26
1 Ku̱hu̱ti̱ya mudhoma taki̱hi̱ki̱ye,
ngoku kitahi̱ki̱ye mbu̱la kutoona mu kyanda kedha bwile bwa kukesa.
2 Muntu kukukiina otali nʼeki osobeei̱ye taaliyo ekikukubʼo,
bikukusaala nga noni̱ esikuukalagha nsihalala mu mwanya.
3 Nkai̱na bakughihuulagha mwi̱gho,
ndogooi̱ baghiboha mughuwo
kandi mudhoma bamukutula kibbooko haa mughongo.
4 Oteefoola mudhoma,
haabwa kukuukamu ki̱bu̱u̱li̱yo kya mudhoma.
5 Okuukemu mudhoma kusighikila haa budhoma buwe,
niikuwo amanye ngoku atali mugheji.
6 Kutuma mudhoma kutwala butumuwa,
kili nga kwejomba kighele kandi kweleetela bijibu.
7 Ngoku muntu alamaaye maghulu ataakugubha kulubhatanga,
niikuwo mudhoma ataakugubha ku̱bu̱gha kintu kisemeeye.
8 Ku̱hu̱ti̱ya mudhoma,
kili nga kubohela ebaale haa mu̱jeledhi̱.
9 Ngoku mutami̱i̱li̱ ataakugubha kwehiya ehuwa mu ngalo,
niikuwo mudhoma ataakugubha ku̱bu̱gha kintu kisemeeye.
10 Oghu akuhaagha mulimo mudhoma kedha bantu abakwete kusaala,
ali ngʼoghu akwete kubhasula bimala kitiyo-kitiyo.
11 Mudhoma oghu akuukalagha naakola bya budhoma,
ali nga mbuwa eghi ekuliyaagha bitanaki̱ byayo.
12 Mudhoma asaai̱ye muntu
oghu akweli̱li̱kanagha ati amani̱ye bu̱li̱ kintu.
13 Muntu mughala akughilagha ati, “Ntale eli hanja,
ntale eli mu kihanda.”
14 Mughala akuukalagha neegaali̱ya haa bulili,
ngoku lwighi lukwegaali̱yagha haa pata syaluwo.
15 Mughala akukwatagha byokuliya mu ngalo,
bhaatu asaaghuwa kubita mu kanu̱wa ke.
16 Mughala akweli̱li̱kanagha ati ni mugheji,
kusaali̱ya bantu musanju̱ abakukuukaghamu kusemeeye.
17 Kwetaahi̱ya mu mpaka esitakukwetʼo,
kili nga kukwata matui ghaa mbuwa eghi ekwete kusaala.
18-19 Muntu oghu akudimaagagha baanakiye aghila ati, “Naagyanagha kwonkaha,”
ali nga mu̱ghwesi̱le akubhasuulilagha bantu bimala kubaata.
20 Mulilo ghutalimu nkui ghu̱ku̱li̱mi̱gha
kandi hambali kukoka kutali, taakubaaghʼo kutongana.
21 Ngoku makala kandi nkui bikwaki̱yagha mulilo,
niikuwo muntu oghu akuukalagha nantongana akuleetagha bijibu.
22 Bikoko bi̱nu̱li̱ye nga byokuliya
ebikukotelagha kimui bantu munda.
23 Ku̱bu̱gha bisemeeye kuni okwete kweli̱li̱kana bintu bi̱bhi̱i̱hi̱ye,
kili nga kusiigha langi̱ esemeeye munagha ghwa ebumba.
24 Muntu oghu oohi̱ye baanakiye, aku̱bu̱ghagha bisubha
kandi abisa bu̱ghobi̱ya haa mutima ghuwe.
25 Muntu oghu nankabha abu̱gha bighambo bya kisa, otabi̱si̱i̱ma,
nanga haa mutima ghuwe aasuuye byeli̱li̱kano bi̱bhi̱i̱hi̱ye.
26 Nankabha alengʼo ku̱bi̱sa ngoku oohi̱ye bantu,
bintu bi̱bhi̱i̱hi̱ye akukolagha bikuleka bantu bamanye.
27 Muntu naali̱mi̱ye buhiya, niiye akubwegengamu
kandi oghu aku̱hi̱li̱ngi̱ti̱ya ebaale, likukuuka limukpeetaagule.
28 Oghu akuhaagha bisubha akwohagha aba akwete ku̱bu̱ghʼo
kandi kudimaaga banji kuleeta kuhwelekeelela.