20
1 Kunuwa maaluwa ghakani̱ye ni kintu kya budhoma,
nanga kutamiila kukuleetagha kutongana kandi kulwana.
2 Ki̱i̱ni̱gha kya mukama kili nga ntale ekugboma,
nuwaaleki̱ye asaaliluwa, akugubha kukwita.
3 Kwelinda kutongana kukulekagha bahu̱ti̱ya muntu,
bhaatu badhoma bakuukalagha mbatongana.
4 Mughala oghu ataakukolagha haa bwile bwa kuhela,
haa kukesa taaliba na kantu.
5 Byeli̱li̱kano bya muntu bili nga maasi aghali hambali atobheeye,
muntu oghu eetegheleei̱ye niiye akugubha kughatahamu.
6 Bantu bakani̱ye bakughilagha bati mbeesighibuwa,
bhaatu kitimbiikaane kutunga muntu mwesighibuwa kwonini.
7 Muntu mulungi kandi oghu akukolagha ebi̱hi̱ki̱ye,
baana be balitunga mu̱gi̱sa.
8 Mukama akaakusitamagha haa ntebe ya bukama ku̱twi̱la bantu misango,
akumanyagha eki̱hi̱ki̱ye nʼekitahi̱ki̱ye.
9 Ni ani̱ akugubha kughila ati,
“Mutima ghwanje ghusemeeye kandi tandi na kibhi”?
10 Mukama oohi̱ye bantu abaku̱koleesi̱yagha minjaani̱
kandi bi̱pi̱i̱mo ebitahi̱ki̱ye.
11 Nankabha mwana ebi akukolagha bikwolekagha ngoku ali,
akaakuba ali mwesighibuwa kandi mulungi.
12 Mukama akatutʼo maaso kubona
kandi matui ku̱u̱ghu̱wa.
13 Nuwaabbali̱ye kughwesaghila okuba munaku,
bhaatu nuwaamu̱ki̱ye okola, okutunga byokuliya bikani̱ye.
14 Mu̱ghu̱li̱ akughilagha ati, “Kini takisemeeye, takisemeeye bbaa.”
Naamala kukighula aghenda nʼepanka ngoku aaki̱ghu̱li̱ye sente sikee.
15 Bighambo bya magheji ni bya mughaso kusaali̱ya feeja
kandi mabaale ghakani̱ye ghaa muhendo.
16 Muntu neemeeye ebanja lyʼoghu atamani̱ye,
obhonganuuwe omuuyʼo bintu biye nga musimbo,
ku̱gu̱mi̱ya ngoku akusasula.
17 Byokuliya muntu atu̱ngi̱ye etali mu majima bikunulagha,
bhaatu haakumaliilila bifooka nga musene mu kanu̱wa ke.
18 Otakakoli̱ye kintu kyona kedha kutandi̱ki̱i̱si̱ya bulemo,
olole ngu baakuhanuliiye kusemeeye.
19 Muntu wa bikoko taakubiikagha nsi̱ta.
Otaakala na bantu abaku̱bu̱ghagha bikani̱ye.
20 Kaakuba okiina so waawe kedha njoko waawe,
bwomi̱i̱li̱ bwawe bukuhuwo nga taala eli̱mi̱ye mu mweli̱ma.
21 Oghu akubbalagha bugwetuwa bwa bwangu,
haakumaliilila taakutungaghamu mu̱gi̱sa.
22 Otaghila oti, “Muntu nankoli̱ye kubhi, nanje nkumukola kubhi.”
Weesighe Mukama, akukukoonela.
23 Mukama oohi̱ye minjaani̱ esitahi̱ki̱ye
kandi tasikumudheedhagha.
24 Mukama niiye aku̱tu̱waaghamu ebikutubʼo.
Taaliyo muntu nʼomui oghu amani̱ye ngoku akumaliilila.
25 Weeli̱li̱kane bhyani otakalaghi̱i̱sani̱i̱ye kuhaayo kihonguwa ewaa Luhanga.
Otaakoli̱ye kuwo, okusobola kwehi̱su̱ki̱ya haanu̱ma.
26 Mukama oghu ali na magheji akumanyagha abasobeei̱ye
kandi abafubila atali na kisa.
27 Mwoyo ghwa muntu ni taala ya Mukama,
eghi ekubhaki̱yagha byona ebimuli munda.
28 Kukunda kwamaani̱ kandi bwesighibuwa bikulindagha mukama
kandi kukunda kukulekagha ntebe yee ya bukama elinduwa kusemeeye.
29 Tukwekumbulagha baajongo nanga ebo kuba na maani̱
kandi tu̱hu̱ti̱ya bantu bakulu abali na mbu̱i̱.
30 Kaakuba ofubila muntu oghu asobeei̱ye,
kikuleka aleke ngeso sibhi kandi abe muntu mulungi.