Bantu bahi̱ki̱li̱i̱ye bakaakukula-kulanagha,
habʼo kudheedhuwa mu kibugha
kandi bantu babhi mbaaku̱wa,
bantu basemeeleluwa kwonini.
11 Bantu balungi bakuleetagha nkula-kulana mu kibugha,
bhaatu kanu̱wa kaa bantu babhi kaki̱hwelekeeleli̱ya.
12 Nkintu kya budhoma ku̱bu̱ghʼo kubhi muliilanuwa waawe,
bhaatu muntu oghu eetegheleei̱ye, akuukalagha aholeei̱ye.
13 Muntu wa bikoko aku̱bu̱ghagha bu̱li̱ kintu,
bhaatu mwesighibuwa abiika nsi̱ta.
14 Ehanga litaabaaye na mwebembeli̱ wa magheji likughuwa,
bhaatu bahi̱ baa magheji mbaakani̱ye likuba na bu̱si̱nge.
15 Oghu akwemela oghu atamani̱ye akubona-bona,
bhaatu oghu akubhenga kukikola akuba na bu̱si̱nge.
16 Mukali̱ wa kisa baku̱mu̱hu̱ti̱yagha,
bhaatu basaasa basaakaaye batunga buguudha bwonkaha.
17 Musaasa wa kisa kikumughasilagha,
bhaatu oghu asaakaaye eeleteleja bijibu.
18 Muntu mubhi akutungagha mpeela etali mu majima,
bhaatu oghu akukolagha ebi̱hi̱ki̱ye atunga ya majima.
19 Muntu oghu akweyongela kukola ebi̱hi̱ki̱ye akuba mwomi̱i̱li̱,
bhaatu oghu akuukala naakola bintu bi̱bhi̱i̱hi̱ye aku̱ku̱wa.
20 Mukama oohi̱ye abatali na mitima esemeeye,
bhaatu aku̱ndi̱ye abakukolagha ebi̱hi̱ki̱ye.
21 Omanye ngu bantu babhi balifubiluwa,
bhaatu bahi̱ki̱li̱i̱ye niibo balijunuwa.
22 Mukali̱ asemeeye atali na ngeso,
ali nga mpete ya feeja bataaye mu muhuli ghwa mpunu.
23 Ntegheka sya bantu bahi̱ki̱li̱i̱ye sikuleetagha bilungi,
bhaatu sya bantu babhi sileeta bijibu.
24 Oghu akuheelagha busa akubaagha muguudha,
mukuku aba munaku.
25 Muntu mwenge akula-kulana,
nʼoghu akukoonela banji naye akukooneluwa.
26 Bantu bakukiinagha oghu akubiikagha bilimuwa biye,
bhaatu basinda oghu aku̱si̱i̱magha ku̱bi̱ghu̱li̱ya.
27 Oghu akwekamba kukola bilungi baku̱mu̱hu̱ti̱ya,
bhaatu oghu abbali̱ye bijibu niibiyo akutunga.
28 Oghu akwesigha buguudha buwe akughuwa,
bhaatu oghu ahi̱ki̱li̱i̱ye akuba kulungi nga ki̱si̱ka kibisi.
29 Munakutalibani̱ja ka yee akumaliililagha atiyo
kandi mudhoma akuba mu̱syana wa mugheji.
30 Bu̱hi̱ki̱li̱i̱le bukuhaagha bwomi̱i̱li̱
kandi muntu mugheji akutungagha baabhootu̱.
31 Bantu bahi̱ki̱li̱i̱ye balaba mbatunga mpeela yabo munsi muni,
majima kuwo bantu babhi na basi̱i̱si̱ balifubiluwa.