23
Kyamukaagha
1 Nuwaasitami̱ye kuliya hamui na mu̱lemi̱,
olole bhyani byokuliya ebili mu maaso ghaawe.
2 Nuwaabaaye nookuliyagha byokuliya bikani̱ye,
weelinde kandi otaba na pau̱.
3 Otaba na mululu ghwa byokuliya bisemeeye akuhaaye,
anguba naabbala kukulengesa.
Kyamusanju̱
4 Obe mugheji kutakola kusaalukaane,
kulengʼo kuba muguudha.
5 Buguudha bukugubha kukuhuwʼo bwangu,
ngʼoghu oti bwatooye mapapa,
bwahalala mu mwanya nga kibebe.
Kyamunaanaa
6 Otaliya byokuliya bya muntu mukuku
kandi oteekumbula byokuliya biye bisemeeye.
7 Akugubha kuba neeli̱li̱kana sente byaghu̱li̱ye,
bhaatu akughile ati, “Oliye kandi onu̱we,”
kuni haa mutima ghuwe taabbali̱ye.
8 Okutanaka bikee ebi waaliiye
kandi bighambo bisemeeye waabu̱ghi̱ye bi̱kwi̱le busa.
Kyamwenda
9 Otabu̱gha kintu kyona na mudhoma,
nanga akughaya bighambo bya magheji okwete kumughambila.
Kyʼeku̱mi̱
10 Otali̱ku̱lu̱ki̱ya eki baataaye mu mutaano hambele,
kedha kutwala kibanja kya nku̱u̱bbi̱.
11 Mu̱cu̱ngu̱li̱ wabo ni wamaani̱,
akutongana naawe musango okwete kubanyegheelela.
Kyʼeku̱mi̱ na kimui
12 Otaaghe mutima ghwawe haa kuhabuluwa
kandi matui ghaawe haa bighambo bya magheji.
Kyʼeku̱mi̱ na bibili
13 Otasaaghuwagha kufubila mwana waawe,
nuwaamufubiiye na kabbooko, taaku̱ku̱wa.
14 Nuwaamufubiiye na kabbooko,
kikugubha kumujuna lu̱ku̱.
Kyʼeku̱mi̱ na bisatu
15 Mwana wanje, nuwaabaaye mugheji,
nanje nkudheedhuwa.
16 Nkudheedhuwa kwonini,
ninaaghu̱u̱ye noobu̱gha bighambo bya magheji.
Kyʼeku̱mi̱ na bbinaa
17 Otaleka mutima ghwawe ngukwatiluwa etima basi̱i̱si̱,
bhaatu ohu̱ti̱yaghe Mukama bwile bwona.
18 Majima kuwo mu bilo byʼomu maaso okuba kusemeeye
kandi kunihila kwawe taku̱ku̱kwi̱la busa.
Kyʼeku̱mi̱ na bitaano
19 Mwana wanje, otegheeleli̱ye kandi obe mugheji,
ookali̱ye mutima ghwawe haa kihanda eki̱hi̱ki̱ye.
20 Otaakala na batami̱i̱li̱,
kedha bantu baa mululu ghwa byokuliya.
21 Batami̱i̱li̱ na bantu baa mululu bakufookagha banaku.
Batighali̱ya kughwesaghila kandi kibaleeteleja ku̱lu̱wala bicence.
Kyʼeku̱mi̱ na mukaagha
22 Ooghu̱waghe so waawe oghu akaku̱byala
kandi otaghaya njoko waawe oghu akaakuuye.
23 Otunge majima,
magheji, kuhabuluwa na kwetegheeleli̱ya
kandi bintu ebi otabi̱lu̱ghʼo.
24 Mwana ahi̱ki̱li̱i̱ye akulekagha ese wee adheedhuwa
kandi nʼoghu aku̱byalagha mwana mugheji akumwepanki̱i̱si̱yagha.
25 Oleke so waawe na njoko waawe beepanke haabwawe
kandi oleke njoko waawe adheedhuwe.
Kyʼeku̱mi̱ na musanju̱
26 Mwana wanje, ompe mutima ghwawe
kandi oleke maaso ghaawe ghaakale ghaloli̱ye ebi nkukolagha.
27 Mukali̱ malaaya na mukali̱ mu̱syani̱,
bali nga ki̱i̱na kitobheeye ekikwitagha.
28 Bakwebisagha kandi balinda nga mu̱ji̱ndi̱ kudimaaga basaasa bakani̱ye
kuleka kuba beesighibuwa haa bakali̱ baabo.
Kyʼeku̱mi̱ na munaanaa
29 Ni muntu ki oghu akuukalagha mu bujune, busaali̱ji̱, mpaka,
kutongana, mputa kandi maaso ghatukuuye?
30 Ni oghu akuukalagha mu maaluwa bwile bwona
kandi naanuwa ghaa bu̱li̱ mulingo.
31 Oleke kulola maaluwa ghasemeeye ngoku ghakubimba mu gilaasi
kandi aghakunulagha kughanuwa.
32 Haakumaliilila ghakukufoolagha
nga muntu njoka elu̱mi̱ye.
33 Otandika kubona bintu bya kitiyo-kitiyo
kandi ku̱bu̱gha bintu bitahi̱ki̱ye.
34 Weehi̱ghu̱wa nga muntu alangaaye haa ntunga ya nanja
kandi haagu̱u̱li̱ ya mu̱longooti̱.
35 Otandika kughila oti, “Bampuuye bhaatu tanahutaaye.
Bampuuye, bhaatu taneehi̱ghu̱u̱ye kantu.
Nkuumuka dhi̱?
Nkulaghiluwa kughenda kubbala ghanji ghaa kunuwa.”