22
1 Weekumbulaghe kuba na li̱i̱na lisemeeye kusaali̱ya kuba muguudha
kandi bantu ku̱ku̱hu̱ti̱ya kisaai̱ye kuba na siliva kedha feeja.
2 Baguudha na banaku bengaane mu kini:
Mukama niiye akabahanga boona.
3 Muntu eetegheleei̱ye akubonagha kabhi akeelinda,
bhaatu abali na magheji ghakee
bakukaghendaghamu kandi babona-bona.
4 Kwebundaali̱ya kwamajima kandi ku̱hu̱ti̱ya Mukama
bikuhaagha buguudha, ku̱hu̱ta kandi bwomi̱i̱li̱ bukani̱ye.
5 Kihanda kya bantu babhi kilimu mahuwa kandi bi̱ki̱ya,
muntu oghu eeli̱ndi̱ye akubyelindagha.
6 Weegheesi̱ye mwana waawe kukola ebi̱hi̱ki̱ye,
nankabha akula taakubileka.
7 Baguudha bakulemagha banaku
kandi oghu eeholi̱ye
akubaagha nga mu̱syana wʼoghu aamweholeei̱ye.
8 Muntu oghu akuleetagha bijibu akutunga kijibu kyamaani̱
kandi taakutodha kukola kubhi bantu banji.
9 Muntu mwenge akutungagha mu̱gi̱sa,
nanga akuhaagha byokuliya banaku.
10 Nuwaabhi̱ngi̱ye muntu wa mighayo,
taakutodha kubʼo mpaka
kandi kutongana na kwambulana bikuba bihooyʼo.
11 Oghu abbali̱ye kuba na mutima ghusemeeye
kandi ku̱bu̱gha bya kisa,
akuba bhootu̱ sya mukama.
12 Maaso ghaa Mukama ghakuukalagha ghaloli̱ye abeetegheleei̱ye,
bhaatu ahwelekeeleli̱ya ntegheka sya abakuhaagha bisubha.
13 Mughala akughilagha ati, “Ntale eli hanja,
ninaaghendi̱ye kukola ekunjitila mu kihanda.”
14 Kanu̱wa kaa mukali̱ mu̱syani̱ nki̱i̱na kitobheeye,
musaasa oghu Mukama asaaluuwe naye,
niiye akukyegengamu.
15 Nkya buhanguwa mwana kukola bintu bya budhoma,
bhaatu kumufubila na kabbooko kukuleka abileke.
16 Muntu oghu akubona-boni̱yagha banaku niikuwo atunge,
kedha kuha baguudha bisembo, akuba munaku.
Bighambo bya bantu bagheji
17 Otegheeleli̱ye, nku̱kwegheesi̱ya ebi bantu bagheji baabu̱ghi̱ye.
Weeghe bhyani ebi nkwete ku̱kwegheesi̱ya.
18 Okudheedhuwa nuwaakaaye noonabiisuka
kandi noonabi̱bu̱gha na kanu̱wa kaawe.
19 Nkubbala kukughambila biyo obwalo,
niikuwo weeghe kwesigha Mukama.
20 Nakuhandiikiiye bintu maku̱mi̱ asatu,
bikukuhabula kandi bikuhe kwetegheeleli̱ya.
21 Bi̱ku̱kwegheesi̱ya majima ghoonini
kandi kughambila ebi̱hi̱ki̱ye abaaku̱tu̱mi̱ye.
Kyʼoku̱du̱bha
22 Otaayʼo na ki̱ku̱bha munaku bintu biye,
nanga eye kuba munaku,
kedha ku̱mi̱ghi̱li̱ja oghu atali na bu̱kooneli̱ mu kooti̱.
23 Mukama akutonganiilila bantu aba
kandi ahwelekeeleli̱ye abakubaayʼo bintu byabo.
Kyakabili
24 Otaba bhootu̱ sya bantu abakusaaliluwagha bwangu,
otaakala na bantu basakaaye.
25 Okugubha kwegha ngeso syabo
kandi osaaghuwe kusileka.
Kyakasatu
26 Muntu naabaaye neeholi̱ya ebanja,
oteelaghi̱i̱sani̱ya kulisasula eye naasaaghu̱u̱we.
27 Nuwaabu̱lu̱u̱we kintu kya kusasula,
bakutwala nankabha bulili bwawe.
Kyakanaa
28 Otali̱ku̱lu̱ki̱ya mutaano
oghu baataata baanu baataayʼo hambele.
Kyakataano
29 Oghu akukolagha mulimo ghuwe kusemeeye,
akuleka kukolela bantu baa bu̱li̱ kilo,
atandike kukolela bakama.