15
1 Kukuukamu oheheeye ku̱ku̱keehi̱yagha ki̱i̱ni̱gha,
bhaatu bighambo bisaakaaye bikyongela.
2 Bagheji baku̱bu̱ghagha ebilimu magheji,
bhaatu kanu̱wa kaa badhoma kalu̱ghamu bya budhoma.
3 Mukama akubonagha hoona-hoona,
akuukalagha aboone bantu babhi na balungi.
4 Bighambo bya kisa bikuhaagha bwomi̱i̱li̱,
bhaatu bisaakaaye bisaali̱ja kwonini.
5 Mudhoma akughayagha ebi ese wee akwete kumuhanuulila,
bhaatu oghu aku̱si̱i̱magha akwolekagha kwetegheeleli̱ya.
6 Bantu bahi̱ki̱li̱i̱ye bakubiikagha etungo lyabo,
bhaatu lya bantu babhi libaleetela bijibu.
7 Ebi bagheji baku̱bu̱ghagha bikuhaagha kwetegheeleli̱ya,
bhaatu byeli̱li̱kano bya badhoma tabikubaagha na mughaso.
8 Mukama oohi̱ye bihonguwa bya bantu babhi,
bhaatu nsaala sya bantu balungi sikumudheedhagha.
9 Mukama oohi̱ye ngeso sya bantu babhi,
bhaatu abbali̱ye abakwekambagha kukola ebi̱hi̱ki̱ye.
10 Nuwaakoli̱ye ebitahi̱ki̱ye okufubiluwa kwonini
kandi otaasi̱i̱mi̱ye kukuhabula oku̱ku̱wa.
11 Mukama amani̱ye ebikwete kulehukana eku̱li̱mu̱,
nahabweki amani̱ye ebi bantu bakweli̱li̱kanagha haa mitima yabo.
12 Abali na mighayo tabakubbalagha kubahana
kandi tabakubbalagha kuukala na bagheji.
13 Muntu oghu adheedheeu̱we akunula-nulagha haali̱i̱so,
bhaatu oghu asaaluuwe akwolekagha kutuntula.
14 Muntu oghu eetegheleei̱ye akubbalagha kwegha,
bhaatu kanu̱wa kaa badhoma kakubbalagha budhoma bwonkaha.
15 Muntu munaku akuukalagha naatalibana,
bhaatu oghu adheedheeu̱we aakala eeghonji̱ye.
16 Kuba munaku bhaatu ohu̱ti̱i̱ye Mukama,
kisaai̱ye kuba muguudha otali na bu̱si̱nge.
17 Nkilungi kuliya bulaala na bantu aba oku̱ndi̱ye,
kusaali̱ya kuliya nyama nʼoghu akwohi̱ye.
18 Muntu wa ki̱i̱ni̱gha akuleetagha kutongana,
bhaatu oghu aku̱gu̱mi̱si̱li̱jagha aleeta bu̱si̱nge.
19 Kihanda kya mughala kikubaaghamu mahuwa,
bhaatu kya muntu mulungi kiba nga luguudhe lu̱si̱mi̱ye.
20 Mwana mugheji akulekagha ese wee adheedhuwa,
bhaatu muntu mudhoma aghaya ni̱na wee.
21 Badhoma bakudheedhuwagha kukola bintu bya budhoma,
bhaatu bagheji bakola ebi̱hi̱ki̱ye.
22 Ntegheka esitalimu kuhanuula sikusobagha,
bhaatu bahi̱ baa magheji mbaakani̱ye sikubʼo.
23 Kukuukamu eki̱hi̱ki̱ye mu bwile busemeeye,
kikudheedhagha muntu kwonini!
24 Bantu bagheji bakukwamagha kihanda kya bwomi̱i̱li̱
kandi beetantala ekikubatwala mu lu̱ku̱.
25 Mukama aku̱hwelekeeleli̱yagha maka ghaa bantu baa myepanko,
bhaatu alinda bintu bya bakwi̱si̱ya.
26 Mukama oohi̱ye byeli̱li̱kano bi̱bhi̱i̱hi̱ye,
bhaatu bighambo bisemeeye bimudheedha.
27 Muntu wa mululu akuleetagha bijibu mu ka yee,
bhaatu oghu oohi̱ye ngu̱ji̱ akuba mwomi̱i̱li̱.
28 Muntu mulungi akweli̱li̱kanagha atakaku̱u̱ki̱yemu,
bhaatu bantu babhi bakumalagha ghabu̱gha bintu bi̱bhi̱i̱hi̱ye.
29 Mukama taaku̱tegheeleli̱yagha bantu babhi,
bhaatu aku̱u̱ghu̱wagha nsaala sya bantu balungi.
30 Muntu oghu adheedheeu̱we akunula-nulagha haali̱i̱so
kandi makulu ghasemeeye ghaleka eehi̱ghu̱wa kulungi.
31 Muntu oghu aku̱u̱ghu̱wagha oghu akumuhana ebi̱hi̱ki̱ye,
akuukala na bantu bagheji.
32 Oghu akughayagha kumuhana akweghayagha eenini,
bhaatu oghu aku̱si̱i̱magha kumusoghosa akwetegheeleli̱yagha.
33 Ku̱hu̱ti̱ya Mukama ku̱kwegheesi̱yagha muntu kuba mugheji
kandi kuba mu̱dhooti̱ kuleka bantu baku̱hu̱ti̱ya.