28
1 Muntu mubhi aku̱li̱gi̱tagha ataliyo oghu akwete kumuhuma,
bhaatu oghu ahi̱ki̱li̱i̱ye akubaagha mukali nga ntale.
2 Ehanga likaaku̱si̱i̱sagha, likulemuwagha balemi̱ bakani̱ye,
bhaatu muntu mugheji kandi oghu eetegheleei̱ye naalilema liteekaana.
3 Mu̱lemi̱ oghu akubona-boni̱yagha banaku,
ali nga mbu̱la yamaani̱ eghi eku̱bhi̱i̱yagha bilimuwa.
4 Abakubhengagha bilaghilo bakuhagilagha bantu babhi,
bhaatu ababi̱hu̱ti̱i̱ye, babahakani̱ya.
5 Bantu babhi tabamani̱ye bwengani̱ja,
bhaatu abahu̱ti̱i̱ye Mukama baku̱bwetegheeleli̱yagha kwonini.
6 Munaku oghu akukolagha bintu bilungi,
asaai̱ye muguudha wa ngeso sibhi.
7 Mwana oghu ahu̱ti̱i̱ye bilaghilo akubaagha eetegheleei̱ye,
bhaatu bhootu̱ sya bantu abali na mululu akuhemulagha ese wee.
8 Oghu akubbalagha kutunga sente sikani̱ye haabwa kwongela maghobo,
akukumaani̱li̱yagha oghu akughililagha banaku kisa.
9 Oghu atahu̱ti̱i̱ye bilaghilo,
Luhanga oohi̱ye ku̱u̱ghu̱wa nsaala yee.
10 Oghu akuhabi̱i̱si̱ya bantu balungi kukola bintu bi̱bhi̱i̱hi̱ye,
alyegenga mu ki̱i̱na ali̱mi̱ye eenini,
bhaatu abatali na musango balitunga mpeela.
11 Muguudha akweli̱li̱kanagha ati ni mugheji,
bhaatu munaku oghu eetegheleei̱ye akumumanyagha.
12 Bantu balungi bakaakulemagha, bu̱li̱ muntu adheedhuwa,
bhaatu bantu babhi mbaalema, bantu beebi̱sa.
13 Oghu aku̱bi̱sa bibhi biye taakukula-kulana,
bhaatu oghu akubyatula kandi abileka, Luhanga akumughilila kisa.
14 Ali na mu̱gi̱sa oghu aku̱hu̱ti̱yagha Mukama,
bhaatu oghu akwomakakani̱ya mutima ghuwe akutunga bijibu.
15 Mu̱lemi̱ mubhi ni wa kabhi munu haa banaku,
ali nga ntale ekugboma kandi du̱bu̱ ekwete ku̱lu̱mba bantu.
16 Mu̱lemi̱ oghu ateetegheleei̱ye akubana-boni̱ya bantu be,
bhaatu oghu oohi̱ye ngu̱ji̱ akuba mwomi̱i̱li̱ bwile bukani̱ye.
17 Muntu naatu̱u̱ye musango ghwa kwita muntu,
akuba eelimiiye kituulo bwangu.
Atabʼo muntu oghu akulengʼo kumukoonela.
18 Oghu akukolagha ebi̱hi̱ki̱ye akuba kulungi,
bhaatu abatali beesighibuwa bakuhwelekeelela bwangu.
19 Oghu akukola na maani̱ mu kibanja kiye,
akuba na byokuliya bikani̱ye,
bhaatu oghu aku̱bhi̱i̱ya bwile haa bintu bitali na mughaso,
akuba munaku.
20 Muntu mwesighibuwa akutunga mi̱gi̱sa,
bhaatu oghu akubbala buguudha bwa bwangu-bwangu akufubiluwa.
21 Kusoloola bantu takisemeeye,
bhaatu bamui mu bacu̱ haabwa kutunga ngu̱ji̱ nkee munu,
bakukolagha ebitahi̱ki̱ye.
22 Muntu wa myemanyo akubbalagha bwangu etungo,
bhaatu atamanya ngu akumaliilila ali munaku.
23 Nuwaasoghosi̱ye muntu aku̱ku̱si̱i̱ma haanu̱ma
kandi kisaai̱ye ku̱koleesi̱ya ebu̱gha lisemeeye.
24 Oghu akwibhagha ese wee kedha ni̱na wee kandi aghila ati, “Takili kibhi,”
oghu ni musuma kwonini.
25 Muntu wa mululu akuleetagha kutongana,
bhaatu oghu eesi̱ghi̱ye Mukama, akukula-kulana.
26 Oghu akwesighagha byeli̱li̱kano biye ni mudhoma,
bhaatu oghu akukwatagha ebi bantu bagheji bamughambiiye, akuba kulungi.
27 Muntu oghu akuha banaku taakubuluwa kantu,
bhaatu oghu akubhenga kubaha, bantu bakani̱ye bakumukiina.
28 Bantu babhi bakaakulemagha, bantu beebi̱sa,
bhaatu bantu babhi mbahwelekeelela, bantu balungi beeyongela kukana.