17
1 Kati̱i̱ aka okuliyagha mu bu̱si̱nge kandi oteekaane,
kisaai̱ye kuba mu bu̱ghenu̱ mu numba eghi elimu kutongana.
2 Mu̱heeleli̱ya mugheji alilema mwana oghu akukolagha ebikuhemula
kandi alitunga bugwetuwa nga omui haa baana baa ka eghi.
3 Ngoku mulilo ghu̱ku̱semeli̱yagha feeja kandi siliva,
niikuwo Mukama akulengesagha mutima ghwa muntu.
4 Bantu babhi baku̱tegheeleli̱yagha bihanuulo bi̱bhi̱i̱hi̱ye
kandi bahi̱ baa bisubha bategheeleli̱ya bisubha.
5 Oghu akusekeelelagha munaku akwambulagha oghu akamuhanga
kandi oghu akudheedhuwagha banji bali mu kijibu alifubiluwa.
6 Baasukulu bakulekagha baataata baabo beepanka,
ngoku baana bakwepankagha haabwa babyaye baabo.
7 Bantu bahu̱ti̱i̱ye tababhonganuuwe kuha bisubha,
ngoku badhoma bataaku̱bu̱ghagha kintu kyona kisemeeye.
8 Bamui mu bantu bakweli̱li̱kanagha bati ngu̱ji̱ egu̱bhi̱ye byona,
bateekeleja ngu ekugubha kukola bu̱li̱ kintu.
9 Oghu akughanilagha abamu̱sobeleei̱ye akubbalagha ati bamukunde,
bhaatu oghu akuukalagha naanabiisuka akwitagha bu̱u̱bhootu̱.
10 Mugheji bakumutanukagha limui eetegheeleli̱ya,
bhaatu mudhoma nankabha bamuhuula mi̱i̱gho ki̱ku̱mi̱ taakukenga.
11 Muntu mubhi akuukalagha naabbala kujeema kwonkaha,
bhaatu bamutumila mutumuwa asaakaaye kumufubila.
12 Hakili osangaane du̱bu̱ baabhi̱yʼo byana byayo,
kusaali̱ya kusangaana mudhoma naakola bintu bya budhoma.
13 Nuwaakoli̱ye kubhi muntu oghu aku̱koli̱ye kulungi,
kabhi takali̱lu̱gha mu numba yaawe.
14 Kutandika mpaka kuli nga kuughulila maasi,
nahabweki olu̱ghaghʼo kutongana kutakatandi̱ki̱ye.
15 Oghu akuuyaghʼo musango oghu ghu̱si̱ngi̱ye, nʼoghu aku̱ghu̱si̱ngi̱i̱si̱yagha oghu ghutasi̱ngi̱ye,
bombi Mukama aboohi̱ye.
16 Sente esi mudhoma akuhaaghayo kusoma si̱ku̱kwi̱lagha busa,
nanga taakwetegheeleli̱ya.
17 Baabhootu̱ bakukundanganagha bwile bwona
kandi nganda syatu bali na kutukoonela mu bijibu.
18 Muntu oghu ateetegheleei̱ye,
akulaghi̱i̱sani̱yagha kusasula mabanja ghaa muntu onji.
19 Oghu abbali̱ye kutongana, abbali̱ye bijibu
kandi oghu aku̱bu̱gha neepanka akweleeteleja kuhwelekeelela.
20 Muntu oghu akweli̱li̱kanagha bintu bi̱bhi̱i̱hi̱ye taakukula-kulana
kandi oghu akuhaagha bisubha akwesangagha mu kabhi.
21 Ese wa mwana mudhoma akuukalagha asaaluuwe
kandi babyaye be tabakudheedhuwagha.
22 Kudheedhuwa kukuhaagha bwomi̱i̱li̱ busemeeye,
bhaatu bituntulo bimala muntu maani̱.
23 Mu̱cu̱ mubhi aku̱si̱i̱magha ngu̱ji̱ mu ki̱bi̱so
kandi taaku̱twi̱lagha musango mu bwengani̱ja.
24 Muntu oghu eetegheleei̱ye akubbalagha kukola ebilimu magheji,
bhaatu mudhoma akuukalagha naalolakaka.
25 Mwana mudhoma akulekagha ese wee asaaliluwa
kandi ni̱na wee atuntula.
26 Takili kilungi kufubila oghu atali na musango,
kedha kuhuula muntu oghu bantu bahu̱ti̱i̱ye.
27 Muntu ataaku̱bu̱ghagha bikani̱ye ni mugheji
kandi oghu eeli̱ndi̱ye eetegheleei̱ye.
28 Muntu mudhoma bakugubha kweli̱li̱kana bati ni mugheji kandi eetegheleei̱ye,
kaakuba aakala aholeei̱ye kandi ataaku̱bu̱gha kantu.