13
1 Mwana mugheji aku̱si̱i̱magha ebi babyaye be bakumuhabula,
bhaatu wa mighayo abhenga kumuhana.
2 Muntu mulungi akudheedhuwagha haabwa bintu bilungi aku̱bu̱ghagha,
bhaatu oghu akuhaagha bisubha akuleetagha butabanguko.
3 Oghu akwelinda kanu̱wa ke, akulindagha bwomi̱i̱li̱ buwe,
bhaatu oghu aku̱bu̱ghagha atafuuyʼo, akwehwelekeeleli̱ya eenini.
4 Muntu mughala taakutungagha ebi akubbala,
bhaatu oghu akukolagha bhyani akutungagha byona ebi akubbala.
5 Muntu ahi̱ki̱li̱i̱ye taakubbalagha bisubha,
bhaatu mubhi akukolagha ebikumuhemula kandi ebikumuswaja.
6 Bu̱hi̱ki̱li̱i̱le bukulindagha muntu oghu atali na kamogo,
bhaatu bikoluwa bi̱bhi̱i̱hiiye bi̱hwelekeeleli̱ya basi̱i̱si̱.
7 Bamui mu bantu bakwefoolagha baguudha batali na kantu,
banji beefoola banaku bali baguudha.
8 Muguudha aku̱koleesi̱yagha sente siye kujuna bwomi̱i̱li̱ buwe,
bhaatu taaliyo oghu akwobahi̱i̱li̱li̱yagha munaku.
9 Bantu bahi̱ki̱li̱i̱ye bali nga taala ekwete kwaka kulungi,
bhaatu babhi bali nga taala eghi ekwete ku̱li̱ma.
10 Myepanko ekuleetagha kutongana,
bhaatu abaku̱si̱i̱magha kubahanuulila mbagheji.
11 Etungo lya bwangu-bwangu talikwedhagha,
bhaatu lya bukee-buke likughendagha ndineeyongela.
12 Muntu akaakunihilagha kintu ataakitunga akwehi̱ghu̱wagha kubhi,
bhaatu naakitunga, eehi̱ghu̱wa kulungi kandi adheedhuwa.
13 Oghu akughayagha kuhabuluwa akwehwelekeeleli̱yagha,
bhaatu oghu akukwatagha kilaghilo alitunga mpeela.
14 Njegheesi̱ya ya muntu wa magheji ni nsulo ya bwomi̱i̱li̱
kandi kikujunagha muntu lu̱ku̱.
15 Kwetegheeleli̱ya kukulekagha bantu baku̱hu̱ti̱ya,
bhaatu abatali beesighibuwa bali mu kihanda kya kuhwelekeelela.
16 Muntu mugheji akweli̱li̱kanaghʼo kintu atakaki̱koli̱ye,
bhaatu mudhoma ooleka budhoma buwe.
17 Mutumuwa mubhi akuleetagha bijibu,
bhaatu mwesighibuwa aleetʼo bu̱si̱nge.
18 Muntu oghu akughayagha kuhabuluwa akuhemukagha kandi aswajibuwa,
bhaatu oghu aku̱si̱i̱magha kumuhana, baku̱mu̱hu̱ti̱yagha.
19 Muntu kutunga eki akubbala kikulekagha adheedhuwa,
bhaatu mudhoma taakubbalagha kuleka kukola bintu bi̱bhi̱i̱hi̱ye.
20 Muntu oghu akuukalagha na bantu bagheji akubaagha mugheji,
bhaatu oghu akuukalagha na badhoma, akutungagha bijibu.
21 Basi̱i̱si̱ bakutungagha bijibu hambali baakaghendi̱ye,
bhaatu bahi̱ki̱li̱i̱ye batunga bintu bilungi.
22 Bantu balungi baku̱ti̱ghi̱lagha baasukulu baabo bugwetuwa,
bhaatu etungo lya basi̱i̱si̱ likuba buguudha bwa bantu balungi.
23 Misili ya banaku eekwelaghamu byokuliya bikani̱ye,
bhaatu haabwa kutabʼo bwengani̱ja, bibaahibuwʼo.
24 Oghu oohi̱ye mwana wee taakukwatagha kabbooko kumufubila,
bhaatu oghu amu̱ku̱ndi̱ye akwekambagha kumuhana.
25 Bantu bahi̱ki̱li̱i̱ye bakuliyagha kandi baakuta,
bhaatu babhi baakala njala.