14
1 Mukali̱ mugheji akukwelagha ka yee,
bhaatu mudhoma aghi̱hwelekeeleli̱ya na ngalo siye syonini.
2 Oghu akukolagha ebi̱hi̱ki̱ye ahu̱ti̱i̱ye Mukama,
bhaatu oghu akukolagha bintu bi̱bhi̱i̱hi̱ye akumughayagha.
3 Ebi mudhoma aku̱bu̱ghagha bikulekagha bamuhuula mwi̱gho,
bhaatu ebi bagheji baku̱bu̱ghagha bikubajunagha.
4 Otaabaaye na nte esikukola,
nguli yaawe ekuukala etalimu kantu,
bhaatu oghu ali nasiyo
akuba na byokuliya bikani̱ye.
5 Kai̱so wamajima taakudimaagagha,
bhaatu wa bisubha aku̱bu̱ghagha bisubha.
6 Muntu wa mighayo akubbalagha magheji ataghatunga,
bhaatu oghu eetegheleei̱ye akweghagha bwangu.
7 Otaakala na badhoma,
nanga tabali na kya mughaso baku̱kwegheesi̱ya.
8 Muntu mugheji kandi oghu eetegheleei̱ye akumanyagha ebi akukola,
bhaatu badhoma bakuhabagha haabwa budhoma bwabo.
9 Bantu badhoma mbasi̱i̱si̱ye tabakufuwaagho,
bhaatu bahi̱ki̱li̱i̱ye bakubbalagha kughaniluwa.
10 Muntu eenini amani̱ye kusaaliluwa kuwe
kandi taaliyo muntu onji, oghu akumanyagha kudheedhuwa kuwe.
11 Ka ya muntu mubhi ekuhwelekeelela,
bhaatu ya oghu ahi̱ki̱li̱i̱ye ekukula-kulana.
12 Kihanda eki muntu akweli̱li̱kanagha ati ki̱hi̱ki̱ye,
kyangumutwala mu lu̱ku̱.
13 Nseko sikugubha ku̱bi̱sa kusaaliluwa,
bhaatu kudheedhuwa nkwahuwʼo kutuntula kukuuka.
14 Bantu babhi balitunga ebibabhonganuuwe,
bhaatu bantu balungi balitunga mpeela haabwa bikoluwa byabo.
15 Mudhoma aku̱si̱i̱magha bu̱li̱ kintu bamughambiiye,
bhaatu oghu eetegheleei̱ye eeli̱li̱kana bhyani eki̱ku̱lu̱ghamu.
16 Muntu mugheji akweghendeselejagha kukola ebikumuleetela bijibu,
bhaatu mudhoma taakufuwaaghʼo kandi akwangu̱u̱yagha kukola bintu.
17 Muntu oghu akusaaliluwagha bwangu, akukolagha bya budhoma
kandi mu̱ghobi̱ya bakumwohagha.
18 Bantu baa magheji ghakee
bakutungagha ebibabhonganuuwe haabwa budhoma bwabo,
bhaatu bagheji bakutunga mpeela ya kwetegheeleli̱ya.
19 Bantu babhi bali̱teeli̱ya mu maaso ghaa bantu balungi
kandi haa maageeti̱ ghaa bahi̱ki̱li̱i̱ye.
20 Bantu banaku nankabha baliilanuwa baabo bakubaghayagha,
bhaatu baguudha bakubaagha na baabhootu̱ bakani̱ye.
21 Nkibhi muntu kughaya muliilanuwa wee,
bhaatu ali na mu̱gi̱sa oghu akughililagha banaku kisa.
22 Nuwaategheki̱ye bintu bilungi bantu bakukwesigha kandi baku̱hu̱ti̱ye,
bhaatu nuwaategheki̱ye bi̱bhi̱i̱hi̱ye okuba noosobi̱ya.
23 Kukola kukuleetagha maghobo,
bhaatu ku̱bu̱gha kwonkaha kuha bunaku.
24 Bantu bagheji bakubaagha baguudha,
bhaatu badhoma beeyongela kuba badhoma.
25 Kai̱so wamajima akujunagha bwomi̱i̱li̱,
bhaatu oghu atali wamajima aku̱bu̱ghagha bisubha.
26 Muntu oghu ahu̱ti̱i̱ye Mukama, akuukalagha agu̱mi̱ye
kandi akumulinda hamui na baa ka yee.
27 Ku̱hu̱ti̱ya Mukama ni nsulo ya bwomi̱i̱li̱
kandi kikujunagha muntu lu̱ku̱.
28 Kukana kwa bantu aba mukama alemi̱ye niikiyo ki̱ti̱i̱ni̱sa kiye,
atabaaye na bantu bakani̱ye kikukeehagha.
29 Muntu oghu aku̱gu̱mi̱si̱li̱jagha eetegheleei̱ye kwonini,
bhaatu oghu akusaaliluwagha bwangu akwolekagha budhoma.
30 Muntu naabaaye na bu̱si̱nge mubili ghuwe ghukusemelagha,
bhaatu etima lili nga bulwaye obu̱ku̱gu̱ndi̱yagha maku̱wa.
31 Muntu oghu akubona-boni̱ya munaku akuba nambula oghu akamuhanga,
bhaatu oghu akumughilila kisa akuba naahu̱ti̱ya Luhanga.
32 Bantu babhi bakweleetelejagha kuhwelekeelela,
bhaatu bahi̱ki̱li̱i̱ye nankabha baku̱wa bali na buulukilo.
33 Bantu beetegheleei̱ye bakubaagha bagheji,
bhaatu badhoma tabali nʼeki bamani̱ye haa magheji.
34 Bu̱hi̱ki̱li̱i̱le bukulekagha ehanga liba lyamaani̱,
bhaatu kibhi kikulekagha lihemuka.
35 Mu̱heeleli̱ya mugheji akuleka mukama wee adheedhuwe,
bhaatu oghu akumuhemula akuleka asaaliluwa.