27
1 Oteepanka haabwa munkiya,
nanga toomani̱ye ebikuba mu kilo eki.
2 Oleke bantu banji bakusinde,
nankabha aba otamani̱ye, bhaatu uwe oteesinda.
3 Mudhoma akuleetagha bijibu byamaani̱,
ebisaai̱ye kibaale ki̱lyoti̱ye kandi ntuumo ya musene.
4 Muntu oghu asaaluuwe ni waakabhi munu,
bhaatu oghu ali nʼetima asaai̱yʼo.
5 Nkilungi kusoghosa muntu bbeni̱-bbeni̱,
kusaali̱ya ku̱bi̱sa ngoku omu̱ku̱ndi̱ye.
6 Bhootu̱ syawe naanaku̱soghosi̱ye, omwesighe,
bhaatu weelinde ngi̱ghu̱ yaawe kukughuwa mu ki̱ku̱bha.
7 Muntu oghu aaku̱ti̱ye akubhengagha njoki,
bhaatu oghu njala ekwete ekisaaliiye kyona kikunulagha.
8 Muntu oghu aku̱ti̱ghagha ka yee kughenda kuyaaya,
ali nga noni̱ eghi eku̱ti̱ghagha kisui kyayo.
9 Magita na bigita bisasi̱ye bikulekagha muntu adheedhuwa,
bhaatu bihanuulo bilungi bya bhootu̱ syawe bisaai̱yʼo kusemela.
10 Otaabululuwa baabhootu̱ syawe kedha baabhootu̱ sya so waawe.
Nuwaatu̱ngi̱ye kijibu otaghenda ewaa lughanda lwawe.
Muliilanuwa waawe oghu ali haai,
akugubha kukukoonela kusaali̱ya lughanda lwawe oghu haseli̱ye.
11 Mwana wanje nuwaabaaye mugheji nkudheedhuwa,
nkuba na kyakukuukamu weena oghu akunsoghosa.
12 Muntu eetegheleei̱ye akubonagha kabhi akeelinda,
bhaatu abali na magheji ghakee,
bakukaghendaghamu kandi babona-bona.
13 Muntu neemeeye ebanja lyʼoghu atamani̱ye,
obhonganuuwe omuuyʼo bintu biye nga musimbo,
ku̱gu̱mi̱ya ngoku akusasula
14 Kulamu̱ki̱ya muliilanuwa waawe nkyambisi cu̱i̱ nʼelaka lyamaani̱,
kuli nga kumukiina.
15 Mukali̱ oghu akuukalagha naatongana,
ali nga bi̱tondi̱ bya mbu̱la ebitakulekeelalagha haa kilo kya mbu̱la.
16 Kumutanga kutongana, kili nga kulengʼo kutanga mpwegha,
kedha kukwata magita mu ngalo.
17 Ngoku kyoma ki̱kwoghi̱i̱li̱yagha kyoma,
niikuwo muntu akwegheesi̱yagha muunakiye.
18 Oghu akuloleelela kiti mu̱ti̱i̱ni̱ akuliya haa bi̱ghu̱ma byakiyo
kandi mu̱heeleli̱ya oghu akuloleelela mukama wee baku̱mu̱hu̱ti̱ya.
19 Ngoku muntu akwebonagha haali̱i̱so aloli̱ye mu maasi,
niikuwo mutima ghuwe ghukwolekagha ngoku ali.
20 Ngoku eku̱li̱mu̱ etaakuusulagha baku̱u̱ye,
niikuwo na maaso ghaa bantu ghataakuukutagha kubona.
21 Ngoku mulilo ghu̱ku̱semeli̱yagha feeja kandi siliva,
niikuwo nʼebi baku̱bu̱ghʼo muntu bikwolekagha ngoku ali.
22 Mudhoma nankabha omusekuulila mu musekulo na ki̱i̱mu̱koobhu̱,
nga mucele basekuuye,
budhoma tabukugubha ku̱mu̱lu̱ghamu.
23 Omanyaghe mbeela ya bisolo byawe
kandi obiloolelele kulungi,
24 nanga buguudha tabukutuulaghʼo
kandi mu̱lemi̱ taakulemagha bilo nʼebilo.
25 Okaakujombagha bi̱si̱ngo bya bisolo byawe kuliya,
nankabha ebya mwena, binji bikutuuwaghamu.
26 Okugubha kuuya ngoye mu byoha bya ntaama syawe
kandi oghu̱li̱ye simui haa mbu̱li̱ syawe, oghulemu bibanja.
27 Mbu̱li̱ esi̱ku̱ti̱ghalʼo otungemu mata ghaawe kandi ka yaawe,
na baheeleli̱ya baawe baabukali̱.