25
Nsi̱mo sinji sya Solomooni̱
1 Sini ni nsi̱mo sya Solomooni̱, esi bantu baa Hejekiya mukama wa Bu̱yu̱daaya baakopi̱ye.
2 Ki̱ti̱i̱ni̱sa kya Luhanga ni kukola bintu mu ki̱bi̱so,
bhaatu ki̱ti̱i̱ni̱sa kya bakama ni kusoboolola bintu kusemeeye.
3 Ngoku eghulu likangami̱ye kandi nsi yaatobheela,
niikuwo tutaakugubha kukenga ebili bakama haa mitima.
4 Bantu mbaahi̱ye bu̱lofu̱ mu siliva,
mu̱wi̱i̱si̱ akugubha kukolamu bintu bisemeeye.
5 Mbaahi̱yʼo mukama bahi̱ baa magheji babhi,
bu̱lemi̱ buwe bukumanuwa haabwa kuba na bwengani̱ja.
6 Oteefoola wamaani̱ mu maaso ghaa mukama,
kedha kwemilila mu ki̱i̱kalo kya bantu bakulu.
7 Nkilungi kukughila bati, “Wiise ositame hani,”
kusaali̱ya kukuuyʼo niikuwo muntu onji bahu̱ti̱i̱ye aase asitamʼo.
8 Nuwaaboone kintu otaghenda du̱mbi̱ kunyegheelela,
nanga kai̱so onji angu̱ku̱si̱ngi̱i̱si̱ya musango, obuluwe kya kukola.
9 Omalaghe nsonga na muliilanuwa waawe
kandi mutaghambila bantu banji nsi̱ta syanu.
10 Muntu naasi̱i̱ghu̱u̱ye,
akumanya ngoku otaaku̱bi̱sagha nsi̱ta
kandi okuukala ohemu̱ki̱ye.
11 Kighambo babu̱ghi̱ye haa bwile bwakiyo bwonini,
kili nga bi̱ghu̱ma bya feeja ebili haa sahaani̱ ya siliva.
12 Ku̱tegheeleli̱ya muntu wa magheji oghu akwete kukuhabula,
kili na mughaso kusaali̱ya mpete kedha kakwanji ebi̱koleeu̱we mu feeja.
13 Mutumuwa wamajima aku̱hu̱mu̱li̱yagha oghu amu̱tu̱mi̱ye,
ngoku maasi ghaholi̱ye ghaku̱hu̱u̱mu̱li̱yagha mu bwile bwa kyanda.
14 Bantu abataakuhaaghayʼo ebi beelaghi̱i̱sani̱i̱ye,
bali nga bicu kandi mpwegha ebitaaku̱tooni̱yagha mbu̱la.
15 Ku̱gu̱mi̱si̱li̱ja kukugubha kusoona-soona mu̱lemi̱
kandi ku̱bu̱gha oheheeye kukugubha ku̱dhooti̱ya muntu.
16 Nuwaaboone njoki oliye esikukumala,
nuwaaliiye sikani̱ye okutanaka.
17 Otabungilagha muliilanuwa waawe bwile bwona,
akukuluwakaka kandi akwohe.
18 Kuhangilila muliilanuwa waawe,
kili nga ku̱mu̱lu̱mba okwete mwi̱gho, kihiyo kandi bimala byoghiiye.
19 Kwesigha oghu atali na majima mu bwile bwa bijibu,
kili nga kuliya olwaye li̱i̱no,
kedha kulubhatanga ohendeki̱ye kighele.
20 Kulimbila muntu oghu asaaluuwe,
kili nga kumuuyamu kooti̱ mu bwile bwa mpeu,
kedha kumuta kisula haa kibbodhe.
21 Ngi̱ghu̱ yaawe naabaaye njala emukwete, omuhe byokuliya,
naabaaye eliyo limukwete, omuhe maasi ghaa kunuwa.
22 Nuwaakoli̱ye otiyo, akwehi̱ghu̱wa ahemu̱ki̱ye
kandi Mukama akukuha mpeela.
23 Ngoku mpwegha ekuleetagha mbu̱la,
niikuwo kukoka muntu kukulekagha asaaliluwa.
24 Nkilungi kulaala mu sitoowa,
kusaali̱ya kuukala mu numba na mukali̱ oghu akutonganagha.
25 Ku̱u̱ghu̱wa makulu ghasemeeye aghalu̱ghi̱ye hambali haseli̱ye,
kili nga kunuwa maasi ghaholi̱ye eliyo likukwete.
26 Muntu mulungi oghu akukolagha ebi bantu babhi baamughambiiye,
ali nga kyahu̱dhu̱ ki̱bhi̱i̱hi̱ye kandi nsulo etasemeeye.
27 Ngoku kitasemeeye kuliya njoki sikani̱ye,
niikuwo kitasemeeye dhee kubbala bantu kukusinda.
28 Muntu oghu ataakugubha kwelinda asaaluuwe,
ali nga kibugha kitali na bintu byakukilinda.