21
1 Mukama akuloleelelagha byeli̱li̱kano bya bakama,
ngoku akulekagha maasi ghasenda hambali abbali̱ye.
2 Muntu akugubha kweli̱li̱kana ati ebi akwete kukola bi̱hi̱ki̱ye,
bhaatu Mukama amani̱ye ekili haa mutima ghuwe.
3 Kukola ebi̱hi̱ki̱ye kandi bwengani̱ja,
bikudheedhagha Mukama kusaali̱ya bihonguwa.
4 Bantu babhi bakubaagha na kwebhi̱mba-bhi̱mbi̱ya kandi myepanko,
ebi byona ni kibhi.
5 Kutegheka kusemeeye na kukola bhyani kukuleetagha nkula-kulana,
bhaatu kukola bintu bwangu-bwangu kukukufoola munaku.
6 Etungo eli̱lu̱ghi̱ye mu kuha bisubha,
likuhuwaaghʼo nga mpeu kandi ni ki̱ki̱ya kya lu̱ku̱.
7 Butabanguko bwa bantu babhi bukubahwelekeeleli̱ya,
nanga bakubhengagha kukola ebi̱hi̱ki̱ye.
8 Oghu musango ghu̱si̱ngi̱ye akukwamagha kihanda ki̱bhi̱i̱hi̱ye,
bhaatu mulungi akola ebi̱hi̱ki̱ye.
9 Nkilungi kulaala mu sitoowa,
kusaali̱ya kuukala mu numba na mukali̱ oghu akutonganagha.
10 Bantu babhi bakubbalagha kuukala mbakola bintu bi̱bhi̱i̱hi̱ye,
taaliyo muntu nʼomui oghu bakughililagha kisa.
11 Nuwaafubiiye wa mighayo, nʼabali na magheji ghakee bakweghelʼo.
Nuwaahabuuye mugheji, akwetegheeleli̱ya kusaali̱yʼo.
12 Luhanga oghu Ahi̱ki̱li̱i̱ye amani̱ye ebikukoluwagha mu maka ghaa bantu babhi
kandi alibahwelekeeleli̱ya.
13 Muntu oghu akwehighali̱i̱si̱ya matui banaku bamubilikiiye kubakoonela,
naye dhee obu alibilikila bantu kumukoonela tabali̱mu̱u̱ghu̱wa.
14 Muntu naabaaye asaaluuwe naawe,
kisembo omuhaaye mu ki̱bi̱so kikugubha ku̱mu̱keehi̱yʼo ki̱i̱ni̱gha.
15 Bintu bikaakukoluwagha mu bwengani̱ja, bantu balungi badheedhuwa,
bhaatu bileeteleja bantu babhi kwobahila kimui.
16 Muntu oghu aku̱lu̱ghagha mu kihanda kya kwetegheeleli̱ya,
akwesangagha ali mu baku̱u̱ye.
17 Oghu aku̱ndi̱ye kweghonja akuba munaku
kandi oghu abbali̱ye maaluwa na kuliya kusemeeye taakuba muguudha.
18 Bantu babhi bakweleetelejagha kubona-bona,
oku bakulengaghʼo kuleetela bantu balungi.
19 Nkilungi kuukala mu elungu,
kusaali̱ya kuukala na mukali̱ oghu akutonganagha kandi wa ki̱i̱ni̱gha.
20 Bantu bagheji bakubaagha na etungo kandi beeghonja,
bhaatu badhoma babhi̱i̱ya bwangu sente syabo.
21 Nuwaabaaye na kisa kandi majima,
okuba na bwomi̱i̱li̱, bantu banji baku̱hu̱ti̱ye
kandi bakutwalikani̱ye kusemeeye.
22 Muntu mugheji aku̱si̱ngu̱la kibugha kya bantu baamaani̱
kandi agenge bigho byakiyo ebi beesi̱ghi̱ye.
23 Nuwaabbali̱ye kuteeletela bijibu,
weelinde ebi oku̱bu̱gha.
24 Bantu baa mighayo bakwepankagha kandi beebhi̱mba-bhi̱mbi̱ya,
bakola bintu na myepanko.
25 Mughala kweghomba kukani̱ye kukulekagha aku̱wa,
nanga akubhengagha kukola.
26 Mughala akumalagha kilo kyona neekumbula ebi akwete kubbala,
bhaatu oghu ahi̱ki̱li̱i̱ye akuhaagha kandi taakwi̱magha.
27 Mukama oohi̱ye bihonguwa bya bantu babhi,
kukila munu obu bakubileetagha bali na bighendeleluwa bi̱bhi̱i̱hi̱ye.
28 Kai̱so wa bisubha akufubiluwa,
bhaatu wamajima baku̱si̱i̱magha ebi akwete ku̱bu̱gha.
29 Bantu babhi bakwefoolagha kumanya bu̱li̱ kintu,
bhaatu bahi̱ki̱li̱i̱ye bakweli̱li̱kanaghʼo bhyani ebi bakukola.
30 Taaliyo magheji, kwetegheeleli̱ya kandi kuhabuluwa,
ebikugubha kutanga Mukama kukola eki abbali̱ye.
31 Muntu akugubha kuteekani̱ja nkai̱na sya kulwanilʼo bulemo,
bhaatu Mukama niiye akuhaagha bu̱si̱ngu̱li̱.