16
1 Muntu akuteghekagha eki akukola,
bhaatu Mukama niiye ali na kighambo kyakumaliilila.
2 Muntu akugubha kweli̱li̱kana ati ahi̱ki̱i̱ye mu byona akukola,
bhaatu Mukama niiye akulolagha bighendeleluwa biye.
3 Osabe Mukama kuha mu̱gi̱sa ntegheka syawe
kandi syona sikukoluwa kusemeeye.
4 Mukama akakola bu̱li̱ kintu ali na kighendeleluwa
kandi aatʼo kilo eki bantu babhi balifubiluwa.
5 Mukama oohi̱ye abali na myepanko,
majima balifubiluwa.
6 Kukunda kwamaani̱ kandi bwesighibuwa bikuleka kibhi kighaniluwe
kandi muntu naahu̱ti̱i̱ye Mukama, akwetantala kukola bintu bi̱bhi̱i̱hi̱ye.
7 Okaakukolagha ebi̱dheedhi̱ye Mukama,
okugubha kufoola ngi̱ghu̱ syawe baabhootu̱ syawe.
8 Nkilungi kutunga bikee mu bwengani̱ja,
kusaali̱ya kutunga bikani̱ye etali mu majima.
9 Muntu akuteghekagha eki akukola,
bhaatu Mukama niiye akumwolekagha kihanda kya kukwama.
10 Mukama akaaku̱bu̱ghagha ali na bu̱toki̱ bwa Luhanga,
aku̱tu̱waaghamu ebi̱hi̱ki̱ye.
11 Mukama akubbalagha minjaani̱ na bi̱pi̱i̱mo ebi̱hi̱ki̱ye
kandi bu̱li̱ kintu kya ku̱ghu̱li̱ya kibe mu bwengani̱ja.
12 Bakama boohi̱ye abakukolagha bintu bi̱bhi̱i̱hi̱ye,
nanga bwengani̱ja bukufoolagha bu̱lemi̱ kuba bwamaani̱.
13 Bakama bakubbalagha ku̱u̱ghu̱wa majima
kandi baku̱si̱i̱magha abaku̱bu̱ghagha ebi̱hi̱ki̱ye.
14 Mukama naakwatu̱u̱we ki̱i̱ni̱gha akugubha kwita,
bhaatu muntu mugheji akulengaghʼo ku̱ki̱keei̱ya.
15 Mukama akaakudheedhuwagha, bantu be bakubaagha boomi̱i̱li̱
kandi kisa kiye kiba nga bicu ebi̱ku̱tooni̱yagha mbu̱la.
16 Oghu ali na magheji na kwetegheeleli̱ya,
asaai̱ye oghu ali na feeja kandi siliva.
17 Bantu balungi bakwetantalagha kukola bintu bi̱bhi̱i̱hi̱ye
kandi oghu akweghendeselejagha mu ebi akukola,
akulindagha bwomi̱i̱li̱ buwe.
18 Myepanko ekuleetagha kuhwelekeelela,
kwebhi̱mbha-bhi̱mbi̱ya ku̱lu̱ghamu kughuwa.
19 Nkilungi kuba mu̱dhooti̱ kandi munaku,
kusaali̱ya kutambulana bikani̱ye na bantu baa myepanko.
20 Oghu akuta mutima haa ebi bamwegheeseeye akuba kulungi
kandi oghu akwesigha Mukama akutunga mu̱gi̱sa.
21 Bantu bagheji bakumanuwagha haabwa kwetegheeleli̱ya kwabo
kandi bighambo bisemeeye baku̱bu̱ghagha bidheedha bantu.
22 Magheji ghaa muntu eetegheleei̱ye ghakumuhaagha bwomi̱i̱li̱,
bhaatu badhoma bafubiluwa haabwa budhoma bwabo.
23 Muntu mugheji aku̱bu̱ghagha bintu bisemeeye
kandi bighambo biye bidheedha bantu.
24 Bighambo bya kisa bili nga bwoki,
obukudheedhagha muntu kandi buha mubili maani̱.
25 Kihanda eki muntu akweli̱li̱kanagha ati ki̱hi̱ki̱ye,
kyangumutwala mu lu̱ku̱.
26 Njala ekulekagha muntu akola,
nanga ekaakumukwatagha abbala byokuliya.
27 Muntu mubhi akubbalagha kuukala naakola bintu bi̱bhi̱i̱hi̱ye
kandi bighambo aku̱bu̱ghagha bili nga mulilo ghwamaani̱.
28 Muntu mubhi akuleetelejagha bantu kulwana
kandi bikoko bitambulani̱ya banabu̱u̱bhootu̱.
29 Muntu asaakaaye akwohi̱yagha muliilanuwa wee
kandi aleka amaliilila kubhi.
30 Weelinde muntu oghu akuukala naalolakaka
kandi naadhi̱ngi̱ya mi̱nu̱wa anaku̱loli̱ye,
ali na kintu ki̱bhi̱i̱hi̱ye akubbala kukola.
31 Mbu̱i̱ sili nga sipeewa ya bukama ya ki̱ti̱i̱ni̱sa,
eghi ekuheebuwagha bantu bahi̱ki̱li̱i̱ye.
32 Nkilungi ku̱gu̱mi̱si̱li̱jagha kusaali̱ya kuba wamaani̱
kandi kwelinda kusaai̱ye kulinda kibugha kyona.
33 Bantu bakukomagha buluulu kumanya ekikukoluwa,
bhaatu Mukama niiye aku̱tu̱waaghamu ekikubʼo.