19
1 Munaku oghu ali na majima,
asaai̱ye mudhoma oghu akuhaagha bisubha.
2 Takili kilungi kukola kintu otadhu̱bhi̱ye kweli̱li̱kana
kandi kwangu̱u̱ya kukikola okumaliililagha osobeei̱ye.
3 Budhoma bwa muntu bukaaku̱mu̱bhi̱i̱yagha,
atandika kusoghosa Mukama.
4 Muguudha akubaagha na baabhootu̱ bakani̱ye,
bhaatu munaku nʼoghu aabaagha bhootu̱ siye, aku̱mu̱lu̱ghaghʼo.
5 Kai̱so wa bisubha akufubiluwa
kandi oghu akuhaagha bisubha taakugubha kuuluka.
6 Bantu bakani̱ye babbali̱ye kuba baabhootu̱ baa muntu mwenge
kandi bu̱li̱ muntu abbali̱ye oghu akumuhaagha bisembo.
7 Munaku nganda siye syona sikumwohagha
kandi baabhootu̱ siye bamu̱lu̱ghʼo.
Nankabha alengʼo ku̱bu̱gha nabo, tabakukuukagha.
8 Oghu akutungagha magheji akweghonjagha
kandi oghu eetegheleei̱ye akukula-kulana.
9 Kai̱so wa bisubha akufubiluwa
kandi oghu akuhaagha bisubha akuhwelekeelela.
10 Taki̱hi̱ki̱ye mudhoma kuukala neeghonja
kandi taki̱hi̱ki̱ye kwonini mu̱syana kulema balemi̱.
11 Muntu oghu eetegheleei̱ye taakusaaliluwagha bwangu
kandi kutafuwʼo ebi bamu̱sobeleei̱ye kikulekagha bamu̱hu̱ti̱ya.
12 Ki̱i̱ni̱gha kya mukama kili nga ntale ekugboma,
bhaatu kisa kiye kili nga ki̱me haa bi̱si̱ngo.
13 Mwana mudhoma akubona-boni̱yagha ese wee
kandi mukali̱ oghu akuukalagha naatongana
akusaali̱jagha nga bi̱tondi̱ bya mbu̱la ebitaakulekeelelagha kutoona.
14 Manumba kandi etungo ni bugwetuwa obu babyaye bakuhaagha,
bhaatu kutunga mukali̱ eetegheleei̱ye ni kisembo Mukama akuhaagha.
15 Bughala bukughwesaghi̱li̱yagha kwonini
kandi muntu oghu akuukala atali nʼeki akukola njala ekumubona-boni̱ya.
16 Oghu aku̱hu̱ti̱ya bilaghilo bya Mukama akuba mwomi̱i̱li̱,
bhaatu oghu akubighaya aku̱ku̱wa.
17 Oghu akuhaagha banaku, akubaagha neeholi̱ya Mukama
kandi alimusasula haabwa eki aakoli̱ye.
18 Ohanaghe baana baawe onali na kunihila ngu bakwegha,
otaaki̱koliye, okuba noobbala oti bahwelekeelele.
19 Muntu asaakaaye akuukalagha mu bijibu,
nuwaamu̱ju̱ni̱ye mulundi ghumui, oli na kutodha kukikola.
20 Otegheeleli̱yaghe ebi bakukughambila kandi kukuhana,
kilo kimui okuba mugheji.
21 Bantu bakuteghekagha bintu bikani̱ye bya kukola,
bhaatu ebi Mukama abbali̱ye niibiyo bikukoluwagha.
22 Kisa kya muntu kikulekagha bamukunda
kandi munaku asaai̱ye muntu oghu akuhaagha bisubha.
23 Ku̱hu̱ti̱ya Mukama kukuhaagha bwomi̱i̱li̱,
oghu amu̱hu̱ti̱i̱ye akuukalagha agu̱mi̱ye kandi atoobahi̱ye kabhi koona.
24 Mughala akukwatagha byokuliya mu ngalo,
bhaatu asaaghuwa kubita mu kanu̱wa ke.
25 Nuwaafubiiye oghu ali na mighayo,
nʼabali na magheji ghakee bakweghelʼo.
Nuwaahabuuye mugheji akwetegheeleli̱ya kusaali̱yʼo.
26 Oghu akukolagha kubhi ese wee
kandi abhinga ni̱na wee,
akweleetelejagha kuhemuka kandi kuswajibuwa.
27 Mwana wanje, nuwaaleki̱ye kwegha,
okuubululuwa nʼebi waabaagha omani̱ye.
28 Kai̱so wa bisubha akughayagha bwengani̱ja
kandi bantu babhi,
bakuukalagha bali na njala ya kukola bintu bi̱bhi̱i̱hi̱ye.
29 Haliyo kifubilo bateekani̱li̱i̱je bantu baa mighayo
kandi badhoma bakuhuuluwagha mi̱i̱gho haa mighongo.