12
1 Oghu aku̱ndi̱ye kumuhana abbali̱ye magheji,
bhaatu oghu oohi̱ye kumuhabula ni mudhoma.
2 Muntu mulungi akudheedhagha Mukama,
bhaatu afubila abakuteghekagha kukola bintu bi̱bhi̱i̱hi̱ye.
3 Muntu oghu akukolagha bintu bi̱bhi̱i̱hi̱ye taakubaagha na bu̱si̱nge,
bhaatu oghu ahi̱ki̱li̱i̱ye akuukalagha agu̱mi̱ye.
4 Mukali̱ wa ngeso akulekagha bahu̱ti̱ya eba wee,
bhaatu oghu akumuhemulagha ali nga bulwaye obu̱ku̱mu̱gu̱ndi̱ya maku̱wa.
5 Bantu bahi̱ki̱li̱i̱ye bakuteghekagha bya bwengani̱ja,
bhaatu babhi bahanuula bisubha.
6 Ebi bantu babhi baku̱bu̱ghagha bikwitagha,
bhaatu bya bahi̱ki̱li̱i̱ye bijuna bantu.
7 Bantu babhi baku̱ku̱waagha kandi babulangana,
bhaatu maka ghaa bahi̱ki̱li̱i̱ye ghakuukalagha ghagu̱mi̱ye.
8 Muntu bakumusindagha haabwa magheji ghe,
bhaatu mudhoma bamughaya.
9 Muntu oghu batahu̱ti̱i̱ye oghu akwekolelagha eenini,
asaai̱ye oghu akwefoolagha wamaani̱ bhaatu atali na byokuliya.
10 Muntu mulungi akuloleelelagha bisolo biye,
bhaatu bantu babhi babisaakalila.
11 Oghu akukola na maani̱ mu kibanja kiye, akuba na byokuliya bikani̱ye,
bhaatu badhoma bakumalilagha bwile haa bintu bitali na mughaso.
12 Bantu babhi bakubbalagha kuukala mbakola bintu bi̱bhi̱i̱hi̱ye,
bhaatu bantu bahi̱ki̱li̱i̱ye baakala bagu̱mi̱ye.
13 Muntu mubhi akukwatiluwagha mu ebi aku̱bu̱ghagha,
bhaatu bantu bahi̱ki̱li̱i̱ye bakuulukagha bijibu.
14 Muntu ebi aku̱bu̱ghagha niibiyo bikumuleetelagha bilungi
kandi alitunga mpeela haabwa ebi akukolagha.
15 Muntu mudhoma akweli̱li̱kanagha ati akwete kukola ebi̱hi̱ki̱ye,
bhaatu mugheji akwetegheeleli̱yagha ebi bakumuhanuulila.
16 Mudhoma akwolekagha bwangu ngoku asaaluuwe,
bhaatu mugheji aghaya ebi bakwete kumwambula.
17 Oghu aku̱bu̱ghagha majima akuhaagha buukai̱so bwamajima,
bhaatu oghu atali na majima abu̱gha bisubha.
18 Bighambo bi̱bhi̱i̱hi̱ye bikusaalijagha muntu nga kihiyo bamu̱tu̱bhi̱ti̱ye,
bhaatu bighambo bya mugheji bi̱ku̱ki̱li̱yagha.
19 Bisubha bikumalagha bwile bukee,
bhaatu majima ghaakalʼo bwile bwona.
20 Abakuteghekagha kukola bintu bi̱bhi̱i̱hi̱ye bakudimaagagha bantu banji,
bhaatu abakuleetagha bu̱si̱nge bakudheedhuwagha.
21 Taaliyo kabhi akakubʼo bantu bahi̱ki̱li̱i̱ye,
bhaatu bantu babhi bakuukalagha mu bijibu.
22 Mukama oohi̱ye abakuhaagha bisubha,
bhaatu abaku̱bu̱ghagha majima bakulekagha adheedhuwa.
23 Muntu mugheji aku̱holi̱yagha ebi amani̱ye,
bhaatu badhoma balangilila budhoma bwabo.
24 Nuwaakoli̱ye na maani̱ okulema bantu banji,
bhaatu bughala bukukufoola mu̱syana.
25 Kutuntula kukulekagha muntu atadheedhuwa,
bhaatu bighambo bya kisa bileka asemeeleluwa.
26 Muntu ahi̱ki̱li̱i̱ye akuhanuulilagha kusemeeye baabhootu̱ siye,
bhaatu muntu mubhi abahabi̱i̱si̱ya.
27 Nuwaabaaye mughala, tookutunga eki okubbala,
bhaatu nuwaakoli̱ye bhyani, okuba na etungo likani̱ye.
28 Kihanda kya bu̱hi̱ki̱li̱i̱le kikutwalagha mu bwomi̱i̱li̱
kandi takikutwalagha mu lu̱ku̱.