18
1 Muntu oghu akwecuwaaghʼo baanakiye akukolagha ebi abbali̱ye
kandi akubhengagha ebi banji baboone bi̱hi̱ki̱ye.
2 Mudhoma taakubbalagha kwetegheeleli̱ya,
bhaatu akumalagha ghabu̱gha ebi akwete kweli̱li̱kana.
3 Kukola bintu bi̱bhi̱i̱hi̱ye kukulekagha ohemuka
kandi ngeso si̱bhi̱i̱hi̱ye sileka oswajibuwa.
4 Bighambo bya magheji bili nga maasi ghatobheeye
kandi bikugubha kuba ndu̱ghi̱i̱li̱lo ya magheji.
5 Taki̱hi̱ki̱ye kughilila kisa oghu ali na musango
kandi kutaghilila oghu atali na musango bwengani̱ja.
6 Ebi mudhoma aku̱bu̱ghagha bikuleetagha kutongana
kandi kanu̱wa ke kaleka ahuuluwa.
7 Ebi mudhoma aku̱bu̱ghagha bi̱ku̱mu̱hwelekeeleli̱yagha
kandi bighambo biye bimufookela ki̱ki̱ya.
8 Bikoko bi̱nu̱li̱ye nga byokuliya
ebikukotelagha kimui bantu munda.
9 Muntu mughala haa mulimo,
ni mubhi kwengaana nʼoghu aku̱ghu̱bhi̱i̱yagha.
10 Mukama ali nga ngbaali egu̱mi̱ye,
hambali bahi̱ki̱li̱i̱ye bakugubha kuulukila kutunga bu̱si̱nge.
11 Muguudha ebi ali nabiyo bikumulindagha,
nga bisiika bikangami̱ye kandi bi̱gu̱mi̱ye ebyeli̱ghi̱li̱i̱ye kibugha.
12 Muntu mu̱dhooti̱ niiye baku̱hu̱ti̱yagha,
bhaatu bantu baa myepanko bali mu kihanda kya kuhwelekeelela.
13 Oghu akukuukaghamu atakadu̱bhi̱ye ategheeleli̱ya,
akubaagha mudhoma kandi ahemuka.
14 Muntu oghu ali na mutima ghu̱gu̱mi̱ye akugubha ku̱gu̱mi̱si̱li̱ja bulwaye,
bhaatu naatuntuuye taakugubha ku̱gu̱mi̱si̱li̱ja.
15 Bantu bagheji bakutungagha magheji,
matui ghaabo ghakubbalagha ku̱u̱ghu̱wa ebilimu kwetegheeleli̱ya.
16 Nuwaabbali̱ye ku̱bu̱gha na muntu bahu̱ti̱i̱ye omutwalile kisembo,
baku̱ku̱si̱mi̱lani̱ya ku̱hi̱ka hambali ali.
17 Oghu aku̱du̱bhagha ku̱bu̱gha mu kooti̱ akujookagha ahi̱ki̱i̱ye,
ku̱hi̱ki̱ya oghu akumuhakani̱ya atandi̱ki̱ye ku̱mu̱bu̱u̱li̱ya.
18 Kukoma buluulu kukugubha kumalʼo mpaka,
bukugubha kucuwamu haagati ya bantu baamaani̱ abakwete kuhakangana.
19 Nuwaakoli̱ye ebikusaali̱ja wanjoko waawe akukutanga ku̱hi̱ka ewe e ka
kandi kutongana kukutambulani̱yagha bantu,
nga maageeti̱ baaghaaye na mitahimbuwa.
20 Muntu naabu̱ghi̱ye bintu bisemeeye bantu bakudheedhuwa,
ngoku bakusemeeleluwagha mbaliya byokuliya bisemeeye.
21 Ebi oku̱bu̱gha bikugubha ku̱lu̱ghamu bwomi̱i̱li̱ kedha lu̱ku̱,
nahabweki obhonganuuwe ku̱si̱i̱ma ebi̱ku̱lu̱gha mu ebi waabu̱ghi̱ye.
22 Munakuswela mukali̱ akubaagha atu̱ngi̱ye kintu kisemeeye,
nanga ni kisembo eki Mukama aamuhaaye.
23 Munaku aku̱bu̱ghagha neesengeleli̱ya,
bhaatu muguudha akuukamu asaakaaye.
24 Haliyo bu̱u̱bhootu̱ obutaakulebbagha,
bhaatu haliyo bhootu̱ oghu asaai̱ye mwana wanjoko waawe.